भांगरभूंय | प्रतिनिधी
सध्या हांव मगोतूंच: जीत आरोलकार
पेडणें: मांद्रें मतदारसंघांत सध्या मगोचो उमेदवार आसतना येवपी विधानसभा वेंचणुकेंत मांद्रेंच्यान भाजपचो उमेदवार दितले अशें वक्तव्य करून मुख्यमंत्र्यांनी मगोचें खच्चीकरण करपाचो यत्न केला. मात जर सध्याचे आमदार जीत आरोलकार हांणी भाजपांत प्रवेश केल्यार मांद्र्यां मगोचो दुसरो उमेदवार तयार आसा, अशें मांद्रें, पेडणें मगो कार्यकारिणींनी स्पश्ट केलें.
मजगतीं, हाचेर आमदार जीत आरोलकार हांणी प्रतिक्रिया दिल्या. भाजपान घेतिल्ल्या मेळाव्यांत ‘आपलोच पक्ष जिखतलो,’ अशी आस्त मुख्यमंत्र्यांनी उक्तायली. आपलोच पक्ष सत्तेंत येतलो अशी आस्त बाळगप वायट न्हय. मगोक जशें तें दिसता तशेंच भाजपाकूय दिसप सभावीक आसा. मात हांव सध्या मतदारसंघांतल्या कामांचेर लक्ष दितां. वेंचणूक २०२७ वर्सा जातली. दोन वर्सांनी कितें जातलें हें आतांच सांगप सारकें न्हय. जनतेचे प्रस्न आयकून सरकारच्या माध्यमांतल्यान ते सोडोवपाचेर हांव भर दितां. हें करतना पक्षाचेंय काम हांव करतां, अशें तांणी म्हणलें.
दरेकल्यान मतदारसंघांत बरें काम करपा कडेन भर दिल्यार लोकूय वेंचून हाडटले. काम भक्कम आसल्यार खंयचोय पक्ष अशा उमेदवारांचो विचार करतलो. मतदारूय मतदानाच्या निमाण्या खिणां मेरेन कोणाक मतदान करचें हाचो विचार करतात. आता खंयच वच्चें, कोणा वांगडा रावचें हाचो निर्णय योग्य वेळार कार्यकर्त्यांक विस्वासांत घेवनूच घेतलों. मात सध्या हांव मगोतूंच आसा, अशें आमदार आरोलकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
