भांगरभूंय | प्रतिनिधी
दोशी अधिकाऱ्यांक निलंबीत करपाक जाय. पायपलायन आनी गटार वेवस्था वेगळी आसप गरजेचें.
उदकाक संस्कृतांत जीवन म्हणटात. जेवनासतना रावं येता, पूण न्हय उदका बगर. पूण सगल्यांकूच शुद्ध उदक मेळना. मागीर हें जीवन मरण थारता. इंदूरांतल्या (मध्य प्रदेश) भगिरथपुरांत (जाणें गंगा न्हंय धर्तरेचेर हाडली, अशी आख्यायिका आसा!) दुशीत उदक पियेवन काल मेरेन 15 लोकांक मरण आयलां. सयश्यां वयर लोक दुयेंत जाल्ले. तातूंतले 201 अजून उपचार घेतात. 32 आयसीयूंत! शुद्ध उदक मेळप हो प्रत्येकाचो अधिकार, तें दान न्हय. नळांतल्यान येवपी उदकूय शुद्ध ना, तर ती उदरगत कसली? आनी मध्य प्रदेशांत हें जें कितें जालां, ते इबाडिल्ल्या उदका परस सरकारी यंत्रणेच्या निश्काळजीपणाक लागून. मेल्यात ते लोक ह्या उदकाक लागूनच, असो अहवाल सरकारी वैजकी म्हाविद्यालयान दिला. आतां घडणूक घडटकच उपाय सुरू जाल्यात. पूण मेले ते गेले. लोक दोन वर्सां आरड मारताले खंय, मात पालिकेन कांयच काना- मनार घेवंक ना, अशें लोक खबरां चॅनलांच्या पत्रकारांक सांगतात. नगरविकास मंत्री कैलास विजयवर्गीय हांची एका पत्रकाराक दिल्ली, ‘क्या घंटा हो गया’, ही जापूय
व्हायरल जाल्या.
ही घडणूक फक्त इंदूरा पुरती मर्यादीत दवरून उपकारची ना. सगलेच कडेन असले प्रकार जातात. गंभीर कितें जाल्यारूच ते हेर लोकांक कळटात. संडासा पोंदच्यान गेल्ले पायपलायनींत ही गळटी जाल्ल्याचें कळटा. थंयच्यान घाणयारें उदक नळांत भितर सरलें. पायपाची आतां दुरुस्ती जाल्या. घाणयारें उदक न्हंयांनी वता, जमनींत जिरता. तातूंत मनीस, जनावरांची विश्ठा, मूत, न्हाल्लें उदक, कपडे, आयदनां, गाडयो धुंविल्लें उदक, साबू, पावडर, घर- संडास नितळ करपाक वापरतात तीं रसायनां मिस्तुराद जातात. तातूंत भिरांकूळ घटक आसतात. सगले एकठांय जाले काय ते आनीक भयंकर जातात. गटारां, संडास, कारखान्यां लागसार पायपलायन आसल्यार तें बुरशें उदक भितर वचूं येता. नेमको खंय हो प्रकार जाला, तें सोदून काडपाचें तंत्रज्ञान पालिका, पंचायतीं वा हेर सरकारी यंत्रणां कडेन आसा? मुळांत ह्यो पायपलायनी बऱ्या दर्ज्याच्यो, नितळ जाग्यांचेर घाल्ल्यो आसपाक जाय. घाणयारें उदक पिवपाच्या उदकांत गेल्यार तरातरांचे विशाणू मनशांच्या पोटांत वचूंक शकतात. तातूंतलो खंयचोय एक विशाणू जीव घेवपाक पुरो. इंदूरांतूय हेंच जालां. घडणूक घडटकच उपाय करप म्हणल्यार वराती फाटल्यान घोडो नाचोवप. मंत्री विजयवर्गीय स्कुटरी वयल्यान भगिरीथपुरांत गेले. सात कुटुंबांक 2- 2 लाखांचे चेक दिवपाचे आशिल्ले. मात कोणेंच ते घेवंक नात खंय. फाटलीं दोन वर्सां आमी उदकाची कागाळ करतात, पूण कोणूच आयकनात. हाॅस्पिटलांत पसून पयशे मागतात, अशें एके बायलेन मंत्र्याक सांगलें.
आतां सरकारान पालिके कडेन आनी मनीस हक्क आयोगान सरकारा कडेन अहवाल मागला. विरोधी पक्षांनीय हे घडणुकेचें राजकी भांडवल करपाचे यत्न चलयल्यात. प्रकरण न्यायालयांत पावलां. भगिरथपुरांत आतां लोकांनी मागणी केल्ले प्रमाण, 10 नव्यो बोअर वेल जातल्यो, अशी घोशणा खासदार लालवानीन केल्या. लोकांची मागणी पुराय करपाक दोन वर्सां कित्याक लागलीं? स्वराज्य संस्था वा सरकारी यंत्रणांनी नेमान उदकाची तपासणी करपाक नाका? लोकांनी कागाळ करूनय ‘पळोवया, करुया, जातलें…’ असलीं आस्वासनां दिवप चुकीचें. उदक फुलां येयसर तापोवप गरजेचें. ते विशीं जागृताय जाय. जाय जाल्यार तांकां फिल्टर दिवचे. दोशी अधिकाऱ्यांक निलंबीत करपाक जाय. पायपलायन आनी गटार वेवस्था वेगळी आसप हो लोकांचो हक्क. गोंयांतूय फाटीं उदकांत विशाणू आसात, असा आरोप जाल्लो. मडगांवां एके इमारतींत नळांतल्या येवपी उदकाक घाणयारो वास येतालो. सरभोंवतणचे उदका स्रोत नितळ दवरप हें काम प्रत्येकान करपाक जाय… इंदूरांतली घडणूक ही सगल्यां खातीर शिटकावणी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
