भांगरभूंय | प्रतिनिधी
चर्चा तर सगलेच कडेन सध्या क्रिकेट आनी क्रिकेटीचीच चालू आसा. दुबयंत चलपी आशिया कप क्रिकेट सर्तींत आमच्या सुर्याच्या पंगडान पाकिस्तानाक एक फावट न्हय तर दोन फावटीं अक्षरशा कसो माड्डिलो हाचे पसून पहलगामांतल्या आतंकवादी हल्ल्याचो बदलो हाचे परस कसो वेगळो आसूं येता हाचेर चर्चा थांबतना दिसना. भारतांतल्या क्रिकेट नियंत्रण मंडळाचे संयुक्त सचीव रोहन गांवस देसाय हांच्या फुडारपणा खालच्या पॅनलाक पुरायपणान हारोवन चेतन देसाय- बाळू फडके आदी चार आदल्या अध्यक्षांच्या पंगडान गोवा क्रिकेट संघटनेचे वेंचणुकेंत एकहाती सत्ता कशी मेळयली? संवसारांतली सगळ्यांत गिरेस्त खेळां संघटना म्हणून जिका पळयतात त्या भारताच्या क्रिकेट नियामक मंडळाची वेंचणूक परतून एक फावट विरोधा विणें जाल्ल्यांतूच जमा आशिल्ल्यान ताचेरुय क्रिकेट जगांत चर्चा जावप सभावीक. अब्जांनी वेव्हार करपी भारतीय क्रिकेट नियंत्रण मंडळाचे कार्यकारी समितीची वेंचणूक तर विरोधाविणें जावंक शकता जाल्यार आमच्या गोंय क्रिकेट संघटनेचे वेवस्थापकीय समितीची वेंचणूक ही आपले वैयक्तीक हेवेदावे कुशीक दवरून क्रिकेटीच्या विकासाच्या मुद्द्याचेर एकठांय येवन विरोधाविणें कित्याक जावंक शकना, हाचेर चर्चा करतना नक्कीच दिसतले. पूण आतां वेंचणूक जाल्या आनी खास करून गोंयांत पयलेच खेपे रणजी क्रिकेट खेळिल्ल्या एक अश्टताशी आदल्या क्रिकेट खेळगड्या कडेन गोवा क्रिकेट असोसिएशनाचे फुडारपण आयलां, हाचें सगळ्यांक समाधान आसा.
गोंयच्या क्रिकेटाक रणजी क्रिकेटचो दर्जो मेळचे आदीं सावन ह्या ना त्या माध्यमांतल्यान हांव गोंयच्या क्रिकेट कडेन संबंदीत आशिल्ल्यान चार- साडेचार दशकांच्या ह्या प्रवासाचो साक्षीदार म्हूण गोंय क्रिकेटाचें फुडारपण महेश देसाय सारकिल्ल्या आदल्या पयल्या दर्ज्याच्या क्रिकेट खेळगड्या कडेन गेलां, हाची खोशी जावप सभावीक. आपल्या मुखार आशिल्ल्या जायत्या आव्हानांक तोंड दिवन आतां गोंयचे क्रिकेटीक तो योग्य दिका दिवंक शकता काय ना, ह्या प्रस्नाक आतां जाप दिवप शक्य नासलें तरी क्रिकेटींत म्हणटात ते समर्पण भावनेन ताका काम करचें पडटलें. तशें जालें जाल्यार गोंयचे क्रिकेटींत आयज सगले वाट पळयतात तो बदल फुडल्या तीन वर्सांत हाडप कठीण जावचें ना. तीन वर्सां आदीं महेश देसाय हे परिक्षेंत काठार पास जाल्ले आनी फक्त तीन मतांनी ते अध्यक्षपदा पसून पयस उरिल्ले. हे खेपे महेश देसाय आनी ताच्या सगळ्या वांगड्यांक पयल्या वर्गांत म्हणल्यार सुमार साठ टक्के गूण मेळोवन पास जाल्ल्यान काम करपाक प्रोत्साहन मेळटलें हातूंत दुबाव ना, पूण विरोधकांकय चाळीस गूण आसात हें विसरनासतना काम करचें पडटलें. महेश देसाय आनी ताच्या पंगडा मुखार आयज पयलें आव्हान म्हणल्यार अर्थांतच जीसीएंत सलोख्याचें पर्व सुरू करचें पडटलें.
गोंय क्रिकेट असोसिएशनांत गटबाजीक लागून कोणाचें लुकसाण जाला जाल्यार गोंय क्रिकेटीची ही वास्तवताय न्हयकारूंक मेळची ना. गोंयचे क्रिकेटींतलो सगळो बरो आनी वायट काळ हांवें खूब बारीकसाणेन पळयला. हाचीं कारणां वेगळीं आसूं येतात, पूण आतां उण्यांत उणें भारतांतल्या क्रिकेट नियंत्रण मंडळाचो आशीर्वाद आसतना तुमी क्रिकेटाच्या विकासा खातीर स्वताक ओंपतले काय गटबाजीक संद दिवन पोरणे वाटेचेर फुडें वतले, हो व्हडलो प्रस्न आसा. वेंचणुकेचे फाटभुंयेर एकामेकांचेर आरोप करप हें नवें न्हय, पूण एकमतान मुखार वचून गोंय क्रिकेटाची उदरगत करपाचें एकूच ध्येय मतींत दवरल्यार खूब कितें साध्य जावपाक शकता आनी तें साध्य करप गोंय क्रिकेटीच्या हिताचें आसा. नवे अध्यक्ष महेश देसाय हांचे विशीं हांव एक गजाल सांगूंक शकतां की ताणें गोंय क्रिकेट कशी योग्य मार्गार दवरची हाचो अभ्यास हेरां परस चड केल्लो आसतलो आनी ते प्रमाण सक्रीय जाल्लो आसतलो. आदल्या चार अध्यक्षांचो तेंको आशिल्ल्यान ताच्या एकंदर प्रवासांत कसलेच त्रास जावपाची शक्यताय ना. देखून बऱ्याच काळा उपरांत जीसीएंत सलोख्याचें नवें युग सुरू जालें जाल्यार तें गोंयचे क्रिकेटीक बरो दीस थारतलें. भारतांतल्या क्रिकेट नियंत्रण मंडळाचे वेंचणुकेंत संयुक्त सचीव रोहन देसाय हांकां मतदानाचो हक्क दिवपा विशीं निर्माण जाल्लो वाद जायत्या जाणांक चुकीचो दिसता. हो वाद चड समजुदारपणान सोडोवपाची गरज आशिल्ली, हातूंत दुबाव ना.
गोंय क्रिकेट असोसिएशनाच्या हालींच जाल्ल्या ‘यशोगाथा’ कार्यावळींत सामान्य लोकांक जें चित्र दिसलें तें चुकीचें आशिल्लें काय अशेंच प्रत्यक्ष वेंचणुके वेळार कांय प्रमाणांत जाणवलें. क्रिकेट स्टेडियम नासतना ‘यशोगाथा’ अपूर्ण आसा अशें हांवें त्या वेळार सांगिल्लें. आतां वेंचणूक सोंपली. दोनूय पंगडांनी क्रिकेट स्टेडियम बांदपाच्या प्रस्नाचेर सैमीक रितीन भर दिल्लो, जो प्रत्यक्षांत आतां मेरेन साकार जावपाची खरी गरज आशिल्ली. देसाय-फडके पंगडान हे बाबतींत रोहन गावस देसायाचेर जो थपको दवरलो तो जायत्या जाणांक बरोबर दिसता. रोहन गावास देसाय हांणी पांच ते स म्हयने बीसीसीआयचो संयुक्त सचीव म्हणून काम करतना फकत स्टेडियम बांदपाची फायल थोडी लेगीत मुखार व्हेल्ली जाल्यार तांकां निश्चीतपणान जैत मेळपाचें. सरकार दरबारांतूय तांचें वजन आशिल्लें, पूण स्टेडियमाची फायल एक इंच लेगीत मुखार वचूंक नाशिल्ली. ताका कांय कारणां आसूं येतात, पूण विरोधकांनी ताचे भांडवल करप समर्थनीय थारलें. रोहन गावस देसाय हांकां मतदानाचो हक्क दिवंक नाशिल्ल्यान विपुल फडके हांणी मांडलेले नेम चुकीचे म्हणूंक जायनात तरी ही गजाल मुत्सदीगिरीन हाताळ्ळील्लें जाल्यार आयज जो थपको दवरला ती वेळूच येवची नाशिल्ली. म्हावळिंग्यां आपलेच जमनीचेर आंतरराष्ट्रीय स्टेडियमाची तीन वर्साभितर उबारणी, हें अध्यक्ष महेश देसाय आनी ताच्या पंगडा मुखार सगळ्यांत व्हडलें आव्हान आसा. जीसीएंत सलोख्याचो काळ सुरू करूनच हे आघाडेचेर अध्यक्ष महेश देसाय हांकां स्टेडियमाचें आव्हान पेलपाक येश मेळटलें अशें म्हणल्यार तें चुकीचें थारचें न्हय. ते खातीर महेश देसाय आनी ताच्या पंगडाक शुभेत्सा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
