भांगरभूंय | प्रतिनिधी
पणजी ः गोवा लोकसेवा आयोग (जीपीएससी) वेगवेगळ्या खात्यांत 13 पदां खातीर भरती करतलो. हातूंत सगळ्यांत चड 6 पदां सहाय्यक प्राध्यापक (वाणिज्य) पदां खातीर आसात. भलायकी खात्यांत वरिश्ठ सर्जनाचीं दोन पदां ट्रान्स्फर ऑन डेप्यूटेशन खातीर आसात. आयोगाच्या संकेतथळार 11 पदां खातीर ऑनलायन अर्ज करपाची निमाणी तारीक 23 मे आसा. जाल्यार ट्रान्स्फर ऑन डेप्यूटेशनच्या पदां खातीर निमाणी तारीख 23 जून आसा.
वाणिज्य सहाय्यक प्राध्यापक पदां खातीर उमेदवारांक नेट, सेट वा पीएचडी आसपाक जाय. सतली दोन पदां ओबीसी खातीर आनी चार पदां एसटी समाजा खातीर राखून दवरल्यांत. उमेदवाराची पिराय 45 वर्सां परस चड आसूंक फावना. पात्र उमेदवारांक मॅट्रिक्स लेव्हल 10 प्रमाण पगार दितले. भलायकी खात्यांत वरिश्ठ सर्जनाचीं दोन पदां ट्रान्स्फर ऑन डेप्यूटेशन आदाराचेर भरतले. हाचे खातीर मॅट्रिक्स लेव्हल 11 प्रमाण पगार दितले.
भलायकी खात्यांत थेट पद्दतीन कनिश्ट सर्जनाचे एक पद भरतले. उमेदवारांक गरजेचें वैजकी शिक्षण आसपाक जाय. उमेदवारांची पिराय 45 वर्सां परस चड आसूंक फावना. पुलीस खात्यांत दोन पदां भरतले. हातूंत एक फॉरेन्सिक प्रयोग शाळेंतल्या शास्त्रीय सहाय्यक खातीर आनी एक फोटोग्राफर खातीर आसा. हे खातीर उमेदवाराक विज्ञानांतली पदवी आनी फोटोग्राफींत डिप्लोमा आसपाक जाय.
पुलीस खात्यांतल्या शास्त्रीय अधिकारी (डीएनए) पदाचेर पदव्युत्तर पदवी आसप गरजेचें आसा. बंदर कप्तान विभागांत मरीन इंजिनियर आनी शिप सर्वेयर पद भरतले. हे खातीर उमेदवाराची पिराय 45 वर्सां परस चड आसूंक फावना. आदिवासी कल्याण खात्यांत जिल्लो कल्याण अधिकारी पद भरतले.
सगल्या पदां खातीर ऑनलायन वा ऑफलायन अर्ज शुल्क भरले उपरांत अर्ज स्वीकारतले अशें आयोगान स्पश्ट केलां. अर्ज भरचे पयलीं उमेदवारांनी आयोगाच्या संकेतथळार आशिल्लीं सुचोवण्यो वाचप गरजेचें. अर्जाचेर मोबायल क्रमांक आनी ई-मेल योग्य रितीन बरोवचो असो उलो आयोगान केलां. आयोग अर्जांची तपासणी करतलो आनी उमेदवारांक मुलाखती खातीर आपयतलो. सगल्या पदां खातीर कोंकणी भाशेचें गिन्यान गरजेचें आसा अशें आयोगान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
