भांगरभूंय | प्रतिनिधी
निविदेंतल्या आराखड्यांत ११ वे माळयेर कॅसिनोची तरतूद
पणजी : पणजेची पोरणी जुंता हावज इमारत धोको निर्माण केल्ल्यान ती मोडून नवी इमारत बांदपाचो प्रस्ताव आसा. नवे इमारतींत ११ वे माळयेर कॅसिनो खातीर सुवात निश्चीत केल्या. बांदकाम आराखड्यांत ११वी माळी कॅसिनो खातीर आशिल्ल्याचो उल्लेख आसा. हे माळयेर कॅसिनो संबंदी कार्यालय आसतलें अशी म्हायती सुत्रांकडल्यान मेळ्ळी. नवी इमारत बांदपा खातीर गोंय सरकारान एनबीसीसीकडेन सामंजस्य करारूय केला. नवे इमारतीचो बांदकाम आराखडोय तयार जाला.
११ वे माययेर सुवात कॅसिनो संबंधी कार्यालयाक दिवपाची तरतूद आसा. सुत्रांकडल्यान ही म्हायती मेळ्ळी. तरी इमारत तयार जाले उपरांत हातूंत बदल जावप शक्य आसा.
गोंय मुक्ती उपरांत सगलीं मुखेल सरकारी कार्यालयां जुंता हावज इमारतींत आशिल्लीं. पंचायत, येरादारी, नागरी पुरवण, नियोजन आनी सांख्यिक, जलस्रोत, रान खातें हीं सगलीं कार्यालयां जुंता हावज इमारतींत आशिल्लीं. वयले माळयेर ऍस्ट्रोनोमिकल ऑब्जर्वेटरीचें कार्यालय आशिल्लें. स्व. पर्सिवल नोरोन्हा हांणी ऍस्ट्रोनोमिकल ऑब्जर्वेटरीची स्थापना केल्लें. विद्यार्थी तशेंच बरेच खगोलप्रेमींचो ह्या ऑब्जर्वेटरी कडेन संबंद आशिल्लो. आतां जलस्रोत, पंचायत, नियोजन आनी सांख्यिकी, रान खातें अश्या कार्यालयांचें स्थलांतरण जालां. तशेंच इमारत मोडपाची आशिल्ल्यान इमारतींतलीं सरकारी कार्यालयां तशेंच दुकानांक स्थलांतरण करपाची नोटीक जारी केल्या. सरकारी कार्यालयां आनी वेवसायीक आस्थापनां खाली जाले उपरांत इमारत मोडपाचें काम सुरू जातलें. नवे इमारतींत सरकारी कार्यालयां नासतलीं तशेंच एस्ट्रोनोमिकल ऑब्जर्वेटरीही नासतले. ताचे सुवातेर एखादे अलिशान कॅसिनोचें कार्यालय जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
