भांगरभूंय | प्रतिनिधी
पेडणें: जैतीर-उगवें, पेडण्यां रेंव उसपपाच्या वादांतल्यान जाल्ल्या फारपेट प्रकरणांत पेडणें पुलिसांनी आयज आयतार सकाळीं व्हड कारवाय केली. ह्या प्रकरणांत दोन आयआरबी पुलीस कर्मचार्यां सयत पांच थळाव्या तरणाट्याक अटक केली. फाटल्या मंगळारा मध्यान रातीं जाल्ल्या फारपेटांत रेंव उसपीपी रामरिशी रामराज पासवान आनी लाल बहादूर गोड हे दोन बिहारी कामगार गंभीर जखमी जाल्ले.
चार दीस नेटान चवकशी केले उपरांत पेडणें पुलिसांनी आयज फांतोडेर उगवें, पेडणेंच्या पांच आरोपींक शस्त्र कायद्या खाला अटक केली. नेहाल महाले (२०), आशिष महाले (२४), आकाश महाले (२४), ऋषिकेश महाले (३२) आनी गंगाराम महाले (३४) अशीं तांची नांवां आसा. हे सगले उगव्यां रावपी. तशेंच ऋषिकेश महाले आनी गंगाराम महाले हे दोग जाण आयआरबी पुलीस कर्मचारी आसात.
नेमकें प्रकरण कितें?
मंगळार, २८ ऑक्टोबराक फांतोडेर २.३० वरांचेर पोरसकडें-उगवेंचे शिमेर आशिल्ले तेरेखोल न्हंयेंत फारपेट जाल्ली. रेंव वेवसाया कडेन संबंदीत आशिल्ल्या आठ जाणांचो एक गट रेंव काडपा खातीर व्हडल्यांतल्यान वतना दुसर्या गटान तांचेर हल्लो केलो. फारपेटींत जखमी जाल्ले दोगूय कामगार गंभीर आसात. सध्या तांचेर बांबोळेच्या गोंय वैजकी महाविद्यालयांत उपचार सुरू आसात. एका कामगाराच्या हातांतल्यान जाल्यार दुसर्याचे मानेंतल्यान गुळी आरपार गेल्ली.
फारपेटी फाटलें कारण
मुळाव्या तपासांतल्यान हो हल्लो रेंव वेवसायांतले थळावे सर्तींतल्यान जाल्ल्याची शक्यताय उक्तायल्या. पोरसकडें-उगवें भागांत रेंव वेवसायांत सर्त बरीच वाडल्या. ह्या वाठारांत रातच्या वेळार एकामेकांचे हद्दींत घुसून रेंव उसपपाचे प्रकार घडटात. हाका लागून जायते फावट वाद, तशेंच मारपेटीच्योय घडणुको घडतूच आसतात.
हे फारपेटीचे घडणुके उपरांत पेडणें वाठारांत भंयाचें वातावरण निर्माण जाल्लें. पुलीस निरीक्षक सचिन लोकरे हांच्या नेतृत्वा खाला ह्या प्रकरणाचो तपास नेटान सुरू केलो. फारपेट जाल्ल्यान पेडणें पुलिसांनी, ज्या थळाव्या लोकांकडेन शासकीय परवानो आशिल्ली बंदूक आसा, त्या वट्ट ४९ जाणांक पुलीेस स्टेशनाचेर हाजीर रावपाचे आदेश दिल्ले.
पेडणें पुलिसांनी चार दीस नेटान चवकशी केे उपरांत थळाव्या पांच जाणांक अटक केली. ह्या प्रकरणांत आयआरबी पुलिसांचो आसपाव आशिल्ल्यान पेडण्यां वाठारांत बरोच बोवाळ निर्माण जाला. ह्या प्रकरणांत संंबंदीतांचेर भारतीय न्याय संहिता आनी शस्त्र कायद्या खाला गुन्यांव नोंद केला.
मजगतीं, समाजीक कार्यकर्त्यांनी हे घडणुके उपरांत रेंव वेवसाया कडेन संबंदीत मजुरांची नोंदणी पुलिसां कडेन आसा व्हय? असो प्रस्न हाजीर करीत कायदो आनी सुवेवस्थेचेर प्रस्न निर्माण जाला. तशेंच, उच्च न्यायालयाच्या आदेशा प्रमाण रेंव उसपपाचेर बंदी आसूनय, भोंवपी पंगडा कडल्यान आडनदर जाता, असो आरोप नागरिकांनी फारपेट प्रकरणा उपरांत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
