भांगरभूंय | प्रतिनिधी
साडे तीनशे मिलियन अमेरिकन डॉलर इतली संपत्ती मेळ्ळी जाल्यार कश्ट करिनासतना वाडलेलो आपलो पूत ती उधळपट्टी करून वगडायतलो, अशे जॅकी चॅनाचें म्हणणें.
चान क्वाँग सांग– एका चिनी जोडप्याक 7 एप्रिल 1954 दिसा जल्मल्लो हो भुरगो आयज पुराय संवसारांत ‘जॅकी चॅन’ ह्या नांवान फामाद आसा. 1990 आनी 2000 च्या दसकांत जल्मल्ल्या आयच्या तरणाटे पिळगेक जॅकी चॅन म्हणल्यार कोण तरी एक चायनीज वा जापनीज हिरो, जो चडश्या कराटे पिक्चरांनी फायटिंग करतना पळोवंक मेळटा– अशीच सादारण तन्नी वळख ताचें नांव घेतलें काय आयकुंक मेळटा– जी ताची एक एक ‘पॉप कल्चर आयकॉन’ जाल्या, ही वळख सिद्ध करता.
जॅकी चॅन हो 1980 ते सादारण 2005 ह्या कालखंडातलो आशिया खंडातलो सगल्यात व्हड सुपरस्टार अशी वळख आशिल्लो कलाकार. 2010 उपरांत जी जॅकी चॅन हांची फिल्मां आयलीं तातूंत तांणी आपली ‘ॲक्शन हिरो’ ही प्रतिमा बदलपाचो उद्देश मुखार दवरलो आनी एक अभिनेतो म्हण अभिनयाचो कस लावपी भूमिका केल्ल्यो पळोवंक मेळटा. “न्यू पोलिस स्टोरी” हातूंत सोऱ्याच्या वेसनात बुडिल्लो पुलिस अधिकारी, “रॉबीन बी हुड” हातूंत एका ल्हान भुरग्याक पोसपाक लागून रगताचे उदक करपी तरणाटो, “ब्लीडिंग स्टील” सिनेमात आपले पसून पयस जाल्ले चलयेक अनाथाश्रमात ल्हानाची व्हड जाता तें पळोवन भावनिक जाल्लो बापूय, “द कराटे किड” ह्या 80 दसकांत गाजिल्ल्या सिनेमाचे रिमेक आवृत्तीत एका ल्हान भुरग्याक कराटे शिकोवपी एक कडक मास्तर अशो विविधतायेच्यो भूमिका करपाचे आव्हान ताणें पेलून दाखयले.
केन्नाच खलनायक साकारचोना, अशी प्रतिज्ञा घेवनय बी “1911”, “शिंजूकू इन्सिडेंट” आनी “द फॉरेनर” सारकिल्ले सिनेमांनी खलनायकी आनी पात्रांत ग्रे शेड आशिल्ल्यो वेगळ्या पद्दतीच्यो भूमिका करून आपलीच प्रतिज्ञा मोडली. आपुण फक्त एक मारामारी आशिल्ल्या सुमार ॲक्शन पिक्चरांचो मारामारी करपी सुमार दर्जाचो नायक (Average Hero) ही प्रतिमा मोडून काडपाक तो येसस्वी थारलो. हॉलिवूड सिनेमा इंडस्ट्रीक ताची दखल घेवन मानाचो ऑस्कर पुरस्कार ताच्या घरा येवन दिवपाक लायलो, अशे कर्तुब ह्या अभिनेत्यान जीवितात केल्ले आसा. पुण आयज ताचें गेल्या सांठ वर्साचें गिरेस्त दायज फुडें कोण चलयतलो, असो प्रस्न घडये चॅन हांचे मुखारच न्हय, तर तांच्या संवसारभर पसरिल्ल्या म्हज्या सारक्या कोट्यानी प्रशासकांक (fans) पडिल्लो आसा. ताचो चलो जेसी चॅन (Jaycee Chan) हाणें कसलेच मार्शल आर्ट, एक्रोबटिक वा डान्स हांचे प्रशिक्षण घेतलेले ना. अभिनय करप हातूंतय बी तो व्हडलोसो असो खास ना. “जॅकी चॅनाचो चलो” अशी प्रसिद्धी आनी प्रचारतंत्र वापरून प्रदर्शित केल्ली ताचीं फिल्मां बॉक्स ऑफिसाचेर नाकयां पडिल्ली आसात. एक गायक म्हणून तो मात्शी आपल्याची वळख तयार करूंक शकला, पुण तातुंतय बी दखल घेवपा सारके येस ताका मेळुंक ना. ताका लागून तो चॅन हाचें दायज फुडें चलोवंक शकतलो काय, हें प्रस्नचिन्न आसा.
चॅन हाका एका कायदेशीर लग्नांतल्यान जाल्लो जेसी हो औरस भुरगो. ताका एका लग्ना भायल्या संबंदांतल्यान जाल्लें चलीय बी आसा. एका मॉडेल आनी अभिनेत्री वांगडा उणे काळ चलिल्ल्या प्रेम संबंदातल्यान (लफडेच म्हणुया आमी) एक चली जाले. ते संबंद आनी अपत्य चॅनान केन्नाच स्वीकारलें ना. पुण खूब वर्सानी चॅनाक ह्या “अफेअरा”ची कबुली दिवची पडली. जॅकी चॅनाचे हें चली आयज एक तरणाटी बायल आसा, पुण बेरोजगार आसा आनी हलाखीची जीण जगता. जॅकी इतलो व्हड सुपरस्टार आसूनय केन्नाच ताका मेळपाक वचूंकना. तो ताका आपलें वारसदार म्हूण केन्नाच स्वीकारचोना. आपल्या जेसी चॅन ह्या चल्याक आपुण संपत्तीतलो वांटो दिवचोना अशे चॅन हांणी पयलींच जाहीरपणान म्हणलां. आपली साडे तीनशे मिलियन अमेरिकन डॉलर इतली संपत्ती (वट्ट चार हजार कोटी रुपया, भारतीय चलनात) मेळ्ळी जाल्यार कश्ट करिनासतना वाडलेलो आपलो पूत ती उधळपट्टी करून वगडायतलो, अशे जॅकी चॅनाचें म्हणणें. ताका पयसो जाय जाल्यार स्वता कश्ट करून, घाम गाळून जोडूनी अशे जॅकीचे विचार, जे काय प्रमाणात बरोबर आसात.
जॅकी चॅन हाणी ऍक्शन, साहसदृश्यां, कल्पकताय वापरून एका वेळार “ॲक्शन कॉमेडी” हो सिनेमाचो एक वेगळो प्रकार तयार केलो, जाच्या पावलार पावल दवरून फुडें अक्षय कुमार, शाहरुख खान, रोहित शेट्टी हे बॉलिवूड सिनेमा नट आनी दिग्दर्शक हांणी असलींच फिल्मां तयार करून तीं सुपरहिट केली. मार्शल आर्ट सिनेमांच्या ह्या बादशहाचें शरीर आयज थकलां. ताणे विसव घेवचो, अशे सांगनशे दिसता. पुण ताचे उपरांत कोण? अक्षय कुमार? वा आयच्या काळांतले विद्युत जामवाल? टायगर श्रॉफ? टोनी जा यिराम? च्ये, अजिबात ना. जॅकी चॅन हो जॅकी चॅनच. शेर्त !
– सनतकुमार फडते
70204 38469
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
