भांगरभूंय | प्रतिनिधी
कोरगांव ग्रामसभेंत मागणी : पर्यावरणा कडेन आडनदर केल्ल्याचो आरोप
भांगरभूंय । प्रतिनिधी
कोरगांव : कोरगांव पंचायत वाठारांत खूब कडेन रानांनी, दोंगर माथ्यार बेकायदो बांदकामां चल्ल्यांत. रानां नश्ट जातात. सुकणीं-सावदां, सैमीक झरे ह्या सगल्यांचेर वायट परिणाम जाता. अशें आसून लेगीत कोरगांवची जैव विविधता समिती ताचे कडेन लक्ष दिना. हाका लागून सैमाचें व्हड लुकसाण जाता. जैव विविधता समिती पर्यावरणा कडेन आडनदर करता, हे खातीर ती बरखास्त करची, अशी मागणी लावन धरून हे संबंदांत थाराव मांडलो. उपसरपंच दिवाकर जाधव आनी पंचायत सचीव श्रद्धा कोरगांवकार हांणी हो थाराव संबंदीत खात्या कडेन धाडटात, अशें सांगलें.
आयतार जाल्ले कोरगांव ग्रामसभेंत जैव विविधता समितीचेर नेटाची चर्चा जाली आनी ही समिती बरखास्त करपाचो थाराव घेतलो. ते भायर दोंगर माथ्या वयलें बेकायदो बांदकाम पंचायतीन तत्काळ मोडचें, असो थाराव राहूल भगत हांणी मांडलो आनी तो मंजूर जालो. ते भायर कोयराची समस्या, बिगर गोंयकारांनी बांदकाम ह्या विशयांचेर चर्चा करून थाराव संमत केले.
अब्दूल करीम हांणी सरपंच पदाचो राजिनामो दिल्ल्यान सरपंच पदाचो ताबो आशिल्ले दिवाकर जाधव हांचे अध्यक्षते खाला ग्रामसभा जाली. ह्या वेळार माचयेर पंच समील भाटलेकार, देविदास नागवेंकार, अब्दूल करीम, यासीन नायक, नीता नर्से, कल्पिता कलशांवकार, अनुराधा कोरगांवकार, लौकीक शेट्ये, पंचायत सचीव श्रद्धा कोरगांवकार आनी निरिक्षक म्हूण देवानंद गावडे हाजीर आसले.
माईण वाडो – कोरगांवां बेकायदो तरेन चालू आशिल्लें एका बिगर गोंयकाराचें बंद उडयल्लें बांदकाम परतून चालू जाला. ताच्या विरोधांत पंचायतीन पुलीस कागाळ करची, असो थाराव आग्नेल नोरोन्हा हांणी मांडलो आनी ताका जुझे कार्व्हालो हांणी अनुमोदन दिलें. आदले सरपंच सुदीप कोरगांवकार, सखाराम कोरगांवकार हांणी ह्या वेळार म्हत्वाच्यो सुचोवण्यो केल्यो.
उदय प्रभू देसाय हांणी सांगलें, रस्त्या कुशीक, व्हाळांनी कोयर आनी प्लास्टीक बाटल्यो उडयिल्ल्यान व्हाळ सांचल्यात आनी पावसाचें उदक लोकांच्या घरांनी वता. पंचायतीन लायिल्ल्या सीसीटीव्ही कॅमेऱ्यां वरवीं पळोवणी करून भौशीक सुवातांचेर कोयर उजोवप्यांचेर कारवाय करची.
भालखाजनांतले मसुंडेच्या पाख्याची दुरुस्ती करपाची मागणी विकास गावडे हांणी केली. सुरवेक उपसरपंच दिवाकर जाधव हांणी येवकार दिलो. कल्पिता कलशांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
