भांगरभूंय | प्रतिनिधी
27 सप्टेंबर 2025 हो दीस तामिळनाडू सयत देशा खातीर सामको दुखेस्त आनी आंगार कांटो हाडपी थारलो. राजकी फुडारी आपल्या सुवार्था खातीर व्हड प्रमाणांत गर्दी एकठांय करतात. पूण ताचो वायट परिणाम कसो जाता हे गजालीचो राजकी फुडाऱ्यांक सदांच विसर पडटा. कारण जेन्ना खंयचेय गर्दीचेर नियंत्रण दवरूंक मेळना तेन्ना खेटाखेट जावपाची चड शक्यताय आसता. आनी हीच भिरांकूळ चूक तामिळनाडूंतल्या करूर हांगा दिसून आयली आनी ताचें प्रायश्चीत दुख्खांत पातळ्ळें. अभिनेतो आनी तामिळगा वेत्री कळघम (टीव्हीके) ह्या पक्षाचे अध्यक्ष विजय थलपती हांच्या तामिळनाडूंतल्या करूर हांगाचे सभेंत 27 सप्टेंबर दिसा खेटाखेट जावन 40 लोकांक मरण आयलें जाल्यार 100 परस चड गंभीर रितीन जखमी जाले. ह्या मरण आयिल्ल्यां मदीं आठ ल्हान भुरगीं आनी 16 बायलांचो आस्पाव आसा. हे घडणुकेन पुराय देश स्तब्ध जालो.
राजकी फुडारी आपलें वर्चस्व दाखोवपा खातीर आनी स्वताच्या सुवार्था खातीर लाखांनी लोकांची गर्दी एकठांय करतात आनी ताचें प्रायश्चीत सभेक येवपी भोळे जनतेक भोगचें पडटा हाका कितलें मेरेन योग्य म्हणचें! राजकी फुडारी गर्दीचे अवलोकन कित्याक करिनात? चड गर्दी जाली जाल्यार हाचे कसले दुश्परिणाम जावंक शकतात हाचे कडेन राजकी फुडाऱ्यांची, थळाव्या प्रशासनाची आनी राज्य सरकाराची नदर कित्याक वचना? देशांतल्यो चडश्यो खेटाखेटीच्यो घडणुको ह्यो ‘आ बैल मुझे मार’ अशा प्रकारच्यो आसतात. हाचें दुख्ख पुराय परिवाराक भोगचे पडटा. ताका लागून भोळे जनतेन आनी सर्वसामान्यांनी अशा सभां पसून सादुरताय बाळगूंक जाय. कारण हाचें दुख्ख पुराय देशाक लेगीत जाता आनी सगली कडेन हळहळ उक्तायतात. कारण ही घडणूक आंगार कांटो हाडपी आसता.
राजकी फुडारी बेशरमीची शीम हुपतात. कारण करूर हांगा विजय थलपती हांचे प्रचारसभेक सुमारा भायर गर्दी जाल्ली. सभे खातीर हजारांनी समर्थक सकाळ सावन रांगेंत उबे आशिल्ले. भर वतांत आनी गर्दीक लागून खूबश्या जाणांची भलायकी खालावंक लागिल्ली आनी हाका लागून भिरांत पातळिल्ली. ह्या वेळार खूबशे जाण बेशुद्ध पडूंक लागले आनी हाचे रुपांतर खेटाखेटींत जावन खूबशा जाणांक आपलो जीव व्हगडावचो पडलो. भारतांत दिसानदीस खेटाखेटीच्यो घडणुको वाडप ही गंभीर आनी हुस्को करपी गजाल आसा. हाचेर राजकी फुडारी, थळावें प्रशासन, राज्य सरकार आनी केंद्र सरकार हांणी जातीन लक्ष दिवपाची गरज आसा.
तामिळनाडू सारकी भिरांकूळ घडणूक हाचे पयलीं 3 जून 2025 दिसा बंगळुरूंत घडली. रॉयल चॅलेंजर्स बंगळुरू पंगडान आयपीएलाचो करंड 18 वर्सां उपरांत जिखून इतिहास घडयलो. हे खातीर 4 जून दिसा बंगळुरू पंगडान मॅच जिखिल्ल्याची खोस मनोवपा खातीर चिन्नस्वामी स्टेडियमार एका व्हड सुवाळ्याचें आयोजन केल्लें. पूण ह्या स्टेडियमाची तांक फक्त 35 हजार लोकांची आसतना मर्यादे परस चड म्हणल्यार तीन लाखां परस चड लोक एकठांय जाले आनी हाका लागून मैदाना भायर व्हड प्रमाणांत खेटाखेट जावन 11 लोकांक मरण आयिल्लें आनी 30 परस चड लोक गंभीर रितीन जखमी जाल्ले. ही सामकी दुर्दैवी आनी आंगार कांटो हाडपी घडणूक चिन्नस्वामी स्टेडियम वाठारांत पळोवंक मेळिल्ली. ही घडणूक कर्नाटक प्रशासान आनी कर्नाटक क्रिकेट असोसिएशन हांच्या निश्काळजीपणाक लागून जाल्ल्याचें त्या वेळार स्पश्ट दिसून आयिल्लें. ताचीच पुनरावृत्ती आमकां तामिळनाडूंतल्या करूर हांगा टीव्हीके पक्षाचे सभेंत दिसून आयली.
तामिळनाडूंतल्या करूर हांगा भिरांकूळ आनी दुर्दैवी घडणूक कित्याक आनी कशी घडली हाची न्यायालया वतीन चवकशी जावंक जाय आनी हाका जापसालदार आशिल्ल्या पुराय राजकी फुडाऱ्यांचेर कायद्याच्या माध्यमांतल्यान ख्यास्त जावंक जाय. कारण तामिळनाडूंतली ही धक्को दिवपी घडणूक मनीसकुळयेक गंभीर जखम करपी घडणूक आसा. अभिनेतो आनी तामिळगा वेत्री कळघम (टीव्हीके) ह्या पक्षाचे अध्यक्ष विजय थलपती हांची हे घडणुके खातीर जितली निंदा जातली तितली उणीच. केंद्र सरकार, राज्य सरकार आनी थळावें प्रशासन हांकां विनंती करतां की तामिळनाडूंतल्या करूर सारक्यो घडणुको लक्षांत घेवन अशे तरेच्यो घडणुको फुडारांत परतून जावच्यो न्हय हाची जतनाय घेवंक जाय. ही घडणूक सामकी दुर्दैवी आनी दुखेस्त आसा. मरण आयिल्ल्यांक आर्गां ओंपतां आनी तांच्या कुटुंबाक हे घडणुकेंतल्यान भायर सरपा खातीर देवान तांकां शक्ती दिवं हीच देवा कडेन मागणी करतां.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
