भांगरभूंय | प्रतिनिधी
मुरगांव: सांकवाळे पंचायत वाठारांतल्या जुवारीनगर ‘एमईएस’ कॉलेजी कडेन वचपी रस्तो पुरायेन फोंडकुलांनी भरला. हाका लागून गाडयेकार, चलत वचपी आनी कॉलेज विद्यार्थ्यांक बरेच त्रास सोंसचे पडटात.
‘एमईएस’ कॉलेज वाठारांतले रस्ते फोंडकुलांनी भरल्यात. हाका लागून लोकांक ह्या फोंडकुलांतल्यान रस्तो सोदीत गाडी चलोवची पडटा. जुवारीनगरचो राष्ट्रीय महामार्ग ते कॉलेजी मेरेन वचपी रस्तो पुरायेन इबाडला. हाचो फटको चड करून कॉलेजींत वचपी विद्यार्थ्यांक बसता. संबंदीत विभागान विद्यार्थांची समस्या जाणून घेवन रोखडेंच कॉलेज वाठारांतल्या सगळ्या रस्त्यांचें डांबरीकरण करपाक फुडाकार घेवप गरजेचें अशें विद्यार्थ्यांनी सांगले.
फाटल्या पावसा सावन जुवारीनगर राष्ट्रीय महामार्ग ते एमईएस कॉलेज मेरेन रस्त्याची सामकी वायट वेवस्था जाल्या. रस्त्यार वाहनां आनी चलत वचप कठीण जावन पडलां. हाका लागून संबंदीत विभागान रोखडेंच ह्या रस्त्यार डांबरीकरण करपा खातीर फुडाकार घेवची, अशी मागणी विद्यार्थी, पालक आनी गाडयेकारां कडल्यान जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
