भांगरभूंय | प्रतिनिधी
जिल्होधिकाऱ्याच्या आदेशा उपरांत खात्यांच्या मुखेल्यांची धांवपळ
भांगरभूंय । गणेश जावडेकार
पणजी : जुन्ता हावस इमारत रिती करपाच्या जिल्होधिकाऱ्याच्या आदेशा उपरांत तातूंतलीं सरकारी कार्यालयां स्थलांतरीत करपाची प्रक्रिया सुरू जाल्या. इमारतींतल्या सरकारी कार्यालयांचें आल्तिनो, पोरणें सचिवालय, तशेंच सरकारी क्वॉटर्सांत स्थलांतर जातलें. इमारत 30 दिसां भितर रिती करपाच्या आदेशाक लागून सर्वसामान्य प्रशासन (जीएडी) तशेंच खात्यांच्या मुखेल्यांची धांवपळ सुरू जाल्या.
गोंय मुक्त जाले उपरांत सरकारी कार्यालयां खातीर जुन्ता हावस इमारतीचें बांदकाम जालेलें. पणजेंतली सगल्यांत उंच आनी प्रशस्त इमारत अशी हे इमारतीची वळख आशिल्ली. इमारतीच्या सव्या माळ्याचेर कार्यालयां आशिल्लीं. सगलीं मुखेल कार्यालयां हे इमारतींत खूब वर्सां सावन आशिल्ल्यान अधिकारी, कर्मचारी तशेंच सामान्य लोकांचें इमारतींत सदांच येवप- वचप आशिल्लें. सध्या हे इमारतींत 20 कार्यालयां आसात. कांय वर्सां पयलीं उदका पुरवण, नियोजन आनी सांख्यिकी, तिळारी म्हामंडळ आनी हेर कार्यालयांचें पर्वरी तशेंच हेर थळांचेर स्थलांतर जाल्लें. हाका लागून इमारतींतल्या कार्यालयांचो आंकडो उणो जायत आसलो. तरी लेगीत पंचायत, येरादारी, राजभास, भौशीक बांदकाम, खादी ग्रामोद्दोग हीं कार्यालयां आसात. हे भायर तळ माळ्याचेर सहकार भांडार, राज्य सहकारी बँके सयत दुकानां आसात. इमारत असुरक्षीत आशिल्ल्यान कार्यालयां सयत दुकानां लेगीत रितीं करचीं पडटलीं.
जुन्ता हावसांतल्या कांय कार्यालयांचें स्थलांतर आल्तिनोचेर वन भवन तशेंच कर भवन इमारतींत जातलें. रानां संरक्षक तशेंच रेंज रानां खातें आल्तिनोचेर वन भवनांत स्थलांतरीत जातलें. कांय कार्यालयां पोरण्यां सचिवालयांत वतलीं. पोरण्यां सचिवालयांत पयल्या माळ्याचेर कार्यालयां खातीर जागो आसा. पणजे मार्केटांत प्रशासकीय लवादाच्या कार्यालयांत गिरायक मंच कार्यालय व्हरपाचो प्रस्ताव आसा. कांय कार्यालयां रितीं आशिल्ल्या सरकारी क्वॉटर्सांत स्थलांतरीत करतले. सर्वसामान्य प्रशासन फांट्या कडल्यान क्वॉटर्साची पळोवणी सुरू आसा. नागरी पुरवण खातें वागळे इमारती कडेन पयलीं न्यायालय आशिल्ल्या कार्यालयांत स्थलांतरीत करपाचो प्रस्ताव आसा. कांय खात्यांच्या मुखेल्यांनी नव्या सुवातेंची पळोवणी लेगीत केल्या. तरी अजून खंयचें कार्यालय खंय स्थलांतरीत करतले, ते विशीं निमाणो निर्णय जावंक ना. खात्यांच्या मुखेल्यांनी सुवातांची पळोवणी करून मान्यताय दिले उपरांत कार्यालयां खातीर जागे निश्चीत जातले. जुन्ता हावस इमारत जीर्ण तशेंच असुरक्षीत जाल्ल्यान आपत्ती वेवस्थापन कायद्या खाला ती रिती करपाचो आदेश उत्तर गोंय जिल्होधिकाऱ्यान दिला. इमारतींत स्ट्रक्चरल दोश आशिल्ल्यान ती दुरूस्त करप शक्य जावचें ना, अशें भौशीक बांदकाम खात्यान स्पश्ट केलां.
जुन्ता हावस इमारतींत आशिल्लीं सरकारी कार्यालयां
पयले लिफ्टीच्या माळ्याचेर येरादारी, बाल विकास प्रकल्प अधिकारी, नागरी पुरवण, फास्ट ट्रॅक कोर्ट, रानां उदरगत म्हामंडळ, रेंज फॉरेस्ट कार्यालय, गिरायक तंटो आयोग, रानां जीव संरक्षक कार्यालय, राजभास संचालनायल हीं कार्यालयां आसात. दुसरे लिफ्टीच्या माळ्याचेर खादी ग्रामोद्योग, गोवा गॅझेटीयर, बायलां आयोग, उत्तर गोंय जिल्हो पंचायत हीं कार्यालयां आसात. चवथ्या लिफ्टीच्या माळ्यांचेर बांदकाम खात्याचे कार्यकारी अभियंते (इमारत), सहाय्यक अभियंते (इमारत), सहाय्यक वर्क्स सर्वेयर, कार्यकारी अभियंते (रस्ते), उत्तर गोंय जिल्हो सहकार निबंधक, सहाय्यक अभियंते (रस्ते) , गटविकास अधिकारी आनी ओम्बुडसमॅन हीं कार्यालयां आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
