भांगरभूंय | प्रतिनिधी
मंत्रिमंडळाचे बसकेंत मुख्यमंत्री डॉ. प्रमोद सावंत हांची म्हायती
पणजी : राज्य सरकारान केंद्रीय इमारत बांदकाम महामंडळ लिमिटेड वांगडा (एनबीसीसी) समजिकाय कबलात केल्या. ते प्रमाण एनबीसीसी वतीन पणजेच्या जुंता हावज, सर्कीट हावज, सांतिनेज सरकारी क्वार्टर (प्लॉट १ आनी २) सरकारी गॅरेज, वास्को बस स्टॅण्ड हांची परत उदरगत करतले. जाल्यार प्रशासन स्तंभ नवो बांदतले. सोमारा मंत्रिमंडळाचे बसकेंत हो निर्णय जाल्ल्याची म्हायती मुख्यमंत्री डॉ. प्रमोद सावंत हांणी दिली. ह्या वेळार सार्वजनिक बांधकाम मंत्री दिगंबर कामत हाजीर आशिल्ले.
सगले प्रकल्प पीपीपी तत्वाचेर बांदतले. प्रशासन स्तंभ आनी सर्कीट हावज १०० टक्के सरकारी कामां खातीर वापरतले. जुंता हावजांतली ३० टक्के सुवात सरकाराक मेळटली. हे खातीर एफएआर मात्सो वाडोवन दितले. सरकारी क्वार्टरांतले सध्या आशिल्ले सगले फ्लॅट सरकाराक मेळटले. ताचेर केल्लें बांदकाम ६० वर्सां खातीर एनबीसीसीचे आसतलें. सगल्या प्रकल्पां खातीर सुमार अडेज हजार रुपयांचो खर्च येतलो. हो भार सरकाराचेर पडचो न्हय म्हूण पीपीपी तत्वाची निवड केल्या.
हातुंतल्या कांय प्रकल्पांची येवपी १५ ते २० दिसांनी बुन्याद घालतले. हे प्रकल्प फुडल्या दोन वर्सांनी पुराय करपाचो यत्न करतले. सध्या कांय सरकारी कार्यालयां भाड्याचे इमारतींत सुरू आसात. नवी प्रशासन स्तंभ इमारत आयले उपरांत सगलीं कार्यालयां एकेच कडेन बरेच व्हड सुवातेर येतलीं. सध्या आल्तीनचें सरकारी सर्कीट हावज मोडपाक पावलां. हाका लागून राज्यांत येवपी सरकारी सोयर्यां खातीर हॉटेल बूक करचें पडटा. नवें सर्कीट हावज आयलें काय सरकारी सोयर्यां सयत सामान्य लोकांचोय फायदो जातलो, अशें मुख्यमंत्र्यान सांगलें.
मंत्रिमंडळ बसकेंतले हेर निर्णय
पोरण्या सरकारी गाडयांची पावणी जावची ना
सरकारान १५ वर्सां पोरणीं सरकारी वाहनां फोंडेंच्या आरव्हीएसपी स्क्रॅप केंद्रांत दिवपाचो निर्णय घेतला. हे खातीर दर थारायला. हीं वाहनां बेगोबेग स्क्रॅप केल्यार राज्याक केंद्रा वतीन विशेश निधी मेळटलो. स्क्रॅपिंग प्रक्रिया बेगीन जावपाक वाहनां आरव्हीएसपी केंद्रांत दिवपाचो निर्णय घेतला, अशें मुख्यमंत्र्यांनी मुखार सांगलें.
१ हजार रोजगार निर्मिती
प्रशासन स्तंभ आनी युनिटी मॉल हें सरकारी जमनीचेर बांदतले. हाका लागून सुमार १ हजार जाणांक रोजगार मेळटलो. थळाव्यांक वेवसायाच्यो नव्यो संदी उपलब्ध जातल्यो. दोनूय प्रकल्पांक विरोध करिनासतना तांकां सहकार्य करचें अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
