भांगरभूंय | प्रतिनिधी
पणजीः गोंय लोकसेवा आयोगा वतीन भरती केल्ल्या वेगवेगळ्या 92 पदां खातीर संगणक आदारीत भरती चांचणी (सीबीआरटी) 28 सप्टेंबराक जातली. हातूंत शारिरीक शिक्षण शिक्षक, सहाय्यक कृशी अधिकारी, सहाय्यक प्राध्यापक, वैजकी अधिकारी, सहाय्यक वखदां रसायनशास्त्रज्ञ, सहाय्यक व्याख्यातो ह्या पदांचो आस्पाव आसा.
उमेदवारांनी 19 सप्टेंबर मेरेन प्रवेशपत्र डावनलोड करचें असो उलो आयोगान केलां. ज्या उमेदवारांक प्रवेशपत्र डावनलोड करूंक मेळूंक ना तांणी 22 ते 25 सप्टेंबर ह्या काळांत आयोग कार्यालयांतल्यान घेवप गरजेचें. हाचे खातीर उमेदवाराकडेन वळख पुरावो आसपाक जाय. प्रवेशपत्र नाशिल्ल्या उमेदवारांक सीबीआरटी दिवपाक मेळची ना. उमेदवारांक दिल्ल्या वेळा पयलीं प्रवेश कार्डाचेर उल्लेख केल्ल्या केंद्रांत हाजीर रावचें पडटलें. चड म्हायती खातीर उमेदवारांनी आपलो ई-मेल तपासचो असो उलो आयोगान केलां.
वयल्या पदां खातीर सीबीआरटी चांचणी 75 गूणांची आसतली. सीबीआरटी चांचणी पास जावपा खातीर उक्ते आनी अर्थीक नदरेन दुबळे विभाग (ईडब्ल्यूएस) प्रवर्गा खातीर उमेदवारांनी उण्यांत उणे 45 गूण (60 टक्के), ओबीसी, दिव्यांग आनी स्वातंत्र्य सैनिकांच्या भुरग्यां खातीर (सीएफएफ) उण्यांत उणे 42 गूण (55 टक्के) आनी एससी आनी एसटी समाजाच्या उमेदवारांनी उण्यांत उणे 38 गूण (50 टक्के) मेळोवंक जाय अशें आयोगान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
