भांगरभूंय | प्रतिनिधी
नवी दिल्ली, खबरां संस्था ः अर्थीक मळार नरेंद्र मोदी हांचे चाणक्य म्हणून वळखुपी जेश्ठ अर्थशास्त्रज्ञ आनी अर्थीक सल्लागार बिबेक देब रॉय (69) शुक्रारा संवसाराक अंतरले. तांणी गरीब लोकां खातीर नवी पद्दत सुरू केली, तांच्या सल्ल्यान रेल्वेक फायदो जाल्लो. देशाचे उदरगतींत तांचो व्हड वांटो आशिल्लो. प्रधानमंत्री नरेंद्र मोदी हांच्या मुखेल अर्थीक सल्लागार मंडळाचे ते मुखेली आशिल्ले.
बिबेक देब रॉय हांचो जल्म 25 जानेवारी 1955 दिसा मेघालयांतल्या शिलाँग शारांत जालो. शिक्षण नरेंद्रपूरच्या रामकृष्ण मिशन शाळेंत जाल्लें. उपरांत तांणी कोलकातातल्या प्रेसीडेंसी कॉलेज, दिल्ली स्कूल ऑफ इकोनॉमिक्स आनी कॅम्ब्रिजयुनिव्हर्सिटीच्या ट्रिनिटी कॉलेजींत उच्च शिक्षण घेतलें. पुण्यांतल्या गोखले इन्स्टिट्यूट ऑफ पॉलिटिक्स अँड इकोनॉमिक्स हांगा कुलगुरू पदाचेर तांणी काम केलें. प्रधानमंत्री नरेंद्र मोदी हांणी नियोजन आयोगा बदला नीति आयोगाची थापणूक केली तेन्ना तांका तांतूत वांगडी केलो. उपरांत ते मोदी हांच्या अर्थीक सल्लागार मंडळाचे अध्यक्ष जाले. अर्थीक मळार ते मोदी हांचे चाणक्य आशिल्ले. बिबेक देब रॉय अर्थशास्त्रज्ञ आशिल्ले. तशेंच अर्थ मंत्रालयाच्या ‘अमृत काल’ मुळाव्या साधनसुविधा वर्गीकरण आनी अर्थीक फ्रेमवर्कतल्या तज्ञ समितीचे अध्यक्ष आशिल्ले. गेम थिअरी, अर्थीक सिद्धांत, उत्पन्न आनी समाजीक असमानता, गरिबी, कायदो सुदारणा, रेल्वे सुदारणा आनी इंडोलॉजी आदी मळार देब रॉय हांणी म्हत्वाचे योगदान दिला. यूएस- इंडिया बिझनेस समिट वतीन जीवनगौरव पुरस्कारान तांचो भोवमान केलो. तशेंच ऑस्ट्रेलिया इंडिया चेंबर ऑफ कॉमर्सान तांचो जीवनगौरव पुरस्कार दिवन भोवमान केलो.
बिबेक देब रॉय हे एक लेखकूय आशिल्ले. तांणी जायतीं पुस्तकां बरयल्लीं. महाभारत, रामायण आनी भगवद्गीता हांचो तांणी संस्कृतांतल्यान इंग्लीशींत अणकार केलो.
प्रधानमंत्री नरेंद्र मोदी हांणी दुख्ख उक्तायलां. बिबेक हांणी आपल्या वावरांतल्यान भारताच्या बौध्दिक मळार व्हड कामगिरी केल्या अशें मोदी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
