भांगरभूंय | प्रतिनिधी
नाताल हो शब्द लातीन भाशेंतल्यान आयला. नाताली दोमिनी. क्रिस्ट्मस! इतालियन भाशेंतूंय नाताल हो शब्द आसा. जाचो अर्थ जल्मदीस. शेंकड्यांनी वर्सां आदीं रोमां शारांत, आवरेलियन पातशाया खाला, पंचवीस दिसेंबराक पागान लोक उजवाडाची परब मनयताले. त्या दिसाक ते सुर्या देवाची पुजा करताले. ताच्या फाटल्यान कोनस्तांतीन पातशाय सत्तेर आयलो. तेन्ना क्रिस्ती बरोवप्यांनी ही उजवाडाची परब म्हणल्यार जेजू क्रिस्ताच्या जल्माची परब अशी समजणी घेतली. कारण इतलेंच, जेजू क्रीस्त म्हणल्यार सताचो सुर्या. अशे तरेन उजवाडाची परब नातालांचे परबेंत बदल्ली.
कांय उमेदी खीण
ते रातीं, कांय राखणे आपल्या हिंडांक चरवाक घेवन आसले. अचकीत तांचे भोंवती लकलकीत उजवाड फांकलो. आंज बोडव्यान येवन तांकां जेजूच्या जल्माची खबर दिली. गितां-गायनां करीत, परमेश्वराची तूस्त गायत ते बाळक जेजू जल्मल्लो थंय गेले आनी बाळक जेजूक नमस्कार केलो.
तेग विद्वान आनी नखेत्र
अशें म्हणटात, दोन हजार अदीक वर्सां आदीं, ज्योतीशी म्हणल्यार विज्ञान कशें मानताले. हेच खातीर त्या काळावयले विद्वान नखेत्रांचो अभ्यास करताले. कारण ज्योतीशी नखेत्रांचेर आदारीत आसता. एके राती अशेच नखेत्र शास्त्र शिकपी मेलकियर, गसपार आनी बाल्ताझार ह्या तेग विद्वानांक मळबांत एक विचित्र नखेत्र दिसलें. हें नखेत्र म्हणल्यार जुदेव प्रजेची सुटकेची खुणां अशें खूब पयलीं जाणकारानीं बरोवन दवरिल्लें. ह्याच नखेत्रा वरवीं प्रेरीत जावन ह्या तेगूय विद्वानानीं बेथ्लेहेमाची वाट धरली. अजाप म्हणल्यार हें नखेत्र तांचे खातीर मार्गदर्शक थारलें.
हेरोद राजा
बेथ्लेहेमांत वचचे पयलीं, त्या काळार राज्य करपी हेरोद पातशायाक वचून तांणी विचारलें, ’जुदेवांचो राजा जल्मला तो खंय आसा? उदेंतेक, आमी ताचें नखेत्र पळयलां.’ तांचीं उतरां आयकून हेरोद पातशायाचेर आकांत सुटलो. (कांय जाण अशें म्हणटात, तेग विद्वान हेरोदाशीं पावले तेन्ना तो सकाळची च्याव पितालो. तांचीं उतरां आयकून ताणें घेतिल्लो च्यावेचो घोंट भंयान भायर पडलो) मळबांत उदेल्ल्या नखेत्राची ताका भिरांत नासली. त्या परस जाच्या जल्माची खुणां कशी हें नखेत्र उदेल्लें ताचे तांकां संताप आसले. हेरोदाच्या दरबारांतल्यान भायर सरतकच तेंच विचित्र तरेचें नखेत्र तांकां परत दिसलें. ताचो माग धरीत हे तेगूय विद्वान बेथलेहेमांत पावले. अजाप म्हणल्यर तें नखेत्र ज्युस्त वचून बाळक जेजू आशिल्लो त्या आसऱ्या वयर स्थीर जालें. (बाळक जेजू तांकां गोठ्यांत मेळ्ळो अशें खंयच बरयलें मेळना. पूण, घराचो उल्लेख मेळटा.)
जेजूक दिल्ल्यो भेटवस्तू
थंय भितर सरून, तेगुय विद्वानांनी बाळक जेजूक नमस्कार केलो आनी ताका अपलीं दानां भेटयलीं. धूप, भांगर आनी गंधरोस!
दर एका भेटवस्तू फाटल्यान खास अर्थ आसलो. जेजू, देवाचो पूत. ताच्या देवपणाक नमस्कार करून तांणी ताका धूप भेटयलो. भांगर ही राय कुळाची खुणां. जेजू, सर्ग आनी संवसाराचो राजा हें दाखोवंक ताका भांगर भेटयलें. जेजून मिसाची भेट घडली. गंधरोस म्हणल्यार माखणेची (एनोंयंटींग) खुणां. तशेंच तातूंत वखदी गूण आसता. म्हणटकच, केन्ना तरी सगळ्या मनशांचे सुटके खातीर जेजू खुर्सा वयलें मरण मरपाचो आसलो. अर्थान आपलीच भेट करपाचो आसलो. हेच खातीर ताका ही तिसरी भेट विद्वानांनी दिली अशें मानतात.
जेजूचें दर्शन घेवन परत येतना तो खंय जल्मला हे विशीं आपल्याकूय कळयात म्हणपाचो आदेश हेरोदान दिल्लो. जेजूचें दर्शन घेवपाची ताची इत्सा नासली, पूण तो ताका मारूंक सोदतालो. हे विशीं आंज-बोडव्यान, विद्वानाक शिटकायले आनीक ते दुसरे वटेन गेले.
हेरोदाचे संताप
नाताल! अर्थान जेजूच्या जल्माची परब. मनीस कुळाचे सुटकेचो पयलो पावंडो अशें म्हणल्यार म्हजी चूक जावंची ना. प्रमाणीक मनशा जेजूच्या जल्माची वाट पळोवन आसली. मात, हेरोदाच्या मनांत सगलोच भंय निर्माण जालो. आपल्या हातांतली सत्ता वचत म्हणपाची चिंता ताका खिणां- खिणांक सतोवंक लागलो. हेच खातीर ताणें निश्पाप भुरग्यांचो (दोन वर्सां सकयले पिरायेच्या) जीव काडपाचें क्रुर फर्मान सोडलें.
जेजूच्या जल्माचो परिणाम
जेजूच्या जल्मान गोरवां राखणे आनी तेग विद्वान खोशी जाले. मात, हेरोद भिरांतीन भरलो. जेजूच्या जल्मान आपली संवसारी सत्ता आपल्या हातांतल्यान वचत म्हणपाचीं चिंतनां ताका थार दिना जालीं. तो चवताळ्ळो. काचाबूल जालो. दोन वर्सां सकयले पिरायेच्या भुरग्यांक जितींच मारपा इतले सकयले पातळेर तो देंवलो.
नातालां निमतान आमची भुमिका
दर वर्सा प्रमाण, अंदूंय आमी नातालां मनोवंक उमेदीन तयार आसात. आमचीं घरां सजल्यांत. कुसवाराचो परमळ व-यांत भरसला. क्रिस्टमस ट्री चकचकता. गोठ्याचो देखावो बेस-बरो तयार जाला. अर्थान, जेजूक येवकार दिवंक आमी सगळ्यानीं भायली तयारी केल्या.
पूण जर समजा, जेजू खऱ्यांनीच परत एक पावट जल्माक आयलो जाल्यार?
ते गोरवां राखणे आनी तेग विद्वाना सारकी आमकां खोस जातली काय हेरोद राजा वरीं आमचेर भिरांत येतली?
ग्वादालूप डायस
8390908218
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
