जीण सुरू करपाक पिरायेची मर्यादा लागना

भांगरभूंय | प्रतिनिधी

सुरेश प्रभूः स्नेहलता भाटीकार हांच्या अणकारीत पुस्तकांचें लोकार्पण

भांगरभूंय । प्रतिनिधी

पणजीः जीण आयुश्याच्या खंयच्याय पांवड्यार सुरू जावं येता. हाका पिरायेची मर्यादा लागना. आपले भितर स्वताचो सोद घेवन आयुश्यांत श्रेश्ठ थारपाक जाय, अशें आदले केंद्रीय मंत्री सुरेश प्रभू हांणी लेखक स्नेहलता भाटीकार आनी डॉ. मृत्युंजय सारंगी हांची तोखणाय करतना सांगलें.

पणजे शेनवारा सांजे ‘हाजी अलीची फुलकान्न आनी हेर काणयो’ तशेंच ‘केळवण आनी हेर काणयो’ हीं दोन पुस्तकां उजवाडाक हाडलीं. ह्या सुवाळ्यांत मुखेल सोयरे म्हूण सुरेश प्रभू उलयताले. कार्यावळीचे अध्यक्ष म्हूण फोमेंतो उद्देग समुहाचे चेरमन अवधूतबाब तिंबलो, मानाची सोयरी डाॅ. किरण बुडकुले, खासा निमंत्रीत साहित्यीक डॉ. मृत्युंजय सारंगी आनी स्नेहलता भाटीकर हाजीर आशिल्ली. डॉ. सारंगी हांणी इंग्लिशेंत बरयिल्ल्या ह्या दोनूय पुस्तकांचो स्नेहलता भाटीकार हांणी कोंकणींत अणकार केला.

स्नेहलता भाटीकार आनी डॉ. सारंगी हे आपल्या कामांत आसतना तांकां तांचे भितरली साहित्यीक तांक जाणवूंक ना. पूण डॉ. सारंगी हांणी पिरायेच्या 57 वर्सांचेर कथा आनी 67 वर्सांचेर कविता बरोवपाक सुरवात केली. तशेंच पिरायेच्या 84 वर्सांचेर स्नेहलता हांणी ह्या पुस्तकांचो अणकार करून ती एक अद्भूत व्यक्ती आसा हें दाखोवन दिलें, अशें प्रभू हांणी म्हणलें.

आमी स्वता आमचे भितर आशिल्ल्या विवीध तासांचो खोलायेन सोद घेवन बरोवपाक सुरवात करपाक जाय. जीण केन्नाय सुरू जावं येता. तिका पिराय लागना. स्नेहलता आनी डॉ. सारंगी हीं हाची उत्कृश्ट देख जावन आसा, अशें मत प्रभू हांणी मांडलें.

कविता, कादंबरी सयत साहित्यांची वेगवेगळीं रुपां आसात. कादंबरींत खूबश्या गजालींचो आस्पाव आसता, पूण ल्हान काणी बरोवप हें खरें आव्हान. रवीन्द्रनाथ टागोर हांच्यो ‘काबुलीवाला’ आनी ‘भिकारी’ ह्यो काणयो ताची उत्कृश्ट देख. कांय उण्या उतरांनी मांडल्ली ल्हानशी काणी. काणी ल्हान तितली मजेशीर, अशें प्रभू हांणी सांगलें.

अणकार हें दिसपाक सोंपें पूण कठीण काम. अणकार करपाक एक वेगळी कला लागता. उतरा उतराचो अर्थ काडप हो अणकार न्हय. अणकार हो मूळ साहित्याक उर्बा दिवन उंचेल्या पांवड्यार व्हरता. जर डॉ. सारंगी हांच्या पुस्तकाचो अणकार जावंक नाशिल्लो जाल्यार तें भौसा मेरेन पावचेंच नाशिल्लें. अणकार साहित्याक वेगवेगळ्या भाशांनी फुलयता, अशें प्रभू हांणी सांगलें.

भास हें भारत जोडपाचें काम करपाक शकता. जर आमी आमच्या भासांची भरभराट केल्यार आमच्या देशाचीय भरभराट जातली, अशें मत फोमेंतो उद्देग समुहाचे चेअरमन अवधूत तिंबलो हांणी उक्तायलें. देशाचो इतिहास सांगता, राज्य करतले जाल्यार समाजांत फूट घालून तें करचें. सत्ताधिशांनी हें केलें. देखून भारत जोडो संकल्पना ही बरी गजाल आसा. बॉलिवूड, क्रिकेट हे सारिकिल्ले घटक आमकां एकठांय दवरतात, अशें मत तिंबलो हांणी मांडलें.

आशिया खंडांतलो आमचो हो देश भाशांचो देश, जेवणांचो देश. ह्या देशाक वेगळी वळख आसा. हांव म्हज्या इश्टांक सांगता, आमच्या देशांत एक पुराय खंड आसा. आमी सगळे कैदी आसात आनी आमकां मुक्त जावपाक जाय. केन्ना तरी कशेंय करून आमी स्वताक मुक्त करून घेतले आनी भारत देश जो हजार वर्सां पयली आसलो त्या पांवड्याचेर व्हरतले, अशें मत तिंबलो हांणी मांडलें.

ह्या वेळार पुस्तक तयार करपाक मजत करपी हृषिकेश आठवले, कलानंद बांबोळकार आनी हेराक पुस्तकाची प्रत भेटयली. रमा मुरकुंडे हांणी सुत्रसंचालन केलें. येवकार दिनेश मणेरकार हांणी दिलो. सभाघरांत पुस्तक प्रदर्शनूय आयोजीत केल्लें. सुरवेक साहित्यीक मीना काकोडकार हांकां आर्गां ओंपलीं. ह्या सुवाळ्याक उदयबाब भेंब्रे, दामोदर मावजो, पांडुरंग नाडकर्णी, साहित्यीक, साहित्य रसिक व्हड संख्येन हाजीर आशिल्ले.