भांगरभूंय | प्रतिनिधी
आयच्यान बायलांची संवसारीक वन डे क्रिकेट सर्तीक सुरवात जाता. आयज उक्तावणाची मॅच भारत आनी श्रीलंका ह्या पंगडां मदीं गुवाहाटीच्या बारसापारा क्रिकेट स्टेडियमाचेर जातली. भारताच्या वेळा प्रमाण दनपारां तीन वरांचेर मॅचीक सुरवात जातली.
घरच्या मैदानाचो फायदो आनी सध्याचो फॉर्म पळयलो, जाल्यार भारत 47 वर्सां सावन चालू आशिल्लो वस्तादपणाचो दुकळ सोंपोवपाची मोख दवरून भारत मैदानांत देंवतलो. 12 वर्सांनी ही सर्त भारतांत जाता. हे खेपे घरच्या मैदानाचो फायदो घेवपाचो ताचो यत्न आसतलो. दालें जड दिसता.
सर्ती पयलीं जाल्ल्या सरावाच्या मॅचींनी भारतान बरें प्रदर्शन केलां, ताका लागून आयचे मॅची खातीर ताचेच दालें जड दिसता. सराव मॅचींत भारतान न्युझिलॅण्डाक दोन खेपे हारायला. इंग्लंडा आड हार घेवची पडली आसली तरी मॅचींत खेळगडयो फॉर्मांत आशिल्ल्याचें जाणवतालें. दुसरे वटेन श्रीलंकेची सरावाची पयली मॅच पाकिस्ताना आड आशिल्ली. पूण, पावसाक लागून ती रद्द करची पडली. दुसरे मॅचींत ताका बांगलादेशा आड एके धांवडेन हार घेवची पडिल्ली.
उप मुखेली स्मृती मंधाना आपले कारकिर्दींतले सर्वोत्कृश्ट फॉर्मांत आसा. भारताची बॅटिंग तिचेच सरभोवतणी घुंवतना दिसता. अंदूं तिणें चार शेंकडे मारल्यात, तातूंतले दोन शेंकडे ऑस्ट्रेलिये आड सेगीत दोन मॅचींनी मारल्यात. तिची सरासरी 66.28 इतकी आसा.
अणभवी शेफाली वर्माचे गैरहाजेरेंत युवा बॅटर प्रतिका रावला आड तिची जोडी बरी जमल्या. हे जोडयेन भारताक साबार मॅचींनी बरी सुरवात करून दिल्या आनी आयचे मॅचींत लेगीत तांच्या कडल्यान तश्याच प्रदर्शनाची आस्त आसतली.
आपली पांचवी संवसारीक सर्त खेळपी मुखेली हरमनप्रीत व्हड सर्तींनी बरें प्रदर्शन करता. तिची सरासरी 50 इतकी आसा. हालींच इंग्लंडा आडचे मॅचींत तिणें शेंकडो मारिल्लो. तशेंच ऑस्ट्रेलिये आड अर्द शेंकड्याची खेळी केल्ली.
दुखापतीतल्यान पूर्ण बरी जावन आयिल्ले जेमिमा रॉड्रिग्साक लागून मदले फळयेक घटसाम आयल्या. सरावाचे मॅचींत तिणें 66 धांवड्यांची खेळी केल्ली.
ऋचा घोष, हरलीन देओल आनी दिप्ती शर्मा हांकां लागून बॅटिंग वळेरेंत घटसाण आयल्या. जाल्यार अमनजोत कौर फास्ट बॉलर ऑलरावण्डर सकयले सुवातेर बरे तरेन बॅटींग करपाक शकता.
बॉलिंगेंत रेणुका सिंग आसा. दुखापतींतल्यान ती बरी जावन परत आयल्या. तिका व्हड सर्तींनी बरें प्रदर्शन करपाचो अणभव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
