भांगरभूंय | प्रतिनिधी
खबरां संस्था
मेलबर्नः ऑस्ट्रेलियन ओपन टॅनीस सर्तीक नवो चॅम्पियन मेळ्ळो. इटलीच्या जॅनीक सिनरान दादल्याचे एकोडीच्या फायनलींत रशियाच्या डेनियल मेदवेदेवाक हारोवन पयलो ग्रँड स्लॅम किताब आपल्या नांवार केलो. 22 वर्सां पिरायेच्या सिनरान पांच सेट चलिल्ले फायनलींत मेदवदेवाक 3-6,3-6,6-4, 6-4, 6-3 अशें हारयलें. 3 वरां 44 मिनटां चलिल्ले हे मॅचींत सिनर पयले दोन सेट हारल्लो. त्या उपरांत ताणे खेळाचेर वर्चस्व मेळयलें आनी सेगीत तीन सेट जिखून वस्तादपण मेळयलें. ऑस्ट्रेलियन ओपन जिखपी सिनर व्हो पयलो इटालियन खेळगडो जाला.
10 फावट ऑस्ट्रेलियन ओपन जिखपी नोवाक जोकिविचाक हारोवन सिनरान फायनलींत प्रवेश केल्लो. सिनर पयलेच फावट ग्रँड स्लॅम फायनल खेळ्ळो. हाचे पयलीं 2020 वर्सा फ्रेंच ओपनांत तो क्वार्टरफायनल, 2023 वर्सा बिम्बल्डनाचे सेमीफायनलींत आनी 2022 वर्सा अमेरिकन ओपन सर्तींत तो क्वार्टरफायनींत पावल्लो. 2008 उपरांत ऑस्ट्रेलियन ओपन जिखपी सिनर व्हो सगल्यांत तरणाटो खेळगडो आसा. ग्रँड स्लॅम जिखपी तो तिसरो इटालियन खेळगडो आसा. ताचे पयलीं 1959 वर्सा आनी 1960 वर्सा निकोला पिएट्रांगीन फ्रेंच ओपन आनी 1976 वर्सा एड्रियानो पनाटान ही सर्त जिखल्ली.
मेदवेदेव आपल्या कारकिर्दींत तिसरे फावट ऑस्ट्रेलियन ओपनाचे फायनलींत हारलो. अजून मेरेन तो किताब जिखपाक शकलो ना. 2021 वर्सा पयले खेप तो फायनल खेळल्लो आनी जोकोविचान ताका हारयल्लें. अंदू ऑस्ट्रेलियन ओपन सर्तीत 481.2 कोटी रुपयाचें प्रायज मनी आशिल्ले. पोरूचें तुळेंत तातूंत 13 टक्के वाड जाल्या. दादले आनी बायल एकोडींतल्या जैतिवंतांक सुमार 17.50 कोटी आनी उपजैतिवंतांक 9.5 कोटी रुपये मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
