भांगरभूंय | प्रतिनिधी
मंत्री राव इंद्रजीत सिंह हांणी राज्यसभेंत लेखी जापेत दिली म्हायती
नवी दिल्ली, खबरां संस्था ः सरकारान एकूण देशी उत्पादन (Gross domestic product) मेजपा खातीर मुळाव्या वर्सात बदल करपाची घोशणा केल्या. आतां 2011-12 बदला 2022-23 बेस वर्स आसतलें. हाचो अर्थ आतां सरकार देशाची अर्थीक स्थिती (जीडीपी) मेजपा खातीर नव्या आंकडेवारीची 2022-23 अर्थीक वर्सा कडेन तुळा करतलें. हे पद्दतीन जीडीपीचो सगळ्यांत अचूक अदमास मेळटलो.
एक दशका परस चड काळ तातूंत बदल जावंक ना. हाचे आदीं 2011-12 वर्सा सरकारान तातूंत बदल केल्लो. मिनिस्ट्री ऑफ स्टॅटिस्टिक्स अँड प्रोग्राम इंप्लीमेंटेशन मंत्रालयाचे मंत्री राव इंद्रजीत सिंह हांणी सोमारा राज्यसभेंत लेखी जापेत ही म्हायती दिली.
ह्या बदल प्रकल्पाचेर सरकारान राष्ट्रीय लेखा सांख्यिकी (ACNAS) खाला अध्यक्ष विश्वनाथ गोल्डर हांच्या फुडारपणा खाला 26 वांगड्यांची सल्लागार समिती स्थापन केल्या. हे समितींत केंद्र आनी राज्य सरकार, रिझर्व्ह बँक ऑफ इंडिया, शिक्षणतज्ञ आनी संशोधक हांचो आस्पाव आसा.
बेस वर्साच्या बदलाक लागून कितें बदलतलें?
० बेस वर्साच्या नेमान अपडेटाक लागून देशाचे अर्थवेवस्थेंतल्या संरचनात्मक बदलांचो अचूक अदमास काडप सोंपें जातलें.
० ह्या बदला उपरांत उपभोग पद्दतींत बदल, क्षेत्रीय योगदान आनी उदरगतशील क्षेत्रांतल्या बदलांचो नवीन डेटा वापरून जीडीपी मेजतात.
० ताज्या डेटाचो आस्पाव केल्यार पोरन्या बेस वर्साच्या तुळेंत अर्थवेवस्थेचे स्थितीचें चड अचूक अदमास मेळटात.
० 2022-23 वर्साची अर्थीक वास्तवताय देशांत धोरण तयार करपा खातीर चड अचूक फ्रेमवर्क आनी विश्लेशण दितली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
