भांगरभूंय | प्रतिनिधी
नेस्ले इंडिया कंपनीचो उपक्रम
फोंडें: नेस्ले इंडिया कंपनीच्या माध्यमांतल्यान फर्मागुडी फोंड्यां जीव्हीएम एसएनजेए उच्च माध्यमीक विद्यालयाच्या विद्यार्थिंनी खातीर प्रसाधनघराची वेवस्था सीएसआर येवजणेंतल्यान केली.
ह्या प्रकल्पाच्या लोकर्पण सुवाळ्याक मुखेल सोयरे म्हूण नेस्ले इंडिया कंपनीचे वेवस्थापक संजय भंडारी हाजीर आशिल्ले. तशेंच कार्यावळीचे अध्यक्ष म्हूण गोंय विद्याप्रसारक मंडळ कार्यकारी समिती अध्यक्ष कृष्णा शेट्ये, उपाध्यक्ष अशोक नागवेंकार, भांडारी प्रभात शिकेरकार, उच्च माध्यमीक विद्यालयाच्यो प्राचार्य डॉ. गीता शास्त्री श्रीपाद भट, उपप्राचार्य डॉ. विल्सन वाझ बी मानेस्त हाजीर आशिल्ले.
ह्या वेळार उलयतना कृष्णा शेट्ये हांणी म्हणलें, समाज उपेगी उपक्रम राबोवन समाजा विशीं आशिल्ली भावना ह्या भोवराष्ट्रीय कंपनीच्या कार्यांतल्यान नदरेक पडटा. विद्यालयांतल्या आदल्या विद्यार्थ्यांच्या सहभागान अशे तरेचे खूबशे उपक्रम उबे रावंक शकतात अशें तांणी म्हणलें.
नेस्ले इंडिया कंपनीचे वेवस्थापक संजय भंडारी हांणी म्हणलें, की कंपनी सीएसआर येवजणेंतल्यान विद्यार्थिंनी खातीर व्हड प्रमाणांत कार्य करीत आसा. अशा प्रकाराच्या माध्यमांतल्यान गोंयांतल्या विवीध शाळांनी विद्यार्थिंनी खातीर गरजेच्यो आशिल्ल्यो सुविधा उपलब्ध करून दिवपाक कंपनीचो भर आसा. फुडारांत ह्या मंडळाच्या विवीध शाळां खातीर येवजण राबयतले अशें तांणी म्हणलें.
प्राचार्य डॉ. गीता शास्त्री श्रीपाद भट हांणी नेस्ले इंडिया कंपनीचे उपकार मानतना संजय भंडारी तशेंच पृथ्वी वेलींगकार हांच्या विशेश सहकार्या खातीर उपकार मानले. कार्यावळीचे सुत्रसंचालन प्रा. प्रेमानंद नायक हांणी केलें. जाल्यार उपप्राचार्य डॉ. विल्सन वाझ हांणी सगल्यांचे उपकार मानले. मुखेल कार्यावळी उपरांत उबारिल्ल्या प्रसाधनघराचें फीत कापून अनावरण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
