भांगरभूंय | प्रतिनिधी
भांगरभूंय । प्रतिनिधी
दिवचलः गोंय क्रिकेट असोसिएशनान (जीसीए) वन मावळिंगें हांका आंतरराष्ट्रीय क्रिकेट स्टेडयम उबारपा खातीर जी सुमार 2 लाख 95 हजार चौखण मीटर जमीन विकती घेतल्यार ती जमीन आपले मालकीची आशिल्ल्याचो दावो मावळिगें हांच्या सतेरकार वाड्या वयल्या शेतकारांनी केला. ही जमीन बोलाची धाट ह्या नावांन वळखतात. ते सुवातेर आमी पोर्तुगीज तेपा सावन शेतां करताले. मात फाटल्या कांय वर्सा सावं रस्त्यार भिरपी गोरवांक लागून आमकां शेतां करपाक आडमेळे येता. ताका लागून फाटल्या कांय वर्सां सावन शेतां रोवनात अशें ह्या शेतकारांनी सांगलां
आमी शेतां रोवनात ही संद घेवन कोणे तरी बोगस कागदपत्रां तयार करून ही जमीन गोंय क्रिकेट असोसिएशनाक विकली. हे जमनीचेर तेरा शेतकारांचो मालकी हक्क अशें ह्या शेतकारांनी सांगलां. अंदू आमी जमीन नांगरून नाचण्यांचें पीक घेतला अशी म्हायती तांणी दिली. कांय कडेन जमनीक फेन्सीग घातलीं.
बाबालो गांवकार, तुकाराम भिवा गांवकार, दिलीप गांवकार, येसो गांवकार, रावजी गांवकार, तुळशीदास गांवकारण, सीताराम गांवकार, सगुण गांवकार, सत्यवान गांवकार, रोहिदास गांवकार, रोहिदास विष्णू गांवकार, उमेश सूर्या गांवकार आनी कांय बायलांनी जमनीचेर दावो सांगून ती मैदाना खातीर दिवपचे नात अशें सांगलां,
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
