भांगरभूंय | प्रतिनिधी
बंदर प्राधिकरणान धाडिल्ले नोटीसीक लागून भाविकां मदीं बोवाळ: मंत्री श्रीपाद नायक हांची घेतली भेट
वास्को: जेटी-मुरगावच्या श्रीराम भक्त हनुमान मंदिर समितीक मुरगांव बंदर प्राधिकरणान धाडिल्ले कोर्ट नोटिशीक लागून भाविकां मदीं बोवाळ निर्माण जाला. हे विशीं समितीच्या पदाधिकार्यांनी आनी ग्रामस्थांनी केंद्रीय उर्जा राज्यमंत्री श्रीपाद नायक हांचीभेट घेतली.
ह्या वेळार मंत्र्यांनी हे विशीं लक्ष घालून उपाय काडपाचें आस्वासन दिलें. तशेंच थंय बांदकाम सुरु आसल्यार, फुडलो निर्णय येवचे पयलीं तें बेगोबेग थारावचें, अशें तांणी संबंदितांक सांगलें.
जेटी मुरगांवां फाटल्या ७० वर्सां परच चड काळ मेरेन श्री राम भक्त हनुमान मंदीर आसा. आदीं हें देवूळ घुमटी स्वरुपांत आसतना तेन्नाचे उपजिल्लोधिकारी राजीव तलवार हांणी ही घुमटी काडपाचो यत्न केल्लो. रस्त्याच्या रुंदीकरणा खातीर ही घुमटी काडपाची गरज आशिल्ल्याचें तेन्ना स्पश्ट केल्लें. तेन्ना ग्रामस्थांनी विरोध केल्ल्यान हो निर्णय फाटीं घेतिल्लो. उपरांत थंय आशिल्ले १२०० चौरस मीटर मेकळे सुवातेर घुमटीचें रुपांतर देवळांत केलें. ही सुवात सरकाराची आशिल्ल्याचें ग्रामस्थांचें म्हणणे आसा. तशेंच एमपीटीन हे सुवातेर देवळाचें बांदकाम करपाक हरकत घेतिल्ली. तेन्नाय ग्रामस्थांनी केंद्रीय राज्यमंत्री श्रीपाद नायक हांची भेट घेवन तांचे मुखार हो प्रस्न मांडिल्लो. तेन्ना मंत्री नायक हांच्या यत्नांक लागन देवून सुरक्षीत उरलें आनी उरिल्लें बांदकाम पुराय जाल्लें.
आतां देवळाचें आनीक बांधकाम सुरु जाल्ल्यान मुरगांव बंदर प्राधिकरणान कोर्ट नोटीस धाडल्या. हाका लागून समितीचे पदाधिकारी, वांगडी आनी ग्रामस्थांनी श्रीपाद नायक हांची भेट घेवन ह्या प्रस्नाचेर कितेंय उपाय काडपाची मागणी केली.
ग्रामस्थां वांगडा आदले मंत्री मिलिंद नायक, प्रभाग क्रमांक पांचचे नगरसेवक दामोदर नायक आशिल्ले. हे समस्येचेर आपूण मुरगाव बंदर प्राधिकरणाच्या अध्यक्षा कडेन चर्चा करून योग्य मार्ग काडपाचो यत्न करतलों अशें श्रीपाद नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
