भांगरभूंय | प्रतिनिधी
न्यायालयीन चवकशी जाली जाल्यार सगल्यांचेंच समाधान जातलें आनी खऱ्या गुन्यांवकारांक ख्यास्त जातली आनी फुडाराक असलीं स्कॅमां जावंक पावचीं नात.
विद्यालयीन वा कॉलेज शिक्षण पुराय जाले उपरांत सर्वसादारण तरणाटो नोकरी सोदूंक लागता. दर एकल्याक दिसता की ताका सरकारी नोकरी मेळची. सरकारी नोकरी मेळोवप हें दर एकल्याचें सपन आसता. कारण सरकारी नोकरेंत खूब लाव आसतात. पयली गजाल म्हळ्यार जॉब सेक्युरिटी. कोणूय तुका तडकाफडकी नोकरे वेल्यान कांडूक शकना. दुसरो फायदो म्हळ्यार पगार बरो आसता आनी तिसरी गजाल म्हळ्यार फक्त पांच दीस काम आनी भरपूर सुटयो. असली नोकरी कोणाक नाका जाल्या.
पूण आयजकाल सरकारी नोकरी मेळप म्हळ्यार कुस्तार जालां. राज्य सरकारान कर्मचाऱ्यांचे भरती खातीर गोंय राज्य कर्मचारी भरती आयोगाची स्थापणूक केल्या. हो आयोग 200 सुवातो भरपा खातीर जेन्ना जायरात दिता तेन्ना हजारांनी अर्ज येतात. गुणवत्तेच्या आदारचेर जरी ह्यो 200 सुवातो भरल्यो जाल्यार उरिल्ल्या हजारांनी तरणाट्यांचें कितें? हाकाच लागून बेकार तरणाट्यांचे आवय-बापूय नोकरे खातीर पयशे दिवपाक तयार जातात आनी जॉब स्कॅम जल्म घेता.
हालीं तेंपार गोंयांत जाल्लो जॉब स्कॅम खुबूच गाजलो. हाचो अर्थ असो न्हय की पयलीं सरकारी नोकऱ्यो मंत्री विकनाशिल्ले. त्यावेळार नोकऱ्यांचें दर उणें आशिल्ले. प्युनाचे नोकरेक पांच लाख रुपया घेताले जाल्यार येरादारी निरिक्षक पदा खातीर सोळा लाख रुपया दिवचे पडटाले. तर कांय लोक मंत्र्याक नोकरे खातीर ब्लँक चेक दिताले. आतां नोकरेचे रेट बरेच वाडल्यात. आतां खूबशे एजंट तयार जाल्यात आनी हे एजंट नोकरे खातीर पयशे घेवपाचे काम करतात. हालींच गोंयांत जॉब स्कॅम प्रकरणांत खूबशा बायलांक आनी दादल्यांक अटक जाल्ली. हातूंतल्या पुजा नायक हे बायलमनशेन धाडस दाखोवन आपले तोंड उगडलें आनी आपणें कितले पयशे घेतले आनी ते कोणाक आनी खंय दिले हें प्रसार माध्यमाक भियेनानसतना सांगलें.
मुखेलमंत्र्यानी पुजा नायक हांणी केल्ल्या आरोपांची चवकशी करपाचो आदेश दिलो. पुलिसांनी आपले पद्दतीन चवकशी केली आनी पुजा नायक हांणी केल्ल्या आरोपांत कांयच तथ्य नाशिल्ल्याचें जाहीर केलें. जॉब स्कॅमा फाटलो खरो सुत्रधार कोण हें पुलिसांक अजून सांपडूंक ना वा पुलीस कोणाक तरी पालव दिवपा खातीर म्हळ्यार प्रोटेक्ट करपा खातीर नाटकां करतात. पुजा नाईकान नार्को टेस्टीक लेगीत हयकार दिला. हाचोच अर्थ असो की पुजा नाईकान केल्ल्या आरोपांत कितें तरी सत्य आसा. उजो लागले बगर केन्नाच धुंवर येवचो ना.
पुजा नायका वांगडा पुलिसांनी आनीक कांय बायलांक ह्या जॉब स्कॅम प्रकरणांत अटक केल्ली. तांचे कडेन केल्ले चवकशी संबदान पुलिसांनी अजून कांयच सांगूक ना. तातूंतली एक बायलमनीस सचिवालयांत काम करताली. तिचे कचेरेंत पयश्यांची देवाण घेवाण जाताली. थंयच उमेदवारांच्यो मुलाखती जाताल्यो आनी उमेदवारांक नोकरेचीं नियुक्ती पत्रां दिताले हे सचिवालयांत काम करपी खूबशा जाणांक खबर आसा. पुलिसांनी सचिवालयांतल्या कचेर्यांनी चवकशी केली काय? पुलिसांनी ह्या संबदान कांयच खुलासो कित्याक करूंक ना? कांय पुलिसांचेर कोणाचो दबाव आसा?
पुलीस तांकां जाय जाल्यार आपल्या रिकोर्डांत फावो तशे फेरफार करुंक शकतात. हांव पत्रकार देखून हें सांगूक शकता. एकदां साल्वादोर द मुंद ग्रामपंयातीच्या सर्वे क्रमांक 340/1 आनी सर्वे क्रमांक 342/11 हागां रानांत बेकायदेशीर रितीन बांदिल्ल्या घरांची तपासणी करपा खातीर गेल्ले थंय सरपंचाच्या कांय लोकांनी आदवोगाद डॉ. ओलाव अल्बुकेर्क हांचेर हल्लो केलो. तेन्ना हांव थंय उपस्थीत आशिल्लों. हांवें ह्या आदवोगादाक म्हजे स्कुटरीचेर बसोवन पर्वरी पुलीस स्टेशनार सोडलो. त्यावेळार दनपारचीं बारां सुमार जाल्लीं. त्याच दिसा सांचेच्या पांच वरांचेर तो सरपंच पंचायत सचिवा वांगडा सुमार वीस पंचवीस लोकां सयत पर्वरी पुलीस स्टेशनार येवन आदवोगाद अल्बुकेर्कान आपल्याचेर हल्लो केलो अशी कागाळ केली. सांजेच्या सात वरांचेर सदां भशेन हांव जेन्ना पर्वरी पुलीस स्टेशनार गेलो तेन्ना म्हाका धक्को बसलो. पुलिसांच्या रिकोर्डांत सरपंच/पंचायत सचिवाची कागाळ बारा वरांचेर नोंद केल्ली जाल्यार सदर आदवोगादाची कागाळ बारा वरां उपरांत नोंद जाल्ली. हांवें जेन्ना पुलीस निरिक्षकाक ह्या संबदान जाप विचारली तेन्ना ताणें म्हाका सांगले की, तो आदवोगाद न्हय, ताका कोर्टांत ते विशीं सिध्द करुंदी. मुंबय उच्च न्यायालयान सरपंचाची कागाळ भायर मारली आनी आदवोगादान सरपंचा आड केल्ली कागाळ कोर्टांत चालू आसा. ही खरी गजाल. तेन्ना पुलीस कितेंय करुंक शकतात हें विसरूंक फावना. सरकाराक जाय जाल्यार पुलिसांक सांगून सरकार खून लेगीत पचोवंक शकता. तेन्ना शाण्या मनशान पुलीस स्टेशनाची केन्ना सोंपणां चडची न्हय. देखून ह्या जॉब स्कॅमाची न्यायालयीन चवकशी जावपाची गरज आसा. तेन्नाच ह्या स्कॅमा फाटलो खरो सुत्रधार कोण हो लोकांक कळटलो आनी पयशे कोणे कोणे घेतल्यात तें उक्तडार येतलें. नाजाल्यार हें प्रकरण फायलींतूच उरतलें. सरकाराक आनी पुलिसांक खबर आसा लोक चार दीस बोवाळ मारतले मागीर ओग्गी बसतले.
नोकरी हें उपजिविकेचें साधन. तरणाट्यांक नोकऱ्यो सरकारी जावं वा खाजगी वाठारांत उपलब्ध करुन दिवप ही सरकाराची जापसालदारकी आसा. सरकारान जर ही जापसालदारकी वेवस्थीत हाताळ्ळी ना जाल्यार फुडाराक बेकार तरणाट्यांचें प्रमाण हिसपा भायर वाडटलें आनी तरणाट्या मदीं असंतोषाचें वातावरण पातळटलें. थोडे तरणाटे नोकरे खातीर शेजारच्या राज्यांत वा विदेशांत वतले आनी पर्यायान गोंयांत गोंयकारांचो आंकडो उणो जातलो हें विसरूंक फावना. ते खातीर नोकर भरतेंत पारदर्शकताय आसप गरजेची आसा. ह्या जॉब स्कॅमाचो सुटावो जाता तितले बेगीन जावप गरजेचें आनी गुन्यांवकारांक ख्यास्त ही जावंकच जाय. मनांत भंय निर्माण जायना ताे मेरेन असले प्रकार जायत रावतले आनी गरीब आनी हुशार तरणाट्यांचें लुकसाण जातलें. न्यायालयीन चवकशी जाली जाल्यार सगल्यांचेंच समाधान जातलें आनी खऱ्या गुन्यांवकारांक ख्यास्त जातली आनी फुडाराक असलीं स्कॅमां जावंक पावचीं नात.
अनिल कामत शंखवाळकार
9763718518
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
