भांगरभूंय | प्रतिनिधी
पा किस्तान आनी दुबयंत चालू आशिल्ली एका दिसाची चॅम्पियन्स करंड सर्त निमाण्या पांवड्यार पावल्या. अपेक्षे प्रमाण भारतान हे सर्तींत बरी कामगिरी करून फायनलींत पावल घालें. भारतान काल जाल्ले पयले सेमी फायनलींत पांच फावटीचो संवसारीक करंड वस्ताद आनी दोन फावटीचो चॅम्पियन्स करंड वस्ताद ऑस्ट्रेलिया पंगडाचेर चार गडे राखून जैत मेळयलें. तशें पळोवंक गेल्यार ही मॅच सुरू जावचे पयलींच भारत ही सेमी फायनल जिखतलो अशेच म्हणटाले. पूण क्रिकेट मोग्यांच्या मनांत खंयतरी धाकधूक आशिल्ली. कारण ऑस्ट्रेलियन पंगड भारताक सदांच जड गेला. चड करून आयसीसी सर्तींत ऑस्ट्रेलियेन भारताचेर सदांच वर्चस्व राखलां.
बाद फेरीचे मॅचींनीय ऑस्ट्रेलियेन भारताक खूबशे फावटीं हारयला. नोव्हेंबर 2023 वर्सा एका दिसाचे संवसारीक करंड सर्तीचे फायनलींत ऑस्ट्रेलियानूच भारताक हारोवन संवसारीक करंड वस्ताद जावपाचो 144 कोटी भारतीयांचें सपन मातयेभरवण केल्लें. त्याच वर्सा जाल्ल्या संवसारीक टॅस्ट चॅम्पियन्सशिपीचे निमाणें फेरयेंतूय ऑस्ट्रेलियानूच भारताक हारयिल्लो. इतलेंच न्हय 2003 वर्साच्या संवसारीक करंड सर्तींतय ऑस्ट्रेलियानूच भारताक हारयिल्लो. ताका लागून ह्या वेळारूय ते ताची पुनरावृत्ती करतली काय कितें? अशी भिरांत क्रिकेट मोग्यांक आशिल्ली. पूण भारतीय खेळगड्यांनी बरो खेळ करून ही भिरांत फटीची थारायली.
पयर (मंगळारा) जाल्ले सेमी फायनलींत ऑस्ट्रेलियान पयली बॅटींग करून 264 धांवड्यो काडल्यो. भारताच्या सगल्या बॉलरांनी बरी बॉलींग घालून ऑस्ट्रेलियाच्या सगल्या बॅटसमांनाक आवट केले. भारतीय बॉलरांनी अप्रतीम कामगिरी करून ऑस्ट्रेलियाक पुराय 50 ओव्हरीं लेगीत खेळूंक दिल्यो नात. बॉलरांनी केल्ले बरे कामगिरीन भारताचें अर्दें काम जाल्लें. पूण बॅटींग करता आसतना रोहीत शर्मा आनी शुभमन गील ही मुखेली आनी उपमुखेल्याची जोडी सवाय भितर आवट जाल्ल्यान क्रिकेट मोगींची धाकधूक वाडली. पूण चेस मास्टर आशिल्लो संवसारांतलो सर्वोत्कृश्ट बॅटसमन विराट कोहली ‘हांव आसा न्हय…’ अशें म्हणून सदचे भशेन बरो खेळ करून भारताक जैत मेळोवन दिलें.
पंगड अडचणींत आसतना विराट कोहलीन 84 धांवड्यांची खेळी करून ऑस्ट्रेलियाच्या बॉलरांक नाकापुरो करून सोडलें. ताका श्रेयस अय्यर, अक्षर पटेल, के एल राहूल आनी हार्दीक पांड्या हांणी बरो सांगात दिलो, ताका लागून भारतीय पंगड फायनलींत पावंक शकलो. भारतान हे मॅचींत बरो खेळ केलो. फक्त हेच मॅचींत न्हय जाल्यार पुराय सर्तींत भारतीय पंगडान बरी कामगिरी केली. भारतान हे सर्तींत खेळिल्ल्या सगल्या मॅचींनी जैत जोडलें आनी फायनलींत पावल घालें. आयज म्हणल्यार 6 तारखेक दक्षीण आफ्रिका आनी न्युझिलॅण्ड हांचे मदीं दुसरी सेमी फायनल लाहोरच्या गडाफी स्टेडियमाचेर जातली. हे मॅचींतलो जैतिवंत पंगड 9 तारखेक भारता कडेन फायनलींत खेळटलो.
भारतान हे सर्तींत पंगडाक सोब सारकी बरी कामगिरी करून फायनलींत प्रवेश केलाे. हे सर्तींत भारत एकूय मॅच हारिल्लो ना. खंयच्याच पंगडाक भारताक हारोवप शक्य जालें ना. विशेश म्हणल्यार भारतान सगल्यो मॅची एकतर्फी जिखल्यात. दुसऱ्या पंगडाक भारतान मात लेगीत संद दिली ना. बॉलींग, बॅटींग आनी फिल्डींग ह्या तिनूय मळार भारतान वर्चस्व गाजयलें. भारताचे सगले बॅटसमन फॉर्मांत आसात. रोहीत, विराट, गील, श्रेयस, राहूल सगल्यांनीच धांवड्यो कडल्यात. हार्दीक पांड्याक व्हड धांवसंख्या उबारूंक जमली ना तरी तो जैताच्या वेळार बरो खेळ खेळूंक शकता. हें ताणें सेमी फायनलींत दाखोवन दिलें. भारताचे बॉलर जाल्यार दोळे दिपकावपी कामगिरी करीत आसात. भारताचे सगलेच बॉलर बरी कामगिरी करून प्रतिस्पर्धी बॅटसमनांचेर चेपण घालीत आसात.
शमी, पांड्या, जडेजा, कुलदीप यादव, अक्षर पटेल आनी वरुण चक्रवर्ती ह्या भारताच्या बॉलरांनी हे सर्तींत जी कामगिरी केल्या तशी कामगिरी हाचे आदीं भारताच्या खंयच्याच बॉलरांनी केल्ली ना. एकाच वेळार भारताच्या सगल्या बॉलरां मदीं विकेट घेवपाची सर्तूच लागल्या. विशेश म्हणल्यार हातूंत सगलेच बॉलर येसस्वी जायत आसात. एकेच सर्तींत सगले बॉलर भेदक बॉलींग करीत आशिल्ल्याचें चित्र पयलेच फावटी पळोवंक मेळटा. अशें म्हणटात की बॅटसमन मॅची जिखून दितात जाल्यार बॉलर सर्त. भारतान हे सर्तीचेर जें वर्चस्व गाजयलां तें बॉलरांक लागून. बॉलरांचो होच फॉर्म फायनलींत कायम उरत जाल्यार भारत हे सर्तीत जैतिवंत थारतलो हातूंत दुबाव ना. आयज न्युझिलॅण्ड आनी दक्षीण आफ्रिका दुसरी सेमी फायनल खेळटले. अर्थांत न्युझिलॅण्डाचो सद्याचो फॉर्म, अणभव आनी दक्षीण आफ्रिकेची ऐनवेळार हातांतलो खेळ व्हगडावपाची वृत्ती पळयत जाल्यार दक्षीण आफ्रिकेक हारोवन न्युझिलॅण्ड फायनलींत पावूंक शकता. तशें जायत जाल्यार 9 तारखेक भारत आनी न्युझिलॅण्ड हांचे मदीं फायनल पळोवंक मेळटली. अर्थांत न्युझिलॅण्ड आसूं वा दक्षीण आफ्रिका, भारतीय पंगडान आपले तांकी प्रमाण खेळ करीत जाल्यार भारताक जैता पसून कोणूच आडावंक शकचो ना.
सेमी फायनली भशेन भारतीय खेळगड्यांनी फायनलींत खेळ करीत जाल्यार भारताक चॅम्पियन्स जावपा पसून कोणूच आडावंक शकचो ना. एकूणच चॅम्पियन्स करंडाच्या जैता पसून भारत एक पावल पयस आसा. जर भारतीय खेळगड्यांनी आपले तांकी प्रमाण खेळ करीत जाल्यार आनी नशिबान सांगात दीत जाल्यार हें एक पावल हुंपून भारत 12 वर्सां उपरांत चॅम्पियन्स करंडाचेर नांव कोंरांततलो आनी 144 कोटी भारतीयांचें सपन साकारूंक शकतलो. भारतीय पंगडाक फायनली खातीर शुभेत्सा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
