भांगरभूंय | प्रतिनिधी
पुनीत गोएल हांचें बांदकाम सीआरझॅड क्षेत्रांत येना
पणजी: गोंय दर्यादेग क्षेत्र वेवस्थापन प्राधिकरणान (जीसीझॅडएमए) गोंयचे आदले मुखेल सचीव पुनीत कुमार गोएल हांकां थाकाय दिल्या. गोएल हांचें हळदोणेंचें बांदकाम सीआरझॅड क्षेत्रांत येना. ताका लागून ही गजाल प्राधिकरणाच्या अधिकार क्षेत्रांत येनाशिल्ल्याचें प्राधिकरणान स्पश्ट केलां. हे विशीं ट्रोजन डिमेलो हांणी कागाळ दाखल केल्ली. हाका आव्हान दितलों अशें ट्रोजन डिमेलो हांणी स्पश्ट केलां.
मेळिल्ले म्हायती प्रमाण डिमेलो हांणी हळदोण्यां सर्वे क्रमांक 36/1 हांगासरलें बांदकाम सीआरझॅड क्षेत्रांत आशिल्ल्याची कागाळ केल्ली. उपरांत प्राधिकरणान 19 मे 2025 दिसा थंयची पळोवणी केल्ली. ह्या वेळार तज्ञ वांगडी, पर्यावरण सहाय्यक आनी नियुक्त सर्वेक्षक आदीं हाजीर आशिल्ले.
प्राधिकरणान नोंद केलां की, मालमत्तेच्या दोनूय वटांनी सुलीस गेट आसात. मालमत्तेच्या दोनूय वटांनी बांद आसा. ताका लागून सीआरझॅड अधिकारक्षेत्र त्या दारां मेरेन मर्यादीत आसा. ही मालमत्ता सीआरझॅडाच्या कक्षा भायर आसा.
गोंय सीआरझॅडएमपी 2011 प्रमाण, वादग्रस्त मालमत्तेच्या दोनूय वटांनी वट्ट दोन सुलीस गेटी दाखयल्यात. ह्यो गेटी एनसीएससीएम (नॅशनल सेंटर फॉर सस्टेनेबल कोस्टल मॅनेजमेंट) वरवीं चिन्नांकीत केल्यात. 19 फेब्रुवारी 1991 पयलीं, बांदिल्लो बांद वा सुलीस गेट अस्तित्वांत आसत जाल्यार उच्च भरती रेशा (एचटीएल) बांदाच्या वा सुलीस गेटीचे रेशे मेरेन मर्यादीत उरतली. ह्या प्रकरणांत, सीआरझॅडएमपी प्रमाण सुलीस गेट अस्तित्वांत आसा. ताका लागून सीआरझॅड अधिसुचोवणी 2011 प्रमाण सीआरझॅड अधिकारक्षेत्र हे मालमत्तेक लागू जायना.
तशेंच हें क्षत्र खारफुटी बफर क्षेत्र म्हूण जाहीर जावचे पयलीं सावन अस्तित्वांत आसा. ताका लागून ह्या विशयाचो नेम ह्या बांदकामाक लागू जावचो ना. मालमत्तेच्या दोनूय वटांनी दोन सुलीस गेटी तशेंच उच्च भरतीची पातळी बांदाच्या वा सुलीस गेटीचे रेशे मेरेन मर्यादीत आशिल्ल्यान ते मालमत्तेचेर भरतीचो प्रभाव ना. हाका लागून कागाळीचेर विचार करपाचो अधिकार ह्या प्राधिकरणाक नाशिल्ल्याचें प्राधिकरणान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
