भांगरभूंय | प्रतिनिधी
विम्बल्डनाची दादल्यांच्या एकोड्या गटांतली फायनल परतून एकदा सध्याचो वस्ताद कार्लोस अल्काराज आनी सात खेपेचो चॅम्पियन नोवाक जोकोवीच हांचे मदीं जातली. सेगीत दुसऱ्या वर्सां ह्या खेळगड्यां मदीं फायनल जातली.
पोरूंचे सर्तींत अल्काराजान जोकोविचाक हारोवन पयले खेपे ही सर्त जिखिल्ली. संवसारीक क्रमवारींत तिसरे सुवातेर आशिल्ल्या अल्काराजान पयले सेमी फायनलींत डॅनिएल मेदवेदेवाक 6-7, 6-3, 6-4 आनी 6-4 अशा चार सेटांनी हारयिल्लो, जाल्यार दुसरे सेमी फायनलींत जोकोविचान इटलीच्या लोरेंजो मुसेट्टी हाका 6-4, 7-6 आनी 6-4 अशा सरळ सेटांनी हारयिल्लो.
सगल्यांत चड विम्बल्डन सर्त जिखपाचो विक्रम स्वित्झर्लेण्डाच्या रोजर फॅडरराच्या नांवार आसा. ताणें वट्ट 8 खेपे ही सर्त जिखल्या. ताच्या उपरांत अमेरिकेच्या पीट साम्रासाचो आनी जोकोविचाचो क्रमांक लागता. पूण, साम्रास निवृत्त जाल्ल्यान फॅडरराच्या विक्रमाची बरोबरी करपाची संद जोकोविचा कडेन आसा.
जोकोवीच 10वे खेपे फायनलींत पावला. ओपन अॅरांत सगल्यांत चड 24 ग्रॅण्ड स्लॅम किताब जिखपी तो पयलो खेळगडो. जोकोवीच हाचे पयलीं सगल्यांत चड ग्रॅण्ड स्लॅम (दादले आनी बायलो) जिखपाचे वळेरेंत सेरेना विलियम्सा (23 ग्रॅण्ड स्लॅम) वांगडा बरोबरींत आशिल्लो. मार्गरेट कोर्ट हिणें लेगीत वट्ट 24 ग्रॅण्ड स्लॅम किताब जिखल्यात. पूण, हातूंतले 13 किताब ओपन अॅराच्या पयलीचे आसात.
टॅनिसांत 1968त ओपन अॅराक सुरवात जाल्ली. त्या वेळार सगल्या खेळगड्यांक (अमॅच्योर आनी प्रोफेशनल) चारूय ग्रॅण्ड स्लॅम सर्तींनी वांटो घेवपाक परवानगी दिल्ली. हाका ओपन अॅरा म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
