भांगरभूंय | प्रतिनिधी
काँग्रेसः निवृत्त न्यायाधिशा वरवीं चवकशेची मागणी
भांगरभूंय । प्रतिनिधी
पणजीः सरकारी नोकर भरतींत जाल्ल्या घोट्यांत भाजपांतले फुडारी, कार्यकर्त्यांचो आस्पाव आसा. ह्या घोटाळ्यांची पुलीस पारदर्शकतायेन चवकशी करतले हाचेर आमचो विस्वास ना. ते खातीर उच्च न्यायालयाच्या निवृत्त न्यायाधिशा वरवीं ह्या प्रकरणाची चवकशी करची, अशी मागणी काँग्रेसीचे आमदार अॅड. कार्लोस फेरेरा हांणी केली.
पणजे पक्ष कार्यालयांत घेतिल्ले पत्रकार परिशदेंत ते उलयताले. काँग्रेस प्रदेशाध्यक्ष अमीत पाटकार, सरचिटणीस मोरेनो रिबेलो, उत्तर गोंय अध्यक्ष विरेंद्र शिरोडकार हाजीर आशिल्ले.
सरकारी नोकऱ्यो दिवपाचें हांयस दाखोवन लोकांक कोटींनी रुपयांक लुटपी पुजा नायक, दीपश्री सावंत गांवस हांचो भाजपाचे पदाधिकारी आनी कार्यकर्त्यां कडेन निश्चीत संबंद आसा. तेच खातीर लोकांक सरकारी नोकरेच्या नांवान फटोवपाक तांकां येस आयलें. हे खातीर मुख्यमंत्री डॉ. प्रमोद सावंत हांणी ह्या प्रकरणाचें गांभीर्य लक्षांत घेवन तपास करचो. सध्या ह्या प्रकरणांची चवकशी पुलीस करतात. पूण तांचे कडल्यान निपक्षपातीपणान चवकशी जातली हाचेर आमचो मातूय विस्वास ना. ते खातीर उच्च न्यायालयाच्या निवृत्त न्यायाधिशा वरवीं ह्या प्रकरणाचो तपास जावपाक जाय, अशेंय अॅड. फेरेरा हांणी सांगलें. सरकारी नोकरीचीं पदां सध्या कर्मचारी भरती आयोगा वरवीं भरतात. तरी लेगीत पुजा नायक, दीपश्री सावंत हांणी सरकारी नोकऱ्यांचें हांयस दाखोवन लोकांक लुटले. कर्मचारी भरती आयोगा वयल्यान कांय दिसां आदीं दिल्लींत बोवाळ जालो. ते खातीर लोकूय घुस्पागोंदळांत सांपडल्यात. तातूंतल्यानूच तांणी कश्टाचे तशेंच रीण घेवन सरकारी नोकऱ्यां खातीर लाखांनी रुपया पुजा, दीपश्रीक दिले. ते खातीर ह्या घोटाळ्यांक पुराय तरेन सरकार जापसालदार आसा, असो आरोप प्रदेशाध्यक्ष अमीत पाटकार हांणी सांगलें. गोंय सरकारान तत्काळ उच्च पांवड्या वयली समिती स्थापन करून सरकारी खात्यांतल्या रित्या पदां विशींची श्वेतपत्रिका जारी करची, अशीय तांणी मागणी केली.
विरोधक फक्त राजकारण करतातः यतीश नायक
सरकारी नोकर भरती घोटाळ्या वयल्यान विरोधक फक्त राजकारण करतात. ह्या प्रकरणांत दोशी सांपडिल्ल्यांचेर खर कारवाय करपाची हमी मुख्यमंत्री डॉ. प्रमोद सावंत हांणी दिल्या. पुलीस ह्या प्रकरणांत खोलायेन चवकशी करतात. तातूंतल्यान सत्य निश्चीत भायर येतलें, अशें भाजपा म्हणयारे यतीश नायक हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
