भांगरभूंय | प्रतिनिधी
इत्सुकांनी अर्ज करपा खातीर अर्ज सादर करपाक मुजतवाड
भांगरभूंय । प्रतिनिधी
पणजी : जुवारी न्हंयेंतली रेंव काडपा खातीर फकत 15 अर्ज आयिल्ल्यान खण खात्यान अर्ज सादर करपाची मुजत वाडयल्या. आतां रेंव काडपा खातीर 10 जानेवारी 2025 मेरेन ऑनलायन पद्दतीन अर्ज सादर करपाची मुजत आसा. जुवारी न्हंयेंत पांच वाठारांनी 60 परवान्यांची तजवीज आसतना फकत 15 अर्ज आयल्यात. मांडवी न्हंयेंत 47 जाणाक परवाने दिवपाची तजवीज आसा. मांडवी न्हयेंत परवान्यां खातीर 136 अर्ज आयल्यात.
मांडवी आनी जुवारी न्हंयेंत रेंव काडपाच्या परवान्या खातीर वट्ट 151 अर्ज आयल्यात. जुवारी न्हंयेंत रेंव काडपाच्या परवान्या खातीर सामके उणें अर्ज आयल्यात. आनीक अर्ज येवचें म्हूण अर्ज सादर करपाक 10 जानेवारी 2025 मेरेन मुजतवाड दिल्या, अशी म्हायती खण संचालक नारायण गाड हांणी दिली.
हाचे पयली 23 नोव्हेंबर ही अर्ज सादर करपा खातीरची निमणी तारीख आशिल्ली. हे तारखे मेरेन 151 अर्ज आयल्यात. बेगिनात बेगीन सगळे सोपस्कार पुराय करून परवाने दिवपाचे यत्न आसात. जिल्हो सर्वेक्षण अहवालांत (डीएसआर) घाळपणां आशिल्ल्याचें सांगून राज्य पर्यावरण परिणाम मोलावणी प्राधिकरणान (एसईआयआयए) रेंव काडपाचे पर्यावरणी दाखले (ईसी) दिवपाक न्हयकार दिल्लो. सर्वेक्षण अहवालांतलीं घाळपणां पयस करून परतून ते सादर करपाची शिफारस पर्यावरण मोलावणी प्राधिकरणान जिल्होधिकारी तशेंच खण खात्याक केल्ली. हीं घाळपणां पयस करून खण खात्यान नव्यान प्रस्ताव सादर केला.
मांडवी आनी जुवारी न्हंयेंत रेंव काडपाक परवाने दिवपा खातीर खण खात्यान ऑक्टोबर सावन अर्ज मागयिल्ले. अर्ज सादर करपाची मुजत सोंपल्या उपरांत आतां परतून मुजतवाड दिल्या. राज्य पर्यावरण परिणाम मोलावणी प्राधिकरण (एसईआयआयए) बसका घेवन पर्यावरणी दाखले (ईसी) दिवपा विशीं निर्णय घेता. अहवालात दुरूस्ती करून खण खात्यान पर्यावरणी दाखल्या खातीर राज्य पर्यावरण परिणाम मोलावणी प्राधिकरणाक (एसईआयआयए) नव्यान प्रस्ताव सादर केला. पर्यावरणी दाखले मेळळ्या उपरांत अर्जांक परवाने दिवपाची प्रक्रिया सुरू जातली. अर्ज सादर करपाक मुजतवाड दिली आसली तरी आयिल्ल्या अर्जांची तपासणी करून परवाने दिवपाची प्रक्रिया सुरू जातली. हाचे खातीर एसईआयआयए कडल्यान पर्यावरणी दाखलो मेळपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
