भांगरभूंय | प्रतिनिधी
पणजी : राज्यांतल्या एमएसएमई वाठारांतल्या उद्देगांक उर्बा दिवप तशेंच तांकां मार्गदर्शन करपा खातीर गोंय चेंबर ऑफ कॉमर्स अँड इंडस्ट्री वतीन (जीसीसीआय) एमएसएमई आधार स्तंभ विभागाची स्थापना करतले. ह्या विभागाचें उक्तावण ५ मार्चाक उद्देगमंत्री मॉविन गुदिन्हो हांचे हस्तुकीं जातलें. संघटणेची अध्यक्ष प्रतिमा धोंड हांणी बिरेस्तारा जाल्ले पत्रकार परिशदेत ही म्हायती दिली. ह्या वेळार मांगिरीश पै रायकार, आशुतोष खरंगटे आनी किरण बाळ्ळीकार हाजीर आशिल्ले.
प्रतिमा धोंड हांणी, उद्देग मळार एमएसएमईचो वाटो व्हड आसा. एमएसएमई अर्थवेवस्थाय चालीक लायता. ह्या मळावेल्या उद्देगांक मार्गदर्शन करप, तांकां आनी म्हायतीची पुरवण करप, सल्लो दिवप, तांक उदरगत अश्या खुबश्या कामां खातीर हो विभाग सुरू करतले. एमएसएमई तशें नव्या उद्देजकांक घटमूट करून वेवसाय वृद्धी करपा खातीर हो विभाग मजत करतलो. शाश्वत स्टार्ट अप, रोजगार निर्मिती चालीक लावपाचें काम विभाग करतलो.
विभागाच्या अध्यक्षपदार मांगीरीश पै रायकार आसतले. संघटणेचे हेर पदाधिकारीय ह्या विभागाक मार्गदर्शन करतले. विभागा वतीन वर्सभर विवीध कार्यावळींचें आयोजन करतले. उद्देगांक सरकारी येवजण्यांची म्हायती दितले.
एमएसएमई, सरकार , उद्ेगीक मळार सहकार्य करपाचें काम विभाग करतलें. ह्या विभागाची मजत मेळपा खातीर एमएसएमई उद्देगांक जीसीसीआयच्या संकेतथळार वचून ऑनलायन नोंदणी करची पडटली, अशें धोंड हांणी सांगलें.
वेवसायाची संद
आशुतोष खरंगटे हांणी सांगलें, विभागा वतीन गोंयच्या एमएसएमईंतल्या उद्देजकांक देश तशेंच आंतरराष्ट्रीय पातळेवेल्यो वेवसाय संदी समजावन सांगतले. तांकां आंतरराष्ट्रीय पांवड्यार मेंटोरा वतीन मार्गदर्शन दितले. तशेंच तांकां ह्या मळावेल्या येसस्वी उद्देजकांची म्हायती दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
