भांगरभूंय | प्रतिनिधी
खबरां संस्था
सिनसिनाटीः सार्बियाच्या नोवाक जोकोविचान आयतारा वर्ल्ड नंबर 1 कार्लोस अल्कारेजाक हारोवन वेस्टर्न अॅण्ड सदर्न ओपन टॅनीस टूर्नामेंटाचें (सिनसिनाटी ओपन) वस्तादपण मेळयलें. सुमार चार वरां चलिल्ले फायनलींत जोकोविचान 5-7, 7-6 (7), 7-6 (4) अशें जैत मेळोवन फाटल्या म्हयन्यांत विंम्बल्डन फायनलींत अल्कारेजान घातिल्ले हारीचो बदलो घेतलो. 1990 उपरांत एटीपी टूरच्या इतिहासांत सगल्यांत लांब तीन सेट वाली ही फायनल थारली. विंबल्डनांत अल्कारेजान जोकिविचाक पांच सेट चलिल्ले फायनलींत हारयल्लें.
वर्ड नंबर 2 जोकिविचाच्या टॅनीस कारकिर्दींतलें हें 95वें जैत आसा. ताणे इवान लेंडलाक फाटीं उडोवन 1968 उपरांत ओपनांत सगल्यांत चड किताब जिखल्यात. अशें करपी तो तिसरो खेळगडो थारला. 2003 वर्सा 16 वर्सां पिरायेच्या जोकोविचान वेवसायीक टॅनीस मळार प्रवेश केलो. त्या वेळार रोजर फेडरर आनी राफेल नदाल टॅनीस वर्ल्डांतले चॅम्पियन आशिल्ले. 2005 वर्सा जोकोविच ऑस्ट्रेलियन ओपनाच्या रुपान आपली पयली ग्रँड स्लॅम मॅच खेळ्ळो. पूण पयले फेरयेंत ताका हार खावची पडली. 2006 वर्सा चड ओपनांत ताणे एटीपी टायटल मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
