भांगरभूंय | प्रतिनिधी
खबरां संस्था
विशाखापट्टनमः दुसरे टॅस्ट मॅचीच्या तिसऱ्या दिसा भारतान आपल्या दुसऱ्या डावांत 255 धांवड्यो करून इंग्लंडाक जैता खातीर 399 धांवड्यांचे लक्ष्य दिलें. दिसाचो खेळ सोपलो तेन्ना इंग्लंडान आपल्या दुसऱ्या डावांत 1 आवट 67 धांवड्यो केल्ल्यो. जैता खातीर तांका 332 धांवड्यांची जाल्यार भारताक 9 विकेटी घेवपाची गरज आसा. पयल्या डावांत मेळल्ली 143 धांवड्याचे आघाडी उपरांत भारतान गिलाच्या शेकड्याच्या आदारान दुसऱ्या डावांत केल्ल्या 255 धांवड्याक लागून ताकां इंग्लंडाक जैता खातीर 399 धांवड्यांचें आव्हान दिवप शक्य जाले.
तिसऱ्या दिसाचो खेळ सोपलो तेन्ना इंग्लंडान ओपनर बेन डक्केटाक वोगडावन 1 आवट 29 धांवड्यो केल्यात. रविचंद्रन आश्विनान ही विकेट घेतली. जॅक क्रॉली 29 आनी रेहान अहमद 9 धांवड्यांचेर खेळटात. तांकां जैता खातीर 332 धांवड्यांची गरज आसा. पयले टॅस्ट मॅचींत इंग्लंडान अजापीत करपी जैत मेळयल्लें. आतां ते ताची पुनरावृत्ती करचे नात अशें म्हणपाक जायना.
तिसऱ्या दिसा भारताच्या दुसऱ्या डावाची सुरवात डळमळीत जाली. 30 धांवड्यांत ओपनर कॅप्टन रोहीत शर्मा (13 ) आनी पयल्या171 डावांत दोट्टी शेंकडो करपी यशस्वी जयस्वाल (17) हांकां अॅन्डरसनान आवट केलें. शुभमन गील आनी श्रेयश अय्यरान तिसरे विकेटी खातीर 81 धांवड्यांची भागिदारी केली. श्रेयशाक टॉम हर्टलीन 29 धांवड्यांचेर आवट केले. रजन पटिदार 9 धांवड्यो करून आवट जाल्या उपरांत अक्षर पटेल आनी गील जोडी जमली आनी तांणी चौथे विकेटी खातीर 89 धांवड्यांची भागिदारी केली. पंगडाक दोनशेंच्या वयर धांवड्यो करून दिवन शुभमन गील शबीर बशिराच्या बॉलाचेर कॅच आवट जालो. ताणे 147 बॉलांत 11 चौके आनी 2 सक्यांनी 104 धांवड्यो केल्यो. टॅस्टीच्या 11 डावां उपरांत गिलाचो व्हो शेंकडो जाला. फाटल्या इकरा डावांत ताणे 13, 18, 6, 10, 2, 26, 36, 10, 23, 0 आनी 34 धांवड्यो केल्ल्यो. ताका लागून ताचेर टिका जावपाक लागल्ली.
आश्विनान 29 धांवड्यो केल्यो. भारताचे तळाचे दोन बॅट्समन शू्न्याचेर आवट जाले आनी भारताचो डाव 255 धांवड्यांत सोपलो.
399 धांवड्यांचो फाटलाव करपी इंग्लंडाच्या दुसऱ्या डावाची सुरवात क्रॉवली आनी डक्केटान केली. तांणी 50 धांवड्यांच सलामी दिली तेन्ना आश्विनान तांकां 11वे ओव्हरींत पयलो धपको दिलो. ताच्या बॉलाचेर ताची गेल्ली कॅच श्रीकर भारतान धरली. ताणे 26 बॉलांत 6 चौक्यांनी झंझावाती 28 धांवड्यो केल्यो. 14 ओव्हरींत इंग्लडाच्यो 67 धांवड्यो जाल्यात.
रोहीत शर्माचो विक्रम
रोहीत शर्मान भारताच्या दुसऱ्या डावांत 13 धांवड्यो करतान विराट कोहलीचो एक विक्रम मोडलो. टॅस्ट चॅम्पियनशीपा (डब्ल्यूटीसी) भारता खातीर सगल्यांत चड धांवड्यो करपी तो बॅट्समन थारला. विराटान डब्ल्यूटीसीतल्या 36 मॅचींतल्या 60 डावांत 39.21चे सरासरीन 2235 धांवड्यो केल्यात. तातूंत 4 शेंकडे आनी 10 अर्द शेंकडे आसात. तागेली नाबाद 254 ही सगल्यांत चड धावड्यो आसात.
रोहितान 29 मॅचींत 49 डावांत 49.82चे सरासरीन 2242 धांवड्यो केल्यात. तातूंत 7 शेंकडे आनी 6 अर्द शेंकडे आसात. 212 ह्यो तागेल्या सगल्यांत चड धांवड्यो आसात. टॅस्ट चॅम्पियनशीपांत सगल्यांत चड धांवड्यो करपाचो विक्रम इ्ंग्लडाच्या जो रुटाच्या नांवार आसा. ताणे 49 मॅचींतल्या 89 डावांत 49.06चे सरसरीन सगल्यांत चड 4023 धांवड्यो केल्यात. तातूंत 12 शेंकडे आनी 16 अर्द शेंकडे आसात. 228 ह्यो ताची सगल्यांत चड धांवड्यो आसात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
