भांगरभूंय | प्रतिनिधी
विरोधी पक्ष फुडारी युरी आलेमांव हांणी जुलय 2024 त जनमत कौल दीस मनोवपा संबंदी विधानसभेत विशय उपस्थीत केलो आनी खाजगी थाराव सादर केलो.
आनीक एक जैत हातांत आयलें आनी नीज गोंयकारां मदें खुशालकायेचें वातावरण पसरलें. ओपिनीयन पोल डे म्हणल्यारूच जनमत कौल दीस फुडल्या वर्सा थावन सरकारी पावंड्यार मनयतले अशें जाहीर केलें तेन्ना गोंयकारांक नवें कितें मेळिल्ल्याची खोस जाली. ती मनयतना कांय पोरांटे उडणां मारतना दिसले जांकां जनमत कौल दिसाचें कांय एक खबर ना आनी कोणें आनी कित्याक तो मेळोवन घेतलो ताची म्हायती ना तेवूय खोस मनोवन व्हाट्सॅप- फेसबुकाचेर शेबय घालूंक लागले तें पळेवन मात हांसो आवरूंक जालो ना. कांय जणांनी थाराव घेतले. ह्या थारावांनी फकत सरकाराक परबीं आशिल्लीं, जनमत कौला खातीर वावुरले तांचो उल्लेख लेगीत खंय दिसलो ना. इतलीं वर्सां ही मागणी जाताली तेन्ना ह्या थाराव घेवप्यांचो केन्नाच तेंको मेळ्ळो ना ही दुखाची गजाल. आसूं. जैत निमणें जैत आसता, ताका हजार दावेदार असतात हें सभावीक.
‘बॅटर लेट दॅन नॅवर’ अशी एक म्हण्णी आसा. वीस वर्सां वयर जालीं कांय मोजक्या व्यक्तीं आनी संस्थां बराबर दाल्गादो कोंकणी अकादेमीन खास निर्णय घेवन हो दीस मनोवंक सुरवात केल्ली. दर पावटी अकादेमीची मागणी आशिल्ली, जनमत कौल दीस हो गोंया खातीर म्हत्वाचो दीस आसा आनी तो सरकारी पावंड्यार मनोवंक जाय म्हण. अकादेमीचो आदलो अध्यक्ष प्रेमानंद लोटलीकार म्हणटालो हो दीस अकादेमीन मनोवंचो एकूच हेतू की ह्या दिसाची सरकारान दखल घेवंची आनी तो सरकारी पावंड्यार मनोवंचो. ह्या दिसाचें म्हत्व सरकाराक आनी भौसाक कळचे खातीर आमी गोंयच्या म्हान मनशांक हाडून व्याख्यांनां घडोवन हाडलीं, खास उलोवपां केलीं. म्हज्या कार्यकाळांत कोवीड काळ असतना लेगीत आमी हो दीस मनोवंचो चुकयलो ना आनी सरकाराक हो दीस सरकारी पावंड्यार मनोवंक संदेश दियत रावले. इतलें करून खंयच्याच सरकारन तें काना- मनार घेतलें ना. आमचीं पेनां झरलीं, विचार वण्टींक आपटून खंयचे खंय नाच्च जाले. एक दोन बातम्यांचो सरकाराचेर कांयच परिणाम जालो ना.
पूण, विरोधी पक्ष फुडारी युरी आलेमांव हांणी जुलय 2024 त जनमत कौल दीस मनोवपा संबंदी विधानसभेत विशय उपस्थीत केलो आनी खाजगी थाराव सादर केलो. हाचो मात बरो परिणाम जालो. म्हणटात न्हय, राजकारण्याची भास राजकारण्यांक बरी समजता. आमकां घडये तें तांचे भशेन मांडूंक समजनाशिल्लें. एक बरी गजाल घडली. गोंयचो मुख्यमंत्री डॉ. सावंत हांणी राज्य पांवड्यार सरकारी कार्यावळ म्हूण हो दीस मनयतले अशें जाहीर केलें. तशें, विधानसभेंत जाहीर केल्लें सगळेंच अमलांत येता अशें ना पूण ही मिलाग्र घडली. बरोबर एका वर्साच्या काळा उपरांत सामान्य प्रशासन खात्याचे अवर सचीव श्रयस डिसिल्वा हांणी अधिसुचोवणी जारी करून 16 जानेवारीक राज्य पांवड्यार जनमत कौल दीस म्हण मनयतले आनी 2025- 26 ह्या अर्थीक वर्सा सावन म्हणल्यार जानेवारी 2026 सावन राज्य पांवड्यार दर वर्सा ‘जनमत दीस’ मनयतले आनी राजभास संचालनालय हे खातीर नोडल विभाग म्हूण काम करतलें, कार्यावळीचे तयारेची जापसालदारकी ह्या खात्याचेर आसतली अशें अधिसुचवणेंत म्हणलां. हे मिलाग्री खातीर गोंयचे मुख्यमंत्री डॉ. सावंत हांकां शाबासकी.
ओपिनीयन पोल डे वा जनमत कौल म्हणल्यार कितें हाची म्हायती आयचे पिळगेक आनी फुडाराक पासून आसूंक जाय. ते खतीरूच आमची मागणी आशिल्ली हो दीस सरकारी पावंड्यार मनोवंक. आमचें सपन साकार जालें. गोंय जरी 19 डिसेंबर 1961 दिसा पुर्तुगेज राजवटकेंतल्यान मुक्त जाल्लें, तरी खऱ्या अर्थान तें मुक्त जावंक नाशिल्लें. कांय विकृत शक्ती गोंय महाराष्ट्रांत घालून गोंयची अस्मीताय ना -नपयत करपाचें कारस्थान करताल्यो. महाराष्ट्रवादी गोमंतक पक्ष हो तेच खातीर घडयिल्लो असो जायत्या राजकी मनशांचो दावो आसा. तांची मागणी आशिल्ली गोंय महाराष्ट्रांत विलीन करूंक जाय म्हण. पूण निश्ठावान गोंयकारांनी तांकां विरोध केलो. ह्या विरोधाचो आवाज केंद्र सरकारा मेरेन व्हरचो पडलो आनी केंद्र सरकारान 16 जानेवारी 1967 दिसा गोंय वेगळें उरचें वा महाराष्ट्रांत विलीन करचें हें थारावंक गोंयांत इतिहासीक जनमत चांचणी हाडली.
लोकांनी दिल्ल्या मतांक लागून गोंय महाराष्ट्रांत विलीन जावपा पासून वाटावलें. फकत साडे पांच टक्के मतांचो फरक आशिल्लो. हीं साडे पांच टक्के मतां गोंयकारांक पेजेक लायतलीं आशिल्लीं. महाराष्ट्रवादी गोमंतक पक्षान 1,38,170 मतां ‘फुल’ निशाणे खाला एकठांयलीं जाल्यार डॉ. जॅक द सिकेराच्या ‘दोन पानां’- नी 172,191 मतां मेळयलीं आनी गोंय साल्वार जालें. खरें म्हणल्यार विलीनीकरण मागप्यांक आमी कितें म्हणूंक फावो? 1967 वर्सा गोंय साल्वार जाल्लें म्हणुनूच तर कोंकणी गोंयची राजभास जावंक पावली, गोंयाक घटक राज्याचो दोर्जो मेळ्ळो आनी आमकां मुख्यमंत्री धरून पुराय मंत्रीमंडळ फावो जालें. ना जाल्यार गोंय महाराष्ट्राचो एक जिल्हो जावन उरतलें आशिल्लें आनी आमचेर मंत्री न्हय एक कलॅक्टर राज चलयतलो अशिल्लो. हेच खातीर हो दीस गोंयची अस्मिताय आनी लोकशाय मूल्यांचें प्रतीक मानतात.ही इतिहासीक याद म्हण गोंयकार त्या दिसा अस्मिताय दीस म्हण खासगी रितीन मनोवंक लागले. दाल्गादो कोंकणी अकादेमी धरुन आनीकूय हो दीस राज्यभर सरकारी पावंड्यार मनोवचो म्हूण मागणी करीत आशिल्ले.
आखरेक भौसाची मागणी पुर्ण जाली. ह्या ओपिनीयन पोल दिसाचो शिल्पकार डॉ. जॅक सिकेरा खऱ्या अर्थान जिखलो. तसो तो एकलो नाशिल्लो, ताचे बराबर अनिकूय फुडारी आशिल्ले, त्या सगळ्यांचे आमी उपकार मानूंक जाय.
हालींच जाल्ले दाल्गादो कोंकणी अकादेमीचे साबार वांगड्यांचे बसकेंत गोंय सरकारन जनमत कौल दीस सरकारी पावंड्यार मनोवंचो अशें मानून घेतिल्ल्यान, सरकाराचें अभिनंदन करपी थाराव मानून घेतलो. ओपिनीयन पोला वरवीं गोंय महाराष्ट्रांत विलीन जावपाचें उरलें, जाल्यार पासून गोंयांक किकोंत करपी वृत्तीचे लोक अजून गोंयांत आसात. डॉ. जॅक सिकेरा आनी ताच्या सांगात्यांनी नीज गोयकारांक जागयले आनी तांकांच लागून गोंय शाबूत उरलें. हो अस्मिताय दीस खासगी पावंड्यार मनयताले, तो दीस आतां सरकारी पावंड्यार मनयतले ही एक व्हड गजाल. कांय संस्थांनी आनी कांय व्यक्तीनीं राखून दवरिल्लें ह्या दिसाचें म्हत्व यशाक पावलें. ओपिनीयन पोल जिखिल्ल्याचें निमीत सादोवन आतां तरी डॉ. जॅक सेकेराचो पुतळो विधान सभा संकुलांत उभारूंक सरकार पावलां मारतले अशी आस्त बाळगुंया.
—-
– विन्सी क्वाद्रूस, राय, साश्ट
मो. – 9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
