भांगरभूंय | प्रतिनिधी
पीर्ण खून प्रकरण : मोटार धनया सयत तिगांक अटक
भांगरभूंय । प्रतिनिधी
म्हापशें : पीर्ण बार्देसच्या कपील चौधरी (19. रा. हातरस, उत्तर प्रदेश) ह्या तरणाट्याच्या खून प्रकरणांत कोलवाळ पुलिसांनी गुरुदत्त सुभाष लवंदे (31. रा. कांदोळी), डायसन डोमिंगोस कुतिन्हो (31, रा. उमतावाडा कळंगूट) आनी सुरज जोतीश ठाकूर (21, वोर्डा कांदोळी) ह्या तिगांक अटक केल्या.
भाड्यान घेतिल्ले रेण्ट अ कॅब थार जीप चोरून व्हरपाच्या दुबावा वयल्यान दुबावितांनी बांदा- सावंतवाडी कपीलाक धरून मरसर मारबडय केली. दांडे आनी खोटो मुठींनी मारपडय केले उपरांत ताका थिये दोंगुल्लेचेर घडणुकेचे निर्जन सुवातेर हाडून उडयलो. कपीलाक सोऱ्याचे घुंवळेंत मरण आयलां, अशें भासोवचे खातीर ताच्या बोल्सांत पायंट बियरीची बाटली दुबावितांनी दवरिल्ली.
कपील चौधरी हाणें रेण्ट अ कॅब जीप भाड्यान घेतना दीपक ठाकूर नांवाचें बनावट वळखपत्र सादर केल्ल्याचें पुलीस चवकशेंतल्यान उक्तें जालां.
शुक्रारा 31 ऑक्टोबराक कपील हो केळ पीर्ण आनी खरगाळी, थिवी हांचे मदीं आशिल्ले दोंगुल्ले वयल्या सड्यार हालचाल करिनासतना पडिल्लो. 108 अॅम्ब्युलन्सींतल्यान ताका म्हापशें जिल्हो हॉस्पिटलांत व्हेले उपरांत दोतोरांनी ताका मरण आयिल्ल्याचें घोशीत केलें. कपीलाचे कुडीचेर लांकडाच्या दांड्यान, खोटा मुठींनी मरसर मारबडय केल्ले वळ आशिल्ले आनी तातूंत ताका मरण आयिल्ल्याचें पुलीस तपासांत स्पश्ट जालें.
ह्या प्रकरणांत कोलवाळ पुलिसांनी तपासाची गती वाडोवन कॉल लोकेशन आनी सीसीटीव्ही फुटेजीच्या आदारान पुलिसांनी ह्या प्रकरणाचो सोद लायलो. शेनवारा 1 नोव्हेंबराक सकाळीं रेण्ट अ कॅब वेवसायीक दुबावीत गुरुदास लवंदे हाका अटक केली. ते उपरांत सांजे वेळार डायसन कुतिन्हो आनी सुरज ठाकूर ह्या दोन दुबावितांक पुलिसांनी चवकशे उपरांत अटक केली. ह्या खून प्रकरणांत आनीक कांय जाणांचो आस्पाव आशिल्ल्याचें पुलीस चवकशेंतल्यान मुखार आयलां. पुलीस तांचो सोद घेतात.
पुलिसांनी दिल्ले म्हायती प्रमाण, कपील हाणें गुरुदत्त लवंदे हाचे कडल्यान 30 ऑक्टोबराक रेण्ट अ कॅब आशिल्ली जीए 03 एएच 5254 नंबराची थार जीप भाड्यान घेतिल्ली. दीपक ठाकूर नांवान आशिल्लें पॅन कार्ड वळखपत्र म्हूण ताणें दिल्लें. गोंयांत भोंवपा खातीर जाय अशें सांगून ताणें ती जीप घेतिल्ली.
भाड्यान दिल्ली जीप गोंयची शीम हुंपून बांदा, महाराष्ट्रांत पाविल्ल्याचें जीपीएस ट्रॅकराचेर दिसली. आपली गाडी चोरून व्हरता अशें लक्षांत येताच दुबावीत गुरुदत्त लवंदे हाणें आपल्या इश्टांक घेवन किया सेल्टोस मोटारीन थार जिपीचो फाटलाव केलो. कुडाळ- कणकवली वाठारांत तांणी ती जीप आडायली. कपीला कडल्यान समादानकारक जापो मेळूंक नाशिल्ल्यान दुबावितांनी ताका थंय मारबडय केली. उपरांत थीये दोंगुल्लेचेर आनी घडणुकेचे सुवातेर केळ पीर्ण सड्यार हाडून ताका परतून मरसर मारबडय केली तशेंच थंयच ताका रस्त्याचे कुशीक उडयलो. एका सोऱ्याच्या दुकानांतल्यान एका पायंट बियरीची बाटली घेतली आनी सोऱ्याचे घुंवळेंत ताका मरण आयलां, अशें भासोवचे खातीर ती ताच्या बोल्सांत घातली. मजगतीं, पुलीस निरिक्षक निखील पालेकार हांणी वरिश्ठांच्या मार्गदर्शना खाला सांगात्यां सयत कॉल लोकेशन आनी सीसीटीव्ही फुटेजीच्या माध्यमांतल्यान तपास करून ह या खून प्रकरणांत गुरुदत्त लवंदे हाका पयलीं ताब्यांत गेतलो आनी उपरांत ताका रितसर अटक केली. ते उपरांत हेर दोगांक अटक केली. तिगांनीय खुनाची कबुली दिल्या. ह्या प्रकरणांत फुडलो तपास पुलीस निरिक्षक संजीत कांदोळकार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
