भांगरभूंय | प्रतिनिधी
सर्बियाचो म्हान खेळगडो नोवाक जोकोविचान परतून संवसारीक रॅंकिंगेंतली पयली सुवात मेळयली. विक्रमी 23वो ग्रॅण्ड स्लॅम जिखल्या उपरांत ताणें परतून पयली सुवात मेळयली. ताणें स्पेनाच्या कार्लोस अल्कारेजाची सुवात घेतली. फ्रॅंच ओपना पयलीं कल्कारेज पयले सुवातेर आशिल्लो. जोकोविचान विक्रमी 23वे खेपे ग्रॅण्ड स्लॅम किताब जिखलो. सगल्यांत चड वेळ पयले सुवातेर रावपाचो विक्रम लेगीत जोकोविचाच्याच नांवाचेर आसा. आतां हातूंत आनीक सुदारणां करपाची बरी संद ताका फावो जाल्या.
तुमी कितलो तेंप पयले सुवातेर आशिल्ले वा तुमी कितले किताब जिखल्यार अशेच प्रस्न लोक विचारतात हें इतिहासाचेर नदर मारल्या उपरांत कळटा. हे दोनूय विक्रम आपल्या नांवार आशिल्ल्याची खोशी जाता अशें पत्रकारां कडेन उलयतना जोकोविचान म्हणलें.
मजगतीं, फ्रॅंच ओपन जैतिवंत इगा स्वियातेकान आपली पयली सुवात राखली. फ्रॅंच ओपनांत निकालाच्या आदाराचेर तिका फाटीं घालपाची बरी संद एरिना सबालेंका कडेन आशिल्ली. पूण, तिका ही संद चुकली.
दादल्यांच्या रॅंकिंगेंत अल्कारेज दुसरे सुवातेर घसरलो. दानील मेदवेदेव तिसरे सुवातेर कायम आसा. कॅस्पर रुड चवथे सुवातेर कायम आसा. दुखापतीक लागून सध्या टॅनीस कोर्टा पसून पयस आशिल्लो राफायल नादाल पयल्या 100तल्यान भायर पडला. तो 136चेर घसरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
