भांगरभूंय | प्रतिनिधी
नवी दिल्ली, खबरां संस्था : जवाहरलाल नेहरू विद्यापीठ (जेएनयू) केन्नाच देशद्रोही नाशिल्लें वा ‘टुकडे टुकडे’ टोळयेचो भाग नाशिल्लें, अशें स्पश्ट मत विद्यापिठाची कुलगुरू शांतिश्री पंडित हांणी ‘पीटीआय’क दिल्ले मुलाखतींत स्पश्ट केलें. जेएनयूंत हाचे मुखारुय ‘मतभेद, वाद आनी लोकशाय’ सदांच चालीक लागतली, तांकां उर्बा मेळटली, अशें तांणी सांगलें. पंडित स्वता जेएनयूची विद्यार्थी आसात.
कुलगुरूचो प्रभार घेतलो तेन्ना विद्यापिठाच्या आवारांत ध्रुवीकरण जाल्लें, अशें तांणी सांगलें. तो एक दुर्दैवी टप्पो आशिल्लो. विद्यार्थी आनी प्रशासन ह्या दोगांय कडल्यान चुको जाल्यात आनी त्यो हाताळपाक नेतृत्वाक अपेस आयलें अशें मत तांणी मांडलें.
2022 वर्सा पंडितान कुलगुरूपद घेतलें तेन्ना विद्यापिठाच्या आवारांत राश्ट्रविरोधी घटक आशिल्ल्याचो 2016 वर्साचो आरोप उणो वा ना जावंक नाशिल्लो. हे विशीं विचारलें तेन्ना पंडितान म्हणलें, ‘हो एक पांवडो आशिल्लो, दोनूय वटांनी चुको जाल्यो. नेतृत्वाक ताचेर नियंत्रण दवरपाक अपेस आयलां अशें म्हाका दिसता. खंयच्याय विद्यापिठांत 10% विद्यार्थी माथेफिरू, अपुरबुद्द आसतातूच. हें फकत जेएनयूचे बाबतींतूच न्हय. हें नेतृत्वा विशीं आसा. तोकाचीं मतां आशिल्ल्या लोकांक आमी कशे हाताळटात हाचे विशीं आसा. पूण आमी देशद्रोही वा टुकडे टुकडे गँग आशिल्ले वा आसात, अशें म्हाका मात्तूय दिसना.’
संघा कडेन आशिल्ले संबंद लिपोवंक नात!
शांतीश्री पंडित हांणी आपूण राष्ट्रीय स्वयंसेवक संघा कडेन संबंदीत आशिल्ल्याचें मान्य केलें. हांवें ही गजाल केन्नाच लिपोवपाचो यत्न केलो ना वा पश्चाताप केलो ना अशें तांणी सांगलें. जेएनयूक सगळ्यांत चड ‘क्यूएस रँकिंग’ मेळोवपी दिवपी ‘संघी’ कुलगुरू असो म्हजो उल्लेख जाता तेन्ना अभिमान दिसता अशें तांणी स्पश्ट केलें. जेएनयूचें भगवीकरण करप चालू आसा, हो आरोप तांणी न्हयकारलो. विद्यापिठाच्या दिसपट्ट्या कामकाजा संबंदी केंद्र सरकारा कडल्यान कसलोच दबाव ना असो दावोय तांणी केला. एक विद्यापीठ म्हूण आमी ह्या सगळ्यां परस (भगवेकरण) वयर आसूंक जाय. ‘जेएनयू’ हें राष्ट्रा खातीर आसा, खंयचेच विशिश्ट अस्मिताये खातीर न्हय. ‘जेएनयू’ म्हळ्यार समावेशकताय आनी उदरगत. ती सदांच सात ‘डी’ खातीर भुमिका घेता, अशें हांव म्हणटा. ते डी म्हणल्यार – डेव्हलपमेंट (विकास), डेमोक्रॅसी (लोकशाय), डिसेंट (मतभेद), डायव्हर्सिटी (विवीधताय), डिबेट अँड डिस्कशन (वाद आनी चर्चा), डिफरन्स अँड डिलिबरेशन (मतभिन्नता आनी विचारमंथन).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
