भांगरभूंय | प्रतिनिधी
बोगद्यांत आडकल्ल्या कामगारांची मागणी
देहराडून, खबरां संस्था : उत्तरकाशीच्या सिलक्यारा बोगद्यांत आडकल्ल्या 40 कामगारांक जेवणा परस ऑक्सिजनाची चड गरज आसा. ह्या कामगारांनी ऑक्सिजनाची अखंड पुरवण करपाची मागणी केल्या. मजत पंगडाचे कर्मचारी कामगारांच्या सतत संपर्कांत आसात. मजगतीं, भायर आशिल्ल्या कामगारांनी आतां आंदोलन सुरू केलां.
एसडीआरएफ कमांडंट मणिकांत मिश्रा हांणी वॉकी टॉकी वरवीं कामगारां कडेन उलोवप केलें. बोगद्यांत 40 कामगार आडकल्यार 70 वरां परस चड काळ जाला. कामगारांक वाटावपाचे यत्न दीस रात चालू आसात. मंगळारा कामगारां कडेन संपर्क जावंक नाशिल्ल्यान सगळेच भियेल्ले. पूण पीआरडी जवान रणवीर सिंग चौहान हांणी रातच्या 11 वरांचेर संपर्क जाल्ल्याची म्हायती दिली. त्या कामगारांक पत्रा वरवीं संदेश धाडला. भितर जेवण धाडटाले तें कामगारांक पावता. आतां तांणी आॅक्सिजनाची मागणी केल्या. तांकां ती सतत दिवपा खातीर झुजा पांवड्यार काम चालू आसा.
एनएचआयडीएसीएल कंपनीक ह्या बोगद्याची जापसालदारकी सरकारान दिल्या. ह्या बोगद्याचें बांदकाम नवयुग कंपनीक सोंपयलां. एनएचआयडीसीएलचे कार्यकारी संचालक कर्नल संदीप सुधेरा हांणी सांगलें, बोगद्या भितरल्यान 21 मिटरां मेरेनचो कोळसो काडला. अजूनय 19 मिटर मेरेन उरला. आडकल्ले सगळे लोक सुरक्षीत आसात. यंत्रान बोगद्यांतली माती वा कोळसो काडटना रोखडोच वण्टींचेर काँक्रिटाचो शॉटक्रीट फवारतात. हाका लागून कांय काळा खातीर माती कोसळप उणे जाता. उत्तरकाशीचे मुखेल कार्यकारी अधिकारी प्रशांत कुमार हांणी रातच्या वेळार आमचो मजुरां कडेन संपर्क जाल्लो, अशें सांगलें.
ज्या पायप लायनींतल्यान उदक आनी आॅक्सिजन पुरवण जाता, ताचे वरवींच एनएचआयडीसीएल कडेन संपर्क करपाचो आमी यत्न केलो. भितरल्यान सांगलें, तें बरें आसा. कामगारांतलो फक्त एकलो उत्तराखंडांतलो. उरिल्ले बिहार, अस्तंत बंगाल, उत्तर प्रदेश, झारखंड, ओडिशा आनी हिमाचल प्रदेशांतले आसात.
उत्तरकाशीचे पुलीस अधीक्षक अर्पण यदुवंशी हांणी सांगलें की, बोगद्याचो वयल्या भागाचो सुमार 50 मिटर भाग कोसळ्ळो, जो प्रवेशदारा सावन सुमार 200 मिटर अंतराचेर आसा.
प्रधानमंत्र्यान म्हायती घेतली
अपघाता उपरांत प्रधानमंत्री नरेंद्र मोदी हांणी उत्तरकाशींतले घडणुकेची म्हायती मुख्यमंत्री पुष्कर सिंग धामी हांचे कडल्यान घेतली. प्रधानमंत्र्यान मुख्यमंत्री धामीक शक्य तितली मजत मेळटली अशें आश्वासन दिलें. हे घडणुके उपरांत आपूण सतत अधिकाऱ्यांच्या संपर्कांत आसा अशें धामी हांणी सांगलें.
बसकेक लागून आडमेळीं
कामगारांक भायर काडपाचे यत्न चालू आसात. पूण थळाव्या फुडाऱ्यांनी दुर्घटनेचे सुवातेर परत परत भेट दिल्ल्यान मदतीच्या कामाक आडमेळीं येतात अशें जनसंपर्क अधिकारी जी. एल. नाथान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
