भांगरभूंय | प्रतिनिधी
भांगरभूंय । प्रतिनिधी
पेडणेः मांद्रें जुनसावडो हांगा मातयेचो भराव घालून न्हंयचें पात्र पुरोवपाचो प्रकार चल्ला. आयतारा जावपी मांद्रें पंचायतीचे ग्रामसभेंत हाचेर चर्चा जावपाची शक्यताय आसा. जुनववाडो हांगा दर्या देगेर आशिल्ल्या रत्या कुशीकच्यान जुनव न्हंय व्हांवता. आश्वें हांग ती दर्याक मेळटा. हांगाच तिच्या पात्रांत मातीचो भराव घालपाचें काम चल्लां.
एका वेवसायिकांन आपल्या रेस्टॉरंटांचो विस्तार करपा खातीर सीआरझेड कायद्याचें उल्लंघन करून हें काम चलयलां अशें सांगतात. ह्या काम पर्यावरणाक बादीकारक आसा. हांगा चलपी कांय कामांक न्यायालयान स्थिगिती दिल्या जाल्यार कांय प्रकरणा सीआरझेड कडेन पावल्यांत. मांद्रेचो सरपंच अमीत सावंत हाणे न्हंयेत मातयेचो भर घालपाच्या कामाची दखल घेतल्या. हालींच सावंत हाणे पंचायत वाठारांत चलिल्ल्या बेकायदेशीर बांदकामां करतल्यांक नोटिशी धाडल्यात. तातूंत दक्षीणेचो सुपस्टार नागार्जुन हाणे केल्ल्या बांदकामाचो आसपाव आसा.
मांद्रे पंचायतीची ग्रामसभा आयतारा 22 जानेवारीक जातली. एक ग्रामस्थान न्हंयेचे पात्रांत मातयेचो भराव घालपाचो विशय ग्रामसभेंत घेवपाची मागणी केल्या. ग्रामसभेंत पंचायत मंडळ कसली भूमिका घेता हें आतां पळोवचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
