भांगरभूंय | प्रतिनिधी
खबरां संस्था
नवी दिल्लीः दिल्लींतल्या अरुण जेटली स्टेडियमाचेर आयतारा कासादोराचोच कास जावपाचें अजाप घडलें. वन-डे वर्ल्ड कप चॅम्पियन इंग्लंडाक अदूंच्या वर्ल्ड कप सर्तींत 69 धांवड्यांनी हारोवपाची इतिहासीक कामगिरी करून अफगाणिस्तानाच्या पंगडान सगल्यांक अजपाचो धपको दिलो. फास्ट बॉलर मुजीह उर रहमान आनी राशीद खान आनी महम्मद नबी ह्या स्पीनरांनी ही कमाल करून दाखयली आनी इंग्लंडाचो कास केलो. क्रिकेटीच्या तिनूय फॉर्मेटांत अफगाणिस्तानान इंग्लंडाचेर मेळयल्लें हें पयलेंच जैत आसा. अफगाणिस्तानात जैता खातीर दिल्लें 285 धांवड्यांचें आव्हान इंग्लंडाक झेपलें ना. 40.3 ओव्हरींत तांचे सगले बॅट्समन 215 धांवड्यांत आवट जाले आनी 69 धांवड्यांनी ताकां लजेक घालपी हार खावची पडली.
अफगाणिस्तानान दिल्ल्या 285 धांवड्यांच्या लक्ष्याचो फाटलाव करतना बळीश्ट दिसपी इंग्लंडाची बॅटींग लायनअप अफगाणिस्तानाच्या बॉलरां सामकार बाबत थारली. हॅरी ब्रुक (66) आनी डेव्हीड मलान (32) सोडल्यार इंग्लंडाचे बाकीचे बॅट्समन मुजीब, राशीद आनी नबी तशेंच नवीन उल हक आनी फारुकी सामकार तिगपाक शकले ना. पंगडाच्यो तीन धांवड्यो जाल्लो तेन्ना ओपनर जॉनी बेयरस्टोक फजलहक फारूकीन एलबीडब्ल्यू केलें. हे उपरांत इंग्लंडाची घसरगुंडी सुरू जाली. जो रूट (17), कॅप्टन जोस बटलर (9), लियान लिविंगस्टोन (10), सॅम कुरियन (10), क्रिस वोकस (9) हे हजेरी लावन गेले. आदिल रशीद (20), मार्क वूड (18), टॉप्ली (नाबाद 15) हांणी मात्सो प्रतिकार केलो पूण पंगडाक हारींतल्यान वाटावपा सारको तो नाशिल्लो.
अफगाणिस्तानान इंग्लंडाक हारोवपा खातीर वेवस्थीत गेम प्लेनींग केल्लें. ताका लागून सुरवेक सावन तें येसश्वी जायत गेलें. इंग्लंडाक 285 धांवड्यो करप कुस्तार जावचें ना अशें सुरवेक दिसतालें. मात बॉलिंगेच्या नेटार अफगाणिस्तानान जैताचे दालें आपले वटेन केलें. मुजीब उर रहमानान 51 धांवड्यांत 3, राशीद खानान 37 धांवड्यांत 3 आनी महम्मद नबीन 16 धांवड्यांत 2 विकेटी घेतल्यो. फारूकी आनी नवीन उल हक हाणी दरेकी एक विकेट घेवन ताकां जाय तसो वांगडो दिलो. अफगाणिस्तानाचो कॅप्टन शाहिदीन आपल्या बॉलरांक बरे तरेन हाताळ्ळें. जाय त्या वेळार जाय तशो बॉलिंगेंत बदल केलो आनी इंग्लंडाची बॅटींग थतरवितर केली. इंग्लंडाक हाचे पयलीं 2011 च्या वर्ल्ड कपांत आयर्लंडा कडल्यान जाल्यार 2015 वर्सा बांगलादेशा कडल्यान हार खावची पडल्ली.
2011 में आयरलैंड, 2015 में बांग्लादेश से
अफगाणिस्तानाच्यो 284 धांवड्यो
अफगाणिस्तानाचो विकेटकीपर बॅट्समन रहमानुल्लाह 57 बॉलांत 8 चौके आनी 4 सक्यांनी केल्ल्यो 80 धांवड्यो तशेंच ताणे पयल्या विकेटी खातीर इब्राहिम जादरान वांगडा केल्ले 100 धांवड्यांचे भागिदारीक लागून अफगाणिस्तानान इंग्लंडाक जैता खातीर 285 धांवड्यो करपाचें लक्ष्य दिलें. नवी दिल्लींत अरूण जेटली स्टेडियमाचेर टॉस जिखले उपरांत इंग्लंडाचो कॅप्टन जोस बटलरान अफगाणिस्ताक बॅटिंग दिली आनी तांणी 49.4 ओव्हरींत 284 धांवड्यो केल्यो.
1 आवट 114 उपरांत 190 धांवड्यो जाय मेरेन अफगाणिस्तानाच्यो 6 विकेटी पडल्यो. हशमतुल्लाह शहिदी (14), अजमतुल्लाह ओमरजई (19) आनी मोहम्मद नबी (9) ह्यो विकेटी इंग्लंडाक सवाय भितर मेळ्ळो. राशिद खानान 23 धांवड्यांची खेळी केली. तो आवट जाल्या उपरांत मुजीब उर रहमानान 16 बॉलांत 28 धांवड्यो केल्यो. इकराम अलीखिल अर्द शेंकडो (58) करून आवट जालो मात ताणे 3 चौके आनी 2 सके मारून पंगडाक 275 धांवड्यो करून दिल्यो. इंग्लंडाचो लेग स्पीनर आदिल रशीदान 3 विकेटी घेतल्यो. मार्क वूडाक 2 आनी रीस टॉप्लीक एक विकेट मेळ्ळी. पार्ट टायमर लियम लिविंगस्टन आनी जो रूटान दरेकी एक विकेट घेतली. जो रुटान हे मॅचींत 4 कॅची घेतल्यो.
गुरबाजाचो अर्द शेंकडो
रहमानुल्लाह गुरबाजान आपले कारकिर्दींतलो तिसरो अर्द शेंकडो केलो. ताच्या नांवार 5 शेंकडेय आसात. ताणे जादरान वांगडा पयले विकेटी खातीर 101 बॉलांत 114 धांवड्यो केल्यो. आदिल रशीदान जादरानाक आवट करून ही जोडी फोडली. पॉवरप्लेंत अफगाणिस्तानान विकेट दिनास्तना 79 धांवड्यो केल्यो. बरे सुरवाती उपरांत अफगाणिस्तानाचो डाव गडगडलो. तरीय इंग्लंडाक 285 धांवड्याचें लक्ष्य दिवपाक तांका येश आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
