भांगरभूंय | प्रतिनिधी
सर्बियाचो नोवाक जोकोवीच आनी रशियेचो दानील मेदवेदेव हाणें आपआपली मॅच जिखून विम्बल्डन ग्रॅण्ड स्लॅम ओपनाच्या दादल्यांच्या एकोड्या गटाचे क्वॉर्टर फायनलींत सुवात मेळयली.
सेंटर कोर्टाचेर जाल्ले मॅचींत 24व्या किताबाच्या सोदांत आशिल्ल्या जोकोविचाक पोलंडाच्या ह्युबर्ट हर्काजान खर आव्हान दिलें. पयले दोन सेट जिखपी जोकोविचाक सेमी फायनलींत सुवात मेळोवपाक बरोच घाम गळोवचो पडलो.
जोकोविचान पयले दोन सेट 7-6 (6) आनी 7-6 (6) अशें जिखले. हर्काजान खर प्रतिकार करून तिसरो सेट 5-7 फरकान जिखलो. चवथ्या सेटांत जोकोविचान आपलो सगलो अणभव पणाक लावन 6-4 फरकान जैत जोडून निमाण्या चारांतली सुवात निश्चीत केली.
मजगतीं, आनीक क्वॉर्टर फायनलींतले मॅचींत मेदवेदेवाक झेक प्रजासत्ताकाच्या जिरी लेहेका आड फुडली चाल मेळ्ळी. लेहेका रिटार्यड हर्ट जालो त्या वेळार तो 6-4 आनी 6-2 असो दोन सेट हारिल्लो. ह्या जैतान मेदवेदेव पयले खेपे विम्बल्डनाचे सेमी फायनलींत पावलो.
लेहेका फाटले मॅचींत टॉमी पॉला आड चार वरां खेळटना पांच सेटांनी जैत जोडिल्लें. ते मॅचींत तो बरोच थकिल्लो, तशेंच ताच्या उजव्या पांयाक दुखापत जाल्ली.
मेदवेदेवा आड तो थकिल्लो दिशिल्लों, तशेंच ताचे पांयाक दुखापत जाल्ली. पयल्या सेटा उपरांत ताणें मॅडिकल टायमआवट घेतिल्लो. ताच्या ट्रेनरान उजव्या पांयाक पट्टी बांदून ताका परतून खेळपाक धाडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
