भांगरभूंय | प्रतिनिधी
म्हापशें : तिसवाडी म्हालांतल्या जुव्यां नवो पूल उबारपाची प्रलंबीत मागणी पुराय करची, अशी मागणी थळाव्यांनी केल्या. कितलेशेच फावटीं नवो पूल उबारपाचें आस्वासन दिवनय ही मागणी आजूनय प्रलंबीत आसा. हाका लागून ग्रामस्थांनी मंगळारा भौशीक बांदकाम खात्याच्या अधिकार्यांची भेट घेतली.
८ ते १० दिसांनी प्रत्यक्ष सुवातेची पळोवणी करून पुलाच्या प्रस्तावीत आराखड्याची (अलायनमेंट) तपासणी करतले अशें आस्वासन ह्या वेळार संबंदीत अधिकार्यांनी दिलें. जुवेंचो पोरणो पूल कांय काळा आदीं अस्थिरतेच्या कारणांक लागून ‘वाहनां खातीर अयोग्य’ (नॉन-मोटरेबल) घोशीत केल्लो. पुलाची स्थिती दिसान दीस बाबत जायत चल्लयन ग्रामस्थांनी नव्या पुलाची मागणी लावन धरल्या. हे खातीर विवीध शासकीय यंत्रणांकडेन फाटपुरवण करता.
मंगळारा कांय थळाव्यांनी म्हापश्यां सहाय्यक अभियंतो आनी कनिश्ठ अभियंत्यांची भेट घेवन प्रस्तावाच्या सद्याचे स्थिती विशीं म्हायती घेतली. अधिकार्यांनी सांगलें, प्रस्ताव प्रक्रियेंत आसा. सीआरझेड तशेंच हेर संबंदीत प्राधिकरणांची परवानगी गरजेची आसा. पुलाच्या अलायटमेंट आनी रुंदी विशीं ग्रामस्थांनी प्रस्न हाजीर केले उपरांत बेटार प्रत्यक्ष पळोवणी करपाचो निर्णय घेतलो. ह्या वेळार प्रतिनिधींनी कार्यकारी अभियंत्यां कडेन फोनावेल्यान चर्चा करून अदीक म्हायती घेतली.
थळावे गौरीश हळर्णकार हांणी, जुवें बेटाक मुखेल भुमी कडेन जोडपी पुलाच्या कामाची सद्याची स्थिती जाणून घेवपा खातीर आमी पीडब्ल्यूडी अधिकार्यांची भेट घेतली. सध्या पुलाची अवस्था बाबत जायत चल्ल्या. हाका लागून नव्या पुलाचें काम बेगोबेग हातांत घेवचें, अशी आमची मागणी आसा.
अधिकार्यांनी ८१० दिसांनी पळोवणी करपाचें आस्वासन दिलां. तशेंच प्रस्तावीत पुलाविशीं सविस्तर सादरीकरण दिवचें, अशीय आमची मागणी आसा. कारण पुलाचे देंवते लागसार (लँडिंग पायइंट) उपलब्ध सुवात मर्यादीत आसा.
मजगतीं, प्रत्यक्ष पळोवणे उपरांत पुलाच्या कामाक गती मेळटली, अशी अपेक्षा जुवेंच्या ग्रामस्थांनी उक्त्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
