जेवणावळ

भांगरभूंय | प्रतिनिधी

आ”तां वचत थंय कॅटरिंग चो वेवसाय नेटान चलता, आनी चलुंकच जाय…. बरो कॅटरर म्हणून तुजें नांव जाल्लें आसत, जाल्यार तुका जेवपाक वेळ मेळपाक ना, इतलो वेवसात गोंयांत आसा” अशें म्हजो एक कॅटरर इश्ट म्हाका सांगतालो. गोंयच्या लोकांक चडशे गोंयचे पद्दतीन रांदिल्लें जेवण चड घोसताक वता. सुंगटांचें हुमण केल्यार तातूंत बिमलां, तोरां, मुळो, हें मिश्रण गोंयकारांक जायच जाय.
ताज्या फडफडीत बांगड्याच्या हुमणांक आलें आनी हरवीं तेफळां रूच हाडतात. बारीक ताल्ले, पेडवे हांचें केल्लें सुकें फाय स्टार हॉटेलांतल्या रेसिपीक फाटीं उडयता. तांबड्या बुंद सोलांचें केल्लें तिवळ तर जिरवणेक एकदम रामबाण उपाय.
सुकें खोबरें घालून केल्ली आनी गांवठी मसालो वापरून केल्लें मटण, चिकन आनी मोरयेची शागोती लोक मिटके मारुन खातात, त्रुप्त जावन वतात. हाचे वांगडा गोंयच्या पदेरान केल्ले उणे, पोळयो, कात्र्याचे पाव आनी वांगडा गांवठी उकड्या तांदळाचें शीत म्हळ्यार मुदयेर थीक कशें.
अशेच एक जेवणावळ, फाटल्या आठवड्यांत आमकां पेडण्यां हांगां अणभवपाक मेळ्ळी. म्हज्या इश्टाच्या सोयऱ्यांगेर आयतारा सांजवेळेचेर एक रिसॅप्शन पार्टी आशिल्ली. मोजक्याच 50 ते 60 लोकांक आपयल्ले. घरा भायर आंगणांत बसका लायिल्ली आनी आंगणाच्या एका कोनशाक बऱ्याच वर्सां पयलींच्या आंब्याच्या झाडा पोंदां बुफे टेबल लागिल्ले.
थंड वारें व्हांवतालें, सरभोंवतण एकदम रोमँटिक भासताली, पिठूर चान्न्यान सुंदर अशा धर्तरेक आपल्या शितळ उजवाडान न्हावंक घातिल्ली. आनी अशा ह्या सुंदर फाटभुंयेचेर हळु आवाजांत पंकज उधास, जगजीत सिंग आनी गोंयची नायटिंगेल लोर्ना हांची सुरेल आवाजांतली मॅहफिल रंगार आयिल्ली. तांच्या घराच्या सकयल नितळ अशा उदकाचो व्हाळ व्हांवता. आंगणांत बसून चान्न्या रातीं व्हांवत्या उदकाचो आवाज आयकप म्हळ्यार, दिग्गज गावप्यांची संगीताची मैहफील आयकल्ल्या सारकें…
घडयाळीचो कांटो फुडें फुडें धांवूंक लागलो. रांदचे कुडींतल्यान घमघमीत आनी झणझणीत रॅसिपींचो वास पोटाची भूक आनीक चाळवयतालो. नामनेच्या कॅटरराक तांणी जेवणाची ओर्डर न दिता, वाड्यावेलीं चार बायलां एकठांय येवन, आपले काळीज ओंपून, लांकडांच्या चुलीर रांदिल्लें हें डिनर खंयचेंय कॉन्टीनॅन्टल, चायनीज, ना जाल्यार थाई जेवणा कडेन तुळा जावपाक ना, इतलें सुवादीक जाल्लें.
सुक्या बांगड्यांची आनी सुंगटांची किस्मुर, नाल्लाची आनी सोलांची कडी आनी पणसाचो कुवलो आनी बोणयेचे भाजये वांगडाच गोडशें म्हणून शेवयांची खीर, शिवराक जेवतल्यांक वडयांचो रोस आनी अळसांद्याचें तोणाक, अशें गोंयचें जेवण. मातयेच्या कुळण्या पोंदां तणाच्यो चुमळी करुन मातयेच्या कुयण्यांनी हीं जेवणां सोबयिल्लीं. नाल्लाच्या कट्टेचे दवले जेवण वाडून घेवपाक दवरिल्ले.
चार बायला एकठांय येतात आनी तुमकां जायतें आनी जायतशें अस्सल गोंयचे पदार्थ करुन दितात. एक बायल दिसाक 1200/- ते 1500/- रुपये जोडटा, पूण खावप्यांक त्रुप्त करुन उडयता. तांचें इतलेंच की, एकदां जेवण केलें की तांचें काम जालें. रांदचे कुडी भायर तीं पावल काडिनात.
सध्या ‘गोवन फिश थाली’ आनी गोवन चिकन, मटण शागोतीच्या नांवावेल्यान जो बाजार भायल्या भय्या आनी उडुपी लोकांनी, आपल्या हॉटॅलांनी मांडला, तो पळयत जाल्यार कपलार हात मारपाचो. आमच्या गोंयच्या बरें आनी सुवादीक रांदपी बायलांक आमी हात दीत जाल्यार, जेवणय कमी पयशांत आनी बरें मेळटलें आनी तांचीय अर्थिक उदरगत जातली.
खबर काडत जाल्यार दरेक गांवांत अशीं रानपी बायलां आसतलीं. फकत, अशिक्षितपणा आनी लजेक लागून तीं आपल्या वेवसायाचें मार्केटींग करुंक शकनात. तांकां योग्य अशी संद मेळत जाल्यार, तीं बायलां गोंयचें चडशें मार्केट आपल्या पदरांत घालूंक शकतात हातूंत मात्तुय दुबाव ना.

एकनाथ सामंत