भांगरभूंय | प्रतिनिधी
पणजी ः गोंय लोकसेवा आयोगा (जीपीएससी) वतीन वेगवेगळ्या खात्यांतल्या चार पदां खातीर भरती जातली. तातूंतली 3 पदां कार्मिक खात्यांतल्या मामलेदार पदां खातीर आसात. एक रिक्त पद गोंय कॉलेज ऑफ आर्ट्साच्या प्राचार्य पदां खातीर आसा. सगल्या 4 पदां खातीर आयोगाच्या संकेतथळार ऑनलायन अर्ज करपाची निमाणी तारीख 28 फेब्रुवारी आसा. सगल्या पदां खातीर कोंकणी भाशेचें गिन्यान आसप गरजेचें अशें आयोगान स्पश्ट केलां.
मामलेदार/ संयुक्त मामलेदार/ दक्षता अधिकारी हांचे 3 पदां मदल्या एक पद दिव्यांग उमेदवारांक राखून दवरलां. ह्या पदां खातीर उमेदवारांकडेन मान्यताय मेळिल्ल्या विद्यापिठाची कायद्याची पदवी आसपाक जाय. तशेंच उमेदवारांक थळावे महसूल कायदे, कायदो आनी सुवेवस्था सांबाळपी कायदे, नियोजन आनी उदरगत कामां आदीं म्हायती आसपाक जाय. उमेदवाराची पिराय 45 वर्सां परस चड आसूंक फावना. पात्र उमेदवारांक मॅट्रिक्स लेव्हल 7 प्रमाण पगार दितले.
गोंय कला शाळेच्या प्राचार्य पदाचेर अर्ज करपी उमेदवाराची पिराय 50 वर्सां परस चड आसूंक फावना. वेंचून काडिल्ल्या उमेदवारांक मॅट्रिक्स लेव्हल 14 प्रमाण पगार दितले. उमेदवारान पीएचडी केल्ली आसपाक जाय आनी उण्यांत उणे आठ सोद प्रबंध ताच्या नांवान आसपाक जाय. त्या मनशाक संबंदीत मळार उण्यांत उणो पंदरा वर्सांचो शिकोवपाचो अणभव आसपाक जाय. तशेंच तांणी तीन वा चड वर्सां प्राध्यापक म्हणून काम केल्लें आसूंक जाय.
सगळ्या पदां खातीर अर्ज शुल्क ऑनलायन वा ऑफलायन पद्दतीन भरले उपरांत अर्जांचेर विचार जातलो अशें आयोगान स्पश्ट केलां. उमेदवारांनी अर्ज भरचे पयलीं आयोगाच्या संकेतथळार आशिल्ल्यो सुचोवण्यो वाचूंक जाय. अर्जाचेर मोबायल क्रमांक आनी ईमेल पत्तो योग्य बरोवचो असो उलो आयोगान केलां. आयोग मेळिल्ल्या अर्जांची बारीकसाणेन चवकशी करतले आनी उमेदवारांक मुलाखती खातीर आपयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
