भांगरभूंय | प्रतिनिधी
पणजीः गोंय शिक्षण उदरगत महामंडळान (जीईडीसी) जुर मुक्त शिक्षणीक रिण येवजणे खातीर अर्ज मागयल्यात. राज्या भायर आनी देशा भायर शिक्षण घेवपी विद्यार्थ्यांक ही येवजण सरकारान जारी केल्या. हे येवजणे खातीर इत्सूक विद्यार्थ्यांक फुडल्या तीन म्हयन्यां भितर अर्ज करपाक मेळटा, अशी कळोवणी म्हामंडळान जारी केल्या.
अंदूचें अर्थीक वर्स २०२५-२६ खातीर जीईडीसीन नवीन जुर मुक्त शिक्षणीक रिण येवजण जाहीर करून हे खातीरचे अर्ज सीएम स्कोलर शीप पोर्टलाचेर उपलब्ध आसात. अर्जदारांनी ऑनलायन फॉर्म भरून संबंदीत कागदपत्रां अपलोड करचीं.
तशेंच हे येवजेणेच्या नुतनीकरणाचें वर्स २०२५-२६चे अर्ज जीईडीसीच्या वेबसायटीचेर उपलब्ध आसात. अर्ज दारांनी हें फॉर्म डावनलोड करून सगळे तपशील भरचे आनी गरजेचीं कागदपत्रां जोडून कामाच्या दिसांनी सकाळी १० ते दनपारां १२ वरां मजगतीं आनी दनपारां ३ ते सांजेच्या ५ वरां मजगतीं जीईडीसीच्या कार्यालयांत दाखल करचो.
नुतनीकरण तशेंच नवे अर्ज दाखल करपाची निमणी तारीख २७ फेब्रुवारी २०२६ मेरेन आसा. जर विद्यार्थी विदेशांत आसात जाल्यार ताच्या जाग्यार तांच्या पालकांनी अर्ज भरून सय करूं येता.
हे विशीं अदीक म्हायती दितना जीईडीसीच्या वरीश्ठ अधिकार्यान सांगलें, दर वर्सा गोंय सरकार जूर मुक्त रिण येवजण जाहीर करता. मात हे फावट सीएम पोर्टलाचेर अर्ज भरपाचे प्रक्रीयेक लागून अंदूं ही येवजण जाहीर करपाक कळाव जालो.
हे येवजणे वरवीं देशा भितर शिकपी विद्यार्थ्यांक पांच वर्सांच्या काळा खातीर चडांत चड १० लाखां मेरेन रिण मेळटा. दर वर्सा एक लाखांचो हफ्तो हो विद्यार्थ्यांक मेळटा. जाल्यार जे विद्यार्थी विदेशांत शिक्षण घेतात तांकां २ वर्साच्या काळा खातीर चडांत चड १६ लाख इतलें रिण मेळटा. दर वर्सा ८ लाखांचो हफ्तो तांकां मेळटा. मात तांचें शिकपाचें शुल्क १० लाख वा १८ लाख वयर आसचें न्हय, अशी म्हायती अधिकार्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
