‘जीवन’ ह्या कर्करोग आनी डायलिसिस केंद्राचें उक्तावण
भांगरभूंय | प्रतिनिधी
मुंबय, खबरां संस्था ः रिलायन्स इंडस्ट्रीजचो धनी मुकेश अंबानी हे भारतांतले सगळ्यांत गिरेस्त मनीस. गिरेस्त जावपा वांगडाच ते एक दानशूर लेगीत आसात. मुकेश अंबानी हांची घरकान्न नीता अंबानी हांणी व्हडलो निर्णय घेतला. नीता हांणी तिचो बाबा स. रवींद्रभाई दलाल हांकां समर्पीत केल्लें नवें कॅन्सर आनी डायलिसीस ‘जीवन’ ह्या केंद्राचें उक्तावण केलां.
नीता अंबानी हांणी तांचे घरकार मुकेश अंबानी हांचे हाजिरेंत ‘जीवन’ केंद्राचें उक्तावण केलें. ह्या वेळार हेर मानेस्तूय हाजीर आशिल्ले. ह्या केंद्रांत केमोथेरपी, डायलिसीस, इम्युनोथेरपी आनी हेर विशेश वैजकी सेवा मेळटली. ‘जीवन’ केंद्रांत बालरोग केमोथेरपीचेर खासा लक्ष केंद्रीत केलां. दुयेंतींचे सुरक्षे खातीर 24/7 विशेश क्रिटिकल केअर युनिट सुरु आसतलो. हाचो फायदो सामान्य लोकांक जातलो.
मुंबयंत 2000 खाटींचें हॉस्पिटल
रिलायन्स फावंडेशनाच्या 15व्या वर्धापन निमतान रिलायन्स फावंडेशनाची अध्यक्ष नीता अंबानी हांणी फावंडेशनाच्या वावराची म्हायती दिली. रिलायन्स फावंडेशन मुंबयंत आधुनीक 2000 खाटींचीं मेडिकल सिटी तयार करता अशें तिणें सांगलें. हें फकत एक हॉस्पिटल न्हय तर एआय आदारीत उपचार केंद्रय आसतलें. हातूंत आधुनीक वैजकी तंत्रगिन्यान आनी संवसारीक पांवड्यावयले दोतोर आसतले. फुडाराच्या भलायकी वेवसायिकांक प्रशिक्षण दिवपा खातीर ह्या मेडिकल सिटी वैजकी म्हाविद्यालय स्थापन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
