भांगरभूंय | प्रतिनिधी
न्यूयाॅर्क, खबरां संस्था ः फाटल्या वर्सा कॅनडाचे प्रधानमंत्री जस्टीन ट्रूडो हांणी हरदीप सिंग निज्जार खून प्रकरणांत भारताचो हात आसा अशें सांगून देशाचे संसदेंत वाद निर्माण केल्लो. ते उपरांत भारत आनी कॅनडा हांचे मदले संबंद इबाडिल्ले. ते उपरांत दोनूय देशां मदीं अपेक्षीत मेळ अजून जावंक शकलो ना जाल्यार आता आनीक एक भिरांकूळ आंकडेवारी मुखार आयल्या. कॅनडांतल्यान व्हड प्रमाणांत भारतीय लोक अमेरिकेंत स्थलांतरीत जातात अशें दिसून आयलां. अंदूं फकत जून म्हयन्यांत विक्रमी संख्येनं भारतीयांनी अमेरिकेंत प्रवेश केला आनी ब्रिटनांतय स्थलांतराचे प्रमाण चड आसा.
कॅनडा सावन बेकायदेशीर रितीन अमेरिकेंत प्रवेश करपी भारतीयांचो आंकडो वाडत आसा. इंडियन एक्सप्रेसान हे संबंदी सविस्तर अहवाल दिला. ताचे प्रमाण फकत जून म्हयन्यांत गरजेचे कागदपत्र नासतना लेगीत 5 हजार 152 भारतीयांनी अमेरिकेंत प्रवेश केला. ह्या अहवालांत अमेरिकेच्या कस्टम्स आनी बॉर्डर प्रोटेक्शनाच्या ताज्या अहवालांतल्यान मेळिल्ली म्हायती दिल्या. आतां मेरेन अमेरिकेंत प्रवेश केल्ल्या भारतीयांचो हो सगळ्यांत चड आंकडो.
अमेरिका आनी कॅनडा हांचेमदीं सुमार 9 हजार किलोमीटर लांबायेची उक्ती शिम आसा. संवसारांतली ही सगळ्यांत लांब अशी उक्ती शिम मानतात. ही शिम मेक्सिको आनी अमेरिकेच्या शिमेपरस दुप्पट आनी भारत आनी चीनाच्या 3400 किलोमीटरच्या शिमेपरस तिप्पट इतली आसा.
एका वर्सात 47 टक्क्यांनी वाड…
मजगतीं, अमेरिकेच्या प्रशासनाच्या आंकडेवारी प्रमाण अंदूं जानेवारी ते जून ह्या स म्हयन्यांत कॅनडा सावन अमेरिकेंत प्रवेश करपी भारतीयांचो आंकडो 47 टक्क्यांनी वाडला. जानेवारी म्हयन्यांत हो आंकडो 2548 आशिल्लो. जून मेरेन दर म्हयन्याक 3733 इतलो वाडलो. फकत जून म्हयन्यांत 5152 भारतीयांनी बेकायदेशीर रितीन चलत अमेरिकेंत प्रवेश केलो. बेकायदेशीर रितीन प्रवेश करपी लोकांक ताब्यांत घेवप, परतून कॅनडांत धाडप वा शिमेचेर मेळ्ळ्यार प्रवेश न्हयकारप अशे उपाय अमेरिकेचें प्रशासन आपणायता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
