भांगरभूंय | प्रतिनिधी
कणींतले तरेकवार वाक्प्रचार म्हाका खूब आवडटात. भाशेची गिरेस्तकाय ही.
जीव खेळोवप हो असोच एक सुंदर वाक्प्रचार. ताचो अणकार हेर भाशांनी जावं नजो. रिटायर जातकच वा जावंक नाशिल्ले लेगीत जीव खेळोवपाक कितें तरी भोगस्ताळे सुरू करतात.
थोडे सकाळीं फुडें च्या-रगडी जातकच, गुळयो बी घेवन, मोबायल उक्तो करून आपणाक जो जो कोयर आयला तो दुसऱ्यांगेर उडोवपाक सुरवात करतात. फॉरवर्ड करूंक लागतात. आपूण वाचिनात. मदींच बायलेन उलो मारून अमूक नुस्तें हाड, हें सांगलें जाल्यार खंयच्यान वळेरी सुरू केल्ली हें घुस्पून तेजू, विंदा, दिना, गुरू, भाई, राजू, तनया हांकां परत फॉरवर्ड करूंक लागतात. तातूंत सुविचार, फाल्तू दुबावीत म्हायती, आयुर्वेदाचेर विडीयो वरवीं उपदेश डोस, रिल्स, पचक्या जोक्सांचे विडियो असो कसलो सुको ओलो कोयर आसत सांगूं नजो.
कोण रेफॉर्माद कोंकणींत बरोवंक लागता. कोंकणी जाल्ल्यान तें छापून बी रोखडेंच येतकच ताच्या काळजाक खातकुतल्यो जातात. कोण कोण ताका तोखेतात, फुलयतात. आनीक एक मनीस कोंकणी कडेन आयलो म्हूण हें कवतूक. पुस्तक बी काड मरे म्हूण ताका चण्यां झाडार चडयतात. तो चडटाय बी. जांणी हाचें शुद्धलेखन तपासून उर्बा दिली तांकांच तो कूय कूय करता आनी छापून आयिल्ल्या कात्रण लेखांचो झेलो पुस्तक रूपान येतकच उर्बा दिवप्यांक हो सभागो विसरता. आपणाक लेखक, साहित्यीक बी समजता.
तकली कसल्या तरी उद्देगांत घालून मग्न रावप आनी मिरोवप म्हणजेच जीव खेळोवप. वेळ पासार करप. कारण येदो व्हडलो दीस. कितें तरी करूंक जाय. कर्म करीत राव अशें संतांनी सांगलां.
म्हाका मुळां सोदीत विशयाच्या खोलांत वचपाची संवय. कोंकणींत केळोवप नांवाचें एक क्रियापद आसा तें हांव जाणा. कारण कांय जाण केन्नाय तें वापरतात. उलयतना कोणूच वापरिनात. भाशा केळोवपाक भुरग्यांनी (आमी न्हय) वाचन करूंक जाय अशें अमको साहित्यीक म्हणटा. हें केळोवप कशें आयलें तें चिंतून म्हज्यो न्हिदो खळ्ळ्यो. कोंकणीच्या हुस्क्यांनी कितल्यो न्हिदो खळ्ळ्यो तांचें कोंत आनी हिशोब ना. एके रातीं हयन्हयशी न्हिद लागिल्ली. तेन्ना झळपेल्ले भशेन जालें आनी केळयलें हें केळेकार हांच्या वयल्यान आयलां आसतलें असो दिश्टावोसो जालो. कारण म्हज्या भुरगेपणांत कोंकणी हें केळेकारांचें फॅड म्हणटाले ताची याद जाली.
जीव खेळोवपाक कोण कसलीं निमतां काडीत सांगू नजो. तीं काडलीं म्हूण हरकत ना. बाकिच्यांक पिडटात. कांय रिटायर जाल्ले हाका ताका फोन करीत बसतात. पयलींच ते मोबायल खरखरतात. सारकें आयकूंक येना. फोनाचेर हाचें ताचें तासप. टायम पास हो. ट्रम्पालें धोरण, इस्रायलचें झूज, नवें मंत्रीमंडळ, गोंयच्या विधानसभा वेंचणुकांचे येन्नाच लायिल्ले अदमास, बाकीच्या मित्रांक खेपप अशे हे फोनावयले विशय आसतात. खेपप बेठेंच. पांच मिनटांनी तो मित्र भितर सरल्यार वेंग मारून ताचे कडेन मायेमोगान खबरी. लेखन बंद केल्ले लेखकूय हाचें ताचें दुस्वासान तासतात. आपणें केन्ना बाल एकांकी खड्डूना तो लेखक नाटकाचेर उलयता. ताचेर कमेंट मारता. हातूंतल्यान ताच्या अर्थान जीव खेळोवप जाता खरें पूण नेगेटीविटी केळोवप जाता. आपलेंच भितरल्लें प्रतिभेचें तेज उणें जायत रावता.
म्हज्या एका इश्टान जीव खेळोवपा खातीर आपणेंच एक उपद्व्याप सोदून काडलो. तकली चलताय बरी. आमची कॉलेजांत अमूक वर्साची बॅच आशिल्ली त्या सगळ्यांक संपर्क करपाक सुरवात केली. कॉलेजांत वचून त्या वर्साचें विद्यार्थ्यांचें लिस्ट फैदा केलें. कांय जाण फेसबूकार मेळ्ळे. बाकीचे हांगां थंय संपर्क सादून मेळ्ळे. एक संमेलन वा संमीलन दवरलें. पूण कार्यावळीक घोळणुकेंत आशिल्लेंच नांव जाय हो ताचो हट्ट. री-युनियन. तीन दशकां वयर संपर्क ना तांचें री युनियन. तें कित्या खातीर आनी तातूंतल्यान कितें निश्पन्न जातलें असल्यो गजाली प्रस्न विचारूं नाका. जीव खेळोवप हो मुळांत उद्देश. तातूंत तो संयोजक. कॉलेजांतूच प्रोग्राम दवरलो. केटरर बी ताणेंच सांगिल्लो. अर्दे विद्यार्थी पावले. चलयो म्हळ्यार आतां बायलो जाल्ल्यो त्यो थोड्यो आशिल्ल्यो. हाणें बरोड्याक फोन करून एके वर्ग मैत्रिणीक आपयल्ली. ती इंजिनियर. ती आपणाक संपर्क केला म्हणून इतली खोशी जाल्ली की कॉलेजांत तिका हर्षवायूच जायना मूं अशें दिसलें. कांय जाणांनी एकामेकांचे फोन नंबर बी घेतले. एक वॉट्सएप ग्रूप बी केलो. म्हज्या फोनांत तो कितल्यावो ग्रूप तेंच कळना जालें. संयोजक मित्र आपणाक लागून तुमी जमले ह्या झेतांत कर्तो करवितो हांवूंच अशे तरेन छाती मुखार काडून उलयतालो. संयोजकान सांगिल्ले प्रमाण पैशे सांगिल्ले ती पटी मोन्यांनी संयोजकाक दिवन आमी कडसरले. परत फुडल्या वर्सा री युनियन दवरूया अशें तो म्हणी. हांवें मोडें घालें. असलीं फित्रिकां तो जीव खेळोवंक करता अशें हांव जाणा आशिल्लों. पूण फुडें फुडें करपाक तो चटावल्लो. ताणें कॉलेजांत वचून आमच्या उपरांतच्या बॅचीचें लिस्ट घेतलें आनी तांचें री युनियन दवरपाक फुडाकार घेतलो. आपूण दिग्दर्शक, आयोजक, संघटक कसो. ह्या बोवाळांत तारातार करपाक ताचे तीन म्हयने तरी वताले. म्हणजेच जीव खेळोवपाक. ते उपरांत त्या फुडल्या वर्साची बॅच अशें सत्र ताणें सुरू केलें. म्हज्या कानार पडटालें, अमूक वर्साची बॅच ह्या एप्रिलांत. कानार खूब पडटालें. लोक कित्याय कितें उलयतात. जीव खेळयता तें बरें आसा रे, पूण पैशांचो हिशोब दुबावी उरता रे. म्हाका आरोप करतल्याची भिरभिरीच मारली. दिवपी दितात, सगळें वेवस्थीत चल्लां, तुका रे कित्याक हे दुबाव?
कोंकणींत आमी जीण हो शब्द बरयता तो म्हाका खूब आवडटा. हरशीं उलयता आसतना कोण तो वापरिना.
जीव खेळोवप म्हळ्यार निमतां काडून दीस भरप. थोड्यांक ह्या राटावळींतल्यान पयसो, प्रसिद्धी मेळटा तो बाय-प्रॉडक्ट. कोंकणी ही जीव खेळोवपाची माची न्हय. फकांडां मस्करी, तेवल्यो बावल्यो करीत जीण केळोवप समा न्हय. तियात्र खेळोवप वेगळो. नाटक खेळोवप वेगळें. जीण ही मोलादीक गजाल. जीव खेळोवचो तशी जीण फाफार्रांवपणान, अडाणीपणान वगडावपाचो विशय निखालस न्हय. भोगावळी आनी भोगस्ताळे करिनासतना जीण ही अपुरबायेन, मायेन, सुखशांतीन सजयता आनी ती ‘खेळयना’ पूण केळयता तो शाणो.
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
