जेम्स अॅण्डरसन जातलो निवृत्त

भांगरभूंय | प्रतिनिधी

इंग्लंडाच्या क्रिकेट पंगडाचो फास्ट बॉलर जेम्स अॅण्डरसन टॅस्ट क्रिकेटींतल्यान निवृत्त जातलो. अॅण्डरनसान काल सोशल मिडियाचेर निवृत्तीची घोशणा केली. 10 जुलयाक वॅस्ट इंडिजा आड लॉर्ड्स मैदानाचेर तो आपली निमाणी टॅस्ट खेळटलो. जुलय म्हयन्यांत तो 42 वर्सां पिरायेचो जातलो.

इंग्लंडाचो मुखेल प्रशिक्षक ब्रॅण्डन मॅकुलमा कडेन चर्चा केल्या उपरांत अॅण्डरसनान निवृत्तीचो निर्णय घेतलो. अॅण्डरसनाक मेळपाक मॅक्युलम न्युझिलॅण्डांतल्यान इंग्लंडाक गेल्लो.

पंगड फुडारा कडेन पळोवपाक लागला आनी 2025-26 अॅशेस माळे खातीर पंगड तयार करपाक सोदता अशें मॅक्युलमान ह्या वेळार अॅण्डरसनाक सांगलें.

वर्साचे सुरवातीक अॅण्डरसन भारताचे भोंवडेर आयिल्लो. त्या वेळार ताणें 700 टॅस्ट विकेटींचो पांवडो हुपिल्लो.

अॅण्डरसनान 2003त झिम्बाब्वे आड लॉर्ड्स मैदानाचेर टॅस्ट पदार्पण केल्लें. तेन्ना सावन आतां मेरेन तो 187 टॅस्टी खेळ्ळा. ह्या कालावधीत 348 डावांनी 26.53चे सरासरीन 2.79चे इकोनॉमीन 700 विकेटी घेतल्यात. टॅस्टींत एका डावांत 32 खेपे पांच विकेटी आनी मॅचींत तीन खेपे 10 विकेटी घेतल्यात.

टॅस्ट क्रिकेटींत सगल्यांत चड विकेटी घेवपाचे वळेरेंत श्रीलंकेचो मुथय्या मुरलीधरन (800) पयले सुवातेर आनी ऑस्ट्रेलियेचो शेन वॉर्न (708) दुसरे सुवातेर आसा. ताच्या उपरांत अॅण्डरसनाचो क्रमांक लागता.

टॅस्टी खेरीत अॅण्डरसनान 194 वन डे आनी 19 टी-20 मॅचींनी इंग्लंडाचें प्रतिनिधित्व केलां. वन डे क्रिकेटींत 269 आनी टी-20त 18 विकेटी घेतल्यात. ताणें आपली निमाणी वन डे मॅच 2015त आनी निमाणी टी-20 मॅच 2009त खेळिल्ली.