भांगरभूंय | प्रतिनिधी
पणजी: शालांत मंडळा वतीन जावपी शिक्षक पात्रताय चांचणीत (जीटीईटी) पयल्या पेपराचो निकाल 70 टक्के जाल्यार दुसऱ्या पेपराचो निकाल 53 टक्के लागला. ही परिक्षा डिसेंबरांत जाल्ली.
पयल्या पेपराक (पेपर 1) 2288 जाल्यार दुसऱ्या पेपराक 2845 उमेदवारांनी नोंदणी केल्ली. दोनूय पेपराक 307 उमेदवारांनी नोंदणी केल्ली.
पयल्या पेपरांत 1592 उमेदवार पास जाले. हें प्रमाण 69.58 टक्के जाता. 46 उमेदवार गैरहाजीर जाल्यार 650 उमेदवार नापास जाले.
दुसऱ्या पेपरांत 1493 उमेदवार पास जाले. हें प्रमाण 52.48 टक्के जाता. 1303 उमेदवार नापास जाल्यार 49 उमेदवार गैरहाजीर रावले.
पयली ते आठवी मेरेनच्या शिक्षकां खातीर शिक्षक पात्रताय चांचणी पास जावप सक्तीचें आसा. पयली ते पांचवी मेरेन पयलो पेपर जाल्यार सवी ते आठवी मेरेन दुसरो पेपर दिवचो पडटा. दोनूय पेपरांक लेगीत बसपाची मेकळीक आसा. टीईटीचो पयलो पेपर 9 डिसेंबराक जाल्यार दुसरो पेपर 10 डिसेंबराक जालो. उत्तर गोंया खातीर सेंट झेवियर उच्च माध्यमीक विद्यालय, म्हापशें आनी दक्षीण गोंया खातीर रोझरी उच्च माध्यमीक विद्यालय, नावेली हांगा परिक्षा जाली. सामान्य गटांत पास जावपा खातीर 90 गूण जाल्यार एससी, एसटी, ओबीसी गटांत पास जावपाक 83 गूण आवश्यक आसा. एकदां टीईटी परिक्षा पास जाले उपरांत एखादो मनीस केन्नाय शिक्षक पदा खातीर अर्ज करूंक शकता. तशेंच कितलेय खेपे परिक्षेक बसपाची मेकळीक आसा. राष्ट्रीय शिक्षण धोरण लागू जाले उपरांत आठवी मेरेनच्या शिक्षकां खातीर टीईटी परिक्षा पास जावप सक्तीचें आसा. हाका लागून गोंयांत परिक्षेक बसपी उमेदवारांचो आंकडो वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
