भांगरभूंय | प्रतिनिधी
चॅम्पियन्स ट्रॉफींतले गट पांवड्या वयली निमाणी मॅच आयज भारत आनी न्युझिलॅण्ड ह्या पंगडां मदीं जातली. दोनूय पंगड सेमी फायनलींत पावल्यात. पूण, हे मॅची वरवीं अ गटांत पयले सुवातेर खंयचो पंगड आसतलो हें निश्चीत जातलें.
भारत आनी न्युझिलॅण्ड ह्या दोनूय पंगडां खातीर ही सर्त अजून मेरेन बरी थारल्या. भारतान आपले पयले मॅचींत बांगलादेशाक जाल्यार दुसरे मॅचींत पाकिस्तानाक हारयला, जाल्यार न्युझिलॅण्डान पाकिस्तान आनी बांगलादेशा आड जैत जोडलां.
भारत आनी न्युझिलॅण्ड ह्या पंगडां मदीं अजून मेरेन 11 आयसीसी वन डे सर्तींनी मॅची जाल्यात. संवसारीक वन डे क्रिकेट सर्तींत भारत आनी न्युझिलॅण्ड पंगड 5-5 मॅची जिखल्यात. 2023चे संवसारीक वन डे क्रिकेट सर्तींत ते दोन खेपे एकामेका आड खेळिल्ले. एकदा गट पांवड्यार आनी एकदा सेमी फायनलींत. दोनूय खेपे भारतानूच जैत जोडिल्लें. चॅम्पियन्स ट्रॉफींत फकत ते अजून मेरेन एकूच मॅच एकामेका आड खेळ्ळ्यात. 2000चे फायनलींत भारताक हारोवन न्युझिलॅण्डान वस्तादपण मेळयिल्लें.
दुबय अजून मेरेन दोन मॅची जाल्यात आनी दोनूय खेपे खंयच्याच पंगडाक 250चो आंकडो हुपपाक जमूंक ना. बांगलादेशान भारता मुखार जैता खातीर 229 धांवड्यांची मोख दवरिल्ली, जाल्यार पाकिस्तानान 242 धांवड्यांची मोख दवरिल्ली. दोनूय मॅची भारतान सहज जिखिल्ल्यो. दुबयची खेळपट्टी स्लो आनी स्पिनरांक मजत करपी आसा.
दुसरे वटेन न्युझिलॅण्डान आपल्यो दोनूय मॅची पाकिस्तानांत खेळ्ळ्यात आनी दोनूय मॅचींनी बॅट्समनांक मजत करपी खेळपी तांकां मेळिल्ली. चॅम्पियन्स ट्रॉफी पयलीं पाकिस्तानांत तिरंगी माळ जाल्ली, तातूंत न्युझिलॅण्ड तीन मॅची खेळिल्लो. न्युझिलॅण्डाक स्पिनरांक मजत करपी खेळपट्टीचेर बॅटींग करतना त्रास जावुये. पूण, तांचे कडेन मिचेल सॅण्टनर, मायकल ब्रेसवॅल आनी ग्लॅन फिलिप्स आसा. हे स्पिनरांक मजत करपी खेळपट्टीचो बरे तरेन उपेग करतात. कांय म्हयन्यां पयलीं न्युझिलॅण्डाचो पंगड भारताचे भोंवडेर आयिल्लो. त्या वेळार ताणें भारताक टॅस्ट माळेंत 3-0 अशा फरकान हारयिल्लो.
सेमी फायनलींत सुवात मेळयल्या उपरांत भारत आपल्या मुखेल खेळगड्यांक विसव दिवपाचो विचार बी करता व्हय असो प्रस्न पत्रकारांनी लोकेश राहुलाक विचारिल्लो. हाका जाप दितना ताणें म्हणलें की पंगडांत बदल करपाची शक्यताय उणीच आसा.
खेळगड्यांक तंदुरुस्तीची कसलीच समस्या ना. ताका लागून न्युझिलॅण्डा आडचे मॅचींत कसलो बदल करपाची शक्यताय ना अशें ताणें मुखार म्हणलें.
दुसरे वटेन न्युझिलॅण्डाच्या पंगडांत लेगीत बदल करपाची शक्यताय उणीच दिसता. पूण, भारता आड फाटल्या दोन आयसीसी वन डे मॅचींनी शेंकडो मारपी डॅरिल मिचेलाक खेळोवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
