भांगरभूंय | प्रतिनिधी
गैरसोय टाळपा खातीर सांजे वेळार पेपर: परिक्षे खातीर ४५३९ अर्ज
पणजी : शालान्त मंडळा वतीन जावपी शिक्षक पात्रताय चांचणी खातीर (टीईटी) आतां मेरेन ४५३९ अर्ज आयल्या. परीक्षा ९ (मंगळार) आनी १० डिसेंबराक (बुधवार) जातली. परीक्षा सांजे वेळार जातली. हाका लागून विद्यार्थी तशेंच शिक्षकांची गैरसोय जावची ना, अशी आस्त शालान्त मंडळाचे अध्यक्ष भगीरथ शेट्ये हांणी उक्तायल्या.
पयल्या पेपराक (पेपर १) १८५७ जाल्यार दुसर्या पेपराक २३७५ उमेदवारांची नोंद जाल्या. दोनूय पेपराक ३०७ उमेदवार आसात. शालान्त मंडळाचे अध्यक्ष भगीरथ शेट्ये हांणी ही म्हायती दिली.
पयली ते आठवी मेरेनच्या शिक्षकां खातीर शिक्षक पात्रताय चांचणी उत्तीर्ण जावप सक्तीचें आसा. पयली ते पाचवी मेरेन पयलो पेपर जाल्यार सवी ते आठवी मेरेन दुसरो पेपर दिवचो पडटलो. दोनूय पेपरांक लेगीत बसपाची मेकळीक आसा. टीईटीचो पयलो पेपर ९ डिसेंबराक दनपारा ३ ते ५.३० मेरेन जातलो. दुसरो पेपर १० डिसेंबराक दनपारा ३ ते ५.३० मेरेन जातलो. उत्तर गोंया खातीर सेंट झेवीयर उच्च माध्यमिक विद्यालय, म्हापशें आनी दक्षीण गोंया खातीर रोझरी उच्च माध्यमीक विद्यालय, नावेली ही परिक्षेची केंद्रां आसात.
१५० गुणांचो पेपर आसतलो. सामान्य गटांत उत्तीर्ण जावपा खातीर ९० गुण जाल्यार एससी, एसटी, ओबीसी गटात उत्तीर्ण जावपाक ८३ गुण गरजेचे आसा. एकदा टीईटी परीक्षा पास जाले उपरांत एखादो मनीस केन्नाय शिक्षक पदा खातीर अर्ज करूंक शकता. तशेच कितले खेपो परिक्षेक बसपाची मेकळीक आसा. राष्ट्रीय शिक्षण धोरण लागू जाल्या उपरांत आठवी मेरेनच्या शिक्षकां खातीर टीईटी परिक्षा उत्तीर्ण जावप सक्तीचे आसा. हाका लागून गोंयांत परिक्षेक बसपी उमेदवारांचो आंकडो वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
